Pájina aktualizada iha 05:42h, tersa-feira 12 Dezembru

Petrolifera ho Timor-Leste negoseia esplorasaun posu iha Tasi Timor nian

04 de Dezembro de 2018, 22:55

Autoridade petrolifera timoroan sira no petrolifera australiana Carnarvon Petroleum iha hela konversasaun ba kontratu foun ba partilla produsaun iha kampu Buffalo iha Tasi Timor nian, hatete fonte setor ne'e nian ba Lusa.


Fonte sira esplika katak konversasaun ne'e "halao ho di'ak los hela", no la avansa kalendariu ida ba konkluzaun ba kontratu foun partilla produsaun ne'e nian.

Carnarvon Petroleum prevé ona planu ida ba dezenvolvimentu foun kampu ho relasaun iha plataforma ida ne'ebé ligada ho estrutura flutuante produsaun nian, armazenamentu no transporte.

Rekorada mós katak Carnarvon Petroleum anunsia iha fulan Juñu 2016 sosa lisensa ba zona WA523 iha Tasi Timor, ne'ebé maka lokalizadu kampu petroliferu Buffalo, no ne'ebé maka abandonadu dezde tinan 2004, tanba konsidera katak sei iha potensial esplorasaun nian.

Hafoin analize preliminar sira, empreza ne'e estima katak posu tolu produsaun ne'e nian bele produz besik millaun 31 baril petroleu nian ba periodu tinan lima nian laran.

Kustu sira kapital nian bele ronda dolares millaun 150, no gastu operasional total ba tinan lima nian laran bele too entre dolares millaun 400 no 500.

Empreza esplika katak hakarak avansa ona ho atividade prefurasaun balun iha tinan oinmai - posu esplorasuan ho naran Buffalo East-1 no too posu rua avaliasaun Buffalo East-2 no 3 -, ne'ebé maka presiza kontratu partilla produsaun nian ida ho Timor-Leste.

"Ohin ami fiar katak ami bele konstroi kampu hodi bele too 4.000 baril petroleu ba kada loron no aumenta too numeru ne'e", hatete Adrian Cook, prezidente ezekutivu Carnarvon.

Empreza ne'e estuda hela posibilidade hodi envolve parseiru finansiamentu ba projetu ne'e.

Antigamente iha Área Konjunta Dezenvolvimentu Petrolifera nian (ACDP), ne'ebé maka abranje hosi akordu temporariu sira entre Timor-Leste no Australia, kampu ne'e iha tasi timoroan sira nian dezde asinatura iha fulan MArsu tratadu foun fronteira premanente.

Iha produsaun entre tinan 1999 no 2004, kampu petroliferu Buffalo ne'e deskobertu hosi BHP Petroleum iha tinan 1996 no lokaliza 12 kilometru besik hosi lukrativu kampu Laminaria nian.

Esploradu ho plataforma fixa ida, produsaun flutuante no produz baril petroleu hamutuk millaun 31 resin.

ho Lusa

 


Comentários

Critério de publicação de comentários