Pájina aktualizada iha 11:56h, domingu 20 Janeiru

Aviaun indoneziu ho destinu ba Dili desviadu tiha tanba problema iha estabilizador

07 de Janeiro de 2019, 22:06

Aviaun kompañia indonezia Sriwijaya ho numeru voo SJ270, ne'ebé maka liga iha loron-segunda ne'e hosi Bali ba Dili, desviadu tiha bainhira atu tun ona iha kapital timoroan nian tanba problema iha estabilizador, hatete fonte empreza nian ba Lusa.


"Aviaun atu tun ona iha Dili, maibé iha problema iha estabilizador no nesesariu desvia tiha aperllu ne'e ba Ujung Pandang", esplika fonte Sriwijaya nian iha Bali ba Lusa.

Fonte ne'ebé hanesan mós esplika katak pista iha Dili la oferese seguransa ne'ebé sufisiente hodi tun ho problema iha estabilizador maibé ida ne'e "posivel" iha aeroportu iha Selebes Súl.

Fonte empreza nian konfirma ba Lusa katak pasajeiru sira hamutuk na'in 110 maka halo viajen iha aviaun ne'e.

Fonte aviasaun sivil timoroan nian esplika ba Lusa katak problema ne'e afeta 'flaps' aviaun nian, tanba ne'e, "presiza pista ida ne'ebé maka naruk liu hodi tun".

"Iha situasaun sira hanesan ne'e presiza pista ida pelumenuz metru rihun rua no iha Dili iha de'it metru 1.450", detalla fonte ne'e.

Aviaun ne'e sai hosi Bali besik oras 10:00 lokal (oras 11:00 iha Dili) no oras prevista too iha Dili besik oras 13:00.

Site flightradar hatudu katak voo ne'e besik ba aeroportu, no ne'ebé maka fó volta barak, maibé fila tiha fali ba espasu aereo indoneziu nian, no tun sem problema seguransa nian, iha Macasar, kapital Selebes Súl.

Ida ne'e ba dala rua ona iha menuz fulan ida nian laran maka aviaun Sriwijaya rejista problema iha lagasaun ho Dili.

Pasajeiru sira aviaun kompañia indonezia Sriwijaya nian, ne'ebé maka halo ligasaun entre Dili ho Bali, tenki halo parte hosi viajen ne'e ho tau kolete salva-vida sira, hafoin rejistadu problema sira iha motor liman-los aeronave nian.

ho Lusa

 


Comentários

Critério de publicação de comentários