Pájina aktualizada iha 08:15h, domingu 19 Novembru

Governu timoroan aprova estrutura asionista foun empreza simentu nian

07 de Novembro de 2018, 21:02

Governu timoroan aprova iha loron-kuarta ne'e modelu asionista foun empreza TL Cement, ne'ebé maka sei konstroi fabrika simentu nian ida iha aredor Baucau nian, sidade daruak nasaun ne'e nian, pasu ikus hodi projetu ne'e bele hahú.


Iha komunikadu, ezekutivu ne'e esplika katak empreza ne'e "fofoun konstitui hanesan sosiedade por kuotas, ho responsabilidade limitada no kapital privadu", maibé ho entrada Estadu nian, Governu hakarak empreza ne'e "transformada iha Sosiedade Anónima, ho responsabilidade ilimitada ka TL Cement SA".

Asuntu ne'e lori ba Konsellu Ministru iha loron-kuarta ne'e hosi Autoridade Nasional Metroleo no Minerais (ANMP), ne'ebé maka halo aprezentasaun konabá sosiedade ne'ebé maka Estadu mós sai hanesan asionista.

James Rhee, responsavel projetu ne'e, konfirma ba Lusa katak empreza ne'e hetan ona autorizasaun ambiental no esplorasaun mineira, ne'ebé maka permite aranke serbisu sira ne'e iha fulan ne'e ka fulan oin.

"Ne'e pozitivu tebes. Finalmente projetu atu aranka ona. Ha'u too iha Timor iha tinan 2012 no demora tinan nein no finalmente akontese duni. Ne'e pozitivu, maski demora. Preojetu sira ne'ebé hanesan ho ida ne'e iha Australia bele demora too tinan sia ka sanulu", nia afirma.

"Nia objetivu nafatin de'it tenki iha karegamentu simentu nian ba dahuluk ne'ebé sei haruka ba Australia iha tinan 2021. Komunidade lokal sira envolvida iha projetu no ida ne'e mós pozitivu tebes", nia hatete.

Atual Governu inklui dotasaun ida ho valor dolares millaun 50 iha Orsamentu Jeral Estadu nian ba tinan ida ne'e, ba projetu fabrika simentu nian, iha ámbitu "akordu espesial investimentu nian ne'ebé halo ho TL Cement".

Projetu ne'e hanesan investimentu privadu australianu nian ne'ebé boot iha Timor-Leste, iha parte balun afetadu tanba situasaun instabilidade politika iha Timor-Leste ne'ebé maka too ba eleisaun antesipada no obriga nasaun ne'e moris ho duodesimu dezde fulan Janeiru.

Previzaun hatudu katak konstrusaun sentru formasaun no kais kosntrusaun nian sei hahú iha tinan ne'e, no fabrika simentu nian no kais prinsipal sei aranka antes fulan Jullu 2019.

TL Cement antesipa saida simentu unidade nian ba dahuluk iha fulan Jullu 2021 no operasaun sei kompletu iha inisiu tinan 2022. Ho total, empreza ne'e prevé investimentu ida hamutuk dolares millaun 800, empregu diretu hamutuk rihun ida no indiretu hamutuk rihun tolu.

Projetu TL Cement nian sei iha kapasidade ba produsaun hamutuk tonelada 'clinker' simentu rihun lima resin lor-loron no inklui konstrusaun ponte-kais ida, pedreira, kompleksu industrial, parque enerjia eólika no solar, no sira seluk tan.

Estudu sira ne'ebé halo iha tinan 2014 aponta ba ezisténsia ba rezerva boot kalkáriu nian ida iha rejiaun ne'e no bele dura too tinan 400.

Iha final fulan Novembru 2016, Konsellu Ministru VI Governu Konstitusional nian, ne'ebé lideradu hosi Rui Araújo, aprova entrada Estadu nian iha kapital sosial TL Cement nian.

ho Lusa

 


Comentários

Critério de publicação de comentários