Pájina aktualizada iha 08:35h, domingu 19 Novembru

Governu timoroan hasai billiaun 1,5 resin hosi Fundu Petroliferu iha tinan 2019

09 de Novembro de 2018, 02:04

Governu timoroan sei foti dolares billiaun 1,54 hosi Fundu Petroliferu iha tinan 2019, ne'ebé maka reprezenta billaun resin a'as liu hosi rendimentu sustentavel, hodi finansia konta publika sira Timor-Leste nian, tuir proposta orsamentu nian.


Presiza halo levantamentu ne'e hodi kompensa fali défise fiskal laos petrolifera Orsamentu Estadu nian ba tinan 2019, ne'ebé maka sai hanesan orsamentu ne'ebé aas ba daruak Timor-Leste nian, sa'e dolares millaun 1.827, refere proposta Orsamentu Estadu nian, ne'ebé maka Lusa hetan asesu.

Proposta lei ho Orsamentu Jeral Estadu (OJE) nian ba tinan 2019, entrega iha loron-kinta hosi ministra interina Finansas, Sara Brites no hosi ministru Reforma Lejislativa no Asuntu Parlamentares, Fidelis Magalhães, ba prezidente Parlamentu Nasional, Arão Noé Amaral, hodi hahú prosesu formal ba dokumentu ne'e.

Dokumentu ne'e prevé katak Estadu iha reseita sira ho total hamutuk dolares millaun 1.249 ba tinan 2019, ne'ebé maka millaun 963,4 hosi petrolifera sira, no millaun 343,7 koresponde ba impostu sira ne'ebé relasiona ho esplorasaun petrolifera no juru sira millaun 619,7 Fundu Petroliferu nian.

Reseita laos petrolifera sira hamutuk millaun 189,3, ne'ebé maka millaun 61,6 ba impostu diretu sira, millaun 74,2 iha impostu indiretu sira no sira seluk iha taxa no enkargu sira.

Proposta lei ne'e fixa limite másimu ida ho montante dolares millaun 87 ba endividamentu publiku hodi koresponde ba "nesesidade sira finansiamentu nian ne'ebé relasiona ho konstrusaun infraestrutura estratejika ba dezenvolvimentu nasaun nian".

Hosi valor másimu ne'ebé permitidu, Estadu determina rekursu too másimu dolares millaun 60 iha "endividamentu externu konsensional", ho termu pagamentu to'o tinan 40.

Testu ne'e antesipa millaun 14,9 reseita sira ne'ebé koresponde ba serbisu no fundu autónomu sira, inklui mós Rejiaun Administrativa Espesial Oecusse-Ambeno (RAEOA) nian no Zona Espesial Ekonomia Sosial de Merkadu (ZEESM).

Konta publika sira ba tinan oin prevé gastu ida hamutuk millaun 214 iha salariu no vensimentu sira, millaun 478,3 iha bens no serbisu sira, millaun 705,1 iha transfrénsia publika sira, millaun 400 ba kapital dezenvolviemtu no millaun 29,4 iha kapital menor.

Défise fiskal laos petroliferu hamutuk dolares millaun 1.628,4, finansiadu ho millaun 1.541,4 hosi Fundu Petroliferu (FP), ne'ebé maka implika hasai besik 9% hosi valor fundu nian ne'ebé maka iha final fulan Setembru sa'e ba dolares billiaun 17,16.

Ida mós implika levanta millaun 529 hosi Rendimentu Sustentavel Estimadu (RSE) millaun 1.021,4 resin.

Total despeza sira serbisu no fundu autónomu sira nian, inklui mós despeza sira finansiada hosi emprestimu sira, hamutuk dolares millaun 428,15.

Iha konta publika sira tinan 2019 nian prevé transferénsia publika sira ne'ebé boot, inklui mós dolares millaun 76 ba RAEOA no ZEESM.

Hosi total ne'e mós halo parte dolares millaun 350 ba Ministeriu Petroleu no Minerais, liu hosi petrolifera nasional Timor Gap, hodi sosa 30% partisipasaun ConocoPhillips nian iha konsorsiu posu Greater Sunrise nian, iha Tasi Timor.

Maski inklui valor ne'e iha OJE, estratejia Governu nian tenta atu hasai valor ne'e diretamente hosi Fundu Petroliferu hanesan invetimentu - agora daudaun ne'e parlamentu debate hela posibilidade ne'e - ne'ebé maka sei implika no konsidera 'despeza' orsamental.

Se opsaun alternativa ne'e konkretiza duni, OJE ba tinan 2019 nian sei iha redusaun efetiva ida iha nian total besik dolares millaun 350.

To'o momentu ne'e Governu seidauk konfirma se halo prosesu formal ga lae lei OJE ho urjénsia, tanba normalmente, konta publika sira fó entrada iha parlamentu iha fulan Outubru, ho prosesu formal ne'ebé normal no ne'ebé maka dura besik fulan rua, hamutuk mós ho periodu promulgasaun prezidensial.

ho Lusa

 


Comentários

Critério de publicação de comentários