Pájina aktualizada iha 04:20h, tersa-feira 20 Marsu

Ezekusaun orsamental iha Timor-Leste atinji 92,9%

07 de Janeiro de 2019, 21:36

Iha tinan kotuk, Estadu timoroan ezekuta 92,9% hosi dolares millaun 1.277 ne'ebé orsamentadu, tuir dadus provizoriu sira iha Portal Transparénsia Ministériu Finansas Timor-Leste nian.


Too final tinan 2018 nian, Estadu ezekuta ona dolares millaun 1.152, ho kompromisu sira hamutuk millaun 12,16 no obrigasaun sira hamutuk dolares millaun 34,69.

Refere ba reseita sira ne'ebé prevista ba tinan 2018, fonte ne'ebé hanesan - ne'ebé maka rejista pratikamente iha tempu real entrada no saida konta publika sira nian - aponta ezekusaun ida ho 107%, ho total hamutuk dolares millaun 201,94, liu tiha millaun 13,26 hosi 188,68 ne'ebé maka orsamentadu.

Dadu sira hatudu katak Governu aselera tiha ezekusaun iha reta final tinan kotuk nian, tanba iha segunda metade fulan Novembru nian ezekuta de'it dolares millaun 787,4.

Ne'ebé maka refere ba gastu sira, konta tezouru nian ezekuta tiha 94,2% hosi millaun 757,4 ne'ebé orsamentadu no Fundu Infraestrutura nian ezekuta tiha 99,2% hosi millaun dolares 324,4.

Entre reseita sira, fatia boot liu maka hosi Diresaun Nasional Alfándega nian, ne'ebé maka simu dolares millaun 68,88, no Diresaun Jeral Impostus Doméstiku, ne'ebé maka rekolla reseita sira hamutuk dolares millaun 63,62.

Rekorda mós katak Timor-Leste moris entre fulan Janeiru no final fulan Setembru iha tinan kotuk ho rejime duodésimu nian, ho Orsamnetu Jeral Estadu nian (OJE) ne'ebé maka aplika ho normalidade só iha final tinan kotuk nian.

Prosesu ne'e mós afeta problema barak iha sistema pagamentu Esatdu nian.

Problema ne'e bé mak kondisiona asaun Estadu nian, rezulta hosi rekonsiliasaun ne'ebé maka presiza aplika entre dadu sira referente ba OJE 2018 no dadus reseita sira nian no despeza sira ne'ebé maka aplikadu, ho rejime duodesimal, dezde loron 01 Janeiru too loron 30 Setembru.

Prosesu ida ne'ebé difisil tanba obriga hodi ajusta kategoria orsamental sira tuir orgénika VIII Governu konstitusional nian, iha funsaun iha fulan hat nian.

Timor-Leste hahú tinan 2019 ho fali duodesimu, ho OJE ne'ebé maka aprovadu no haruka hosi parlamentu timoroan ba Prezidente Republika iha loron 26 Dezembru.

Xefe Estadu iha loron 30 hodi desidi se promulga ka veta dokumentu ne'e.

ho Lusa

 


Comentários

Critério de publicação de comentários