Pájina aktualizada iha 11:56h, domingu 20 Janeiru

Xanana dezafia opozisaun timoroan no esklarese se apoia projetu Greater Sunrise nian

09 de Janeiro de 2019, 00:48

Negosiador prinsipal Timor-Leste nian ba Tasi Timor, Xanana Gusmão, konsidera iha loron-tersa ne'e "interese Estadu nian" sosa partisipasaun maioritaria iha konsorsiu Greater Sunrise nian, no dezafia opozisaun hodi klarifika sira nian pozisaun.


"Ha'u hatete ba señor opozisaun sira: halo pergunta, hatete dehan apoia, maibé depois? Se la apoia, dehan halo klaru. Tenki klaru hodi ema hotu hatene", nia afirma.

Xanana Gusmão koalia iha Parlamentu Nasional iha sesaun plenaria ida ne'ebé maka dedika los de'it hodi esplika ba deputadu sira operasaun sosa hosi Timor-Leste nian ba partisipasaun iha konsorsiu Greater Sunrise nian, iha Tasi Timor.

Hafoin oras barak hodi esplika no hatan ba pergunta deputadu sira nian konabá espetu tekniku estratejia nian oioin ba Greater Sunrise, Xanana Gusmão pasa kritika politika sira ba opozisaun, ne'ebé maka nia hatete katak iha postura ne'ebé kontraditoria, no ba Prezidente Republika ne'ebé maka veta alterasaun sira ba lei operasaun petrolifera sira ne'ebé maka aprezentada hodi fasilita sosa partisipasaun ne'e.

"Ha'u katuas liu ona hodi aguenta falta maturidade sira ne'e", nia hatete ba deputadu sira.

Iha kauza maka akordu sira ne'ebé maka Xanana Gusmão asina iha Timor-Leste nian naran hodi sosa asaun sira ConocoPhilips ho Shell nian iha konsorsiu Greater Sunrise nian, ho valor total hamutuk dolares millaun 650.

Iha fulan Dezembru, Prezidente Republika veta tiha konjuntu polemika ida ba alterasaun lei operasaun petrolifera nian ne'ebé maka serve hodi finansia operasaun sira ne'e, ne'ebé maka agora ne'e inskrita hela, hanesan despeza, iha proposta Orsamentu Jeral Estadu nian (OJE) ba tinan 2019, ne'ebé maka xefe Estadu sei analiza hela.

Operasaun partisipasaun ConocoPhilips, ho valor hamutuk dolares millaun 350, ne'ebé maka kontabiliza ona iha konta sira bainhira tama iha parlamentu, maibé dolares millaun 300 hodi sosa asaun sira Shell nian inklui ona iha debate iha espesialidade OJE nian.

Xanana Gusmão kritika tanba opozisaun kontinua eziji nafatin dialogu konabá asuntu ne'e, no mós ho xefe Estadu, rekorda mós katak hasoru malu ho Lu-Olo, ne'ebé maka nia apela hodi promulga alterasuan sira ne'e.

"Ha'u ba ne'ebá esplika buat hotu, hafoin asina sosa Conoco nian, ha'u husu hodi promulga. Hafoin ninian membru sira hosi nia partidu kestiona konabá legalidade, sira duun ha'u katak tenta korompe lei no Estadu bainhira hau asina ne'e. Hafoin ne'e nia veta", nia afirma.

"Ok. Bele veta. Se ilegal, hanesan sira hatete, Prezidente veta. Dehan katak labele sosa no la iha problema. Ha'u hakerek karta ida ba Conoco ho Shell hatete katak bele fan ba seluk", akresenta Xanana Gusmão.

Lider timoroan ne'e kritika mós tom hosi pergunta sira balun.

"Ha'u la mai iha ne'e atu halimar. Ha'u la mai iha ne'e hodi lakon tempu. Ha'u la mai iha ne'e defende ha'u nian osan, ne'e laos kestaun pesoal. Ha'u defende interese nasional no ha'u aguenta tanba ida ne'e", nia afirma.

Durante debate ne'e, opozisaun kestiona konabá aspetu oioin akordu nian, hosi kustu sira ba retorna ekonomiku no finanseiru projetu nian no estratejia investimentu Governu nian.

Legalidade operasaun ba sosa partisipasaun iha konsorsiu Greater Sunrise nian no too aspetu sira hanesan formatu debate loron-tersa ne'e nian - ne'ebé maka pratikamente intervensaun hotu-hotu iha Xanana Gusmão nian kargu - kestiona hotu kedan hosi opozisaun.

ho Lusa

 


Comentários

Critério de publicação de comentários