Pájina aktualizada iha 05:30h, tersa-feira 12 Dezembru

Timor-Leste hakarak ajuda Portugal nian hodi kria Institutu Medisina Legal iha nasaun

05 de Dezembro de 2018, 22:56

Timor-Leste husu iha semana ne'e ba Portugal apoiu hodi kria Institutu Medisina Legal ida iha nasaun, hatete ministru Justisa timoroan, ne'ebé maka termina ninian vizita ida ba Lisboa iha loron-kuarta ne'e, ne'ebé maka reúne mos ho ninian omóloga, Francisca Van Dunem.


"Ha'u adianta kedan ona katak Timor-Leste preciza Institutu Medisina Legal ida (...) no ha'u konta ho Portugal nian apoiu, ne'ebé maka iha obrigasaun atu ba investe iha ne'ebá tanba ita maun-alin. Ha'u hakarak hare buat hotu konkretiza enkuantu ha'u nu'udar ministru Justisa Timor-Leste nian", afirma Manuel Cárceres da Costa, iha deklarasaun ba Lusa.

Ministru akresenta katak koalia ona konabá asuntu ne'e ho diretor Institutu Medisina Legal Portugal nian no sei formaliza proposta ida hodi bele diskuti.

Asuntu ida ne'ebé maka nia hatete katak koalia mós ho ministra Justisa Portugal nian, Francisca Van Dunem, ne'ebé maka nia reúne iha loron-segunda ne'e iha Lisboa, no adianta mós katak governante portugueza hatudu "ninian vontade".

Manuel Cárceres da Costa refere katak durante ninian estadia iha Lisboa nia reúne mós ho responsavel sira Polisia Judisiaria nian, ne'ebé maka forma investigador timoroan sira.

Nia konsidera katak reforma justisa Timor-Leste, "hanesan fator ida ne'ebé importante ba dezenvolvimentu nasaun nian", tanba ne'e tenki avansa. "La iha governasaun sem justisa no nem justisa sem governasaun", nia konklui.

Governu Timor-Leste mós husu ba Portugal apoiu ba justisa, inklui mós juiz sira, prokuador sira, defensor publiku sira, advogadu sira no ofisiais justisa portuguez sira, hatete ministru Justisa timoroan iha loron-tersa ne'e iha Lisboa, no estende mós apelu ne'e ba nasaun luzófonu sira.

Maibé, nia mós subliña katak "juiz no prokurador portuguez sira sei la sai hanesan titular ba prosesu sira, sira sei sai hanesan formador no mentor sira hodi forma kuadru timoroan sira" iha lian portuguéz.

Manuel Cárceres da Costa mós hasoru malu ho sekretaria-ezekutiva Komunidade Nasaun sira Lian Portugueza (CPLP), Maria do Carmo Silveira, no ho sekretaria Estadu Negosius Estranjeirus no Kooperasaun, Teresa Ribeiro.

Hosi reuniaun sira ho governante portuguez sira, nia hatete katak lori promesa sira ne'ebé maka bele ajuda ita nian nasaun hodi konsolida dezenvolvimentu Justisa nian: "Objetivu vizita ba Portugal, ne'ebé maka ha'u nian vizita serbisu nian dahuluk nu'udar ministru Justisa Republika Timor-Leste nian, maka buka apoiu hodi konsolida dezenvolvimentu justisa nian iha nasaun".

Ministru konsidera katak reforsu ensinu lian portugueza "fundamental ba dezenvolvimentu" iha setor ne'e tanba ho tinan 24 okupasaun estranjeira, "Timor-Leste atu lakon tiha ninian ligasaun ba lian portugueza no ohin loron iha jurista joven sira, espesifiku iha setor justisa nian, ne'ebé maka moris durante okupasaun Indonezia nian no serbisu ho lejislasaun ida ne'ebé maka hakarak ho lian portuguez".

ho Lusa

 


Comentários

Critério de publicação de comentários