Pájina aktualizada iha 23:41h, segunda-feira 22 Abril

Sekretariu Estadu Ambiente timoroan nian hakarak estratejia hodi mitiga danus amibiental sira

06 de Fevereiro de 2019, 21:21

Timor-Leste presiza implementa lalais estratejia sira ne'ebé maka kontribui hodi mitiga efeitu sira ne'ebé maka alterasaun klimatika hahú iha ona iha nasaun ne'e, liu-liu iha zona kosteira sira, hatete sekretariu Estadu Ambiente nian, iha loron-kuarta ne'e.


"Dala barak ita hare efeitu alterasaun klimatika sira, laos de'it iha Timor-Leste, maibé iha mundu tomak. Efeitu sira ne'ebé maka nota iha inundasaun sira ka iha problema sira seluk iha fatin barak", afirma Demétrio Amaral.

Amaral koalia iha seminariu ida konabá "jestaun área kosteira sira iha kontestu urbanizasaun turistika no alterasaun klimatika sira" iha sudeste aziatiku, ne'ebé maka aprezenta informasaun preliminar balun ba investigasaun balun ne'ebé maka halo durante tinan rua iha nasaun tolu: Indonezia, Timor-Leste no Tailandia.

Preokupasaun ida maka impaktu ne'ebé maka alterasaun klimatika sei iha esforsu futuru ne'ebé maka nasaun ne'e atu dezenvolve iha setor turismu.

"Ohin loron, iha Timor-Leste, turismu seidauk dezenvolve di'ak, maibé ami konsidera katak nasaun ne'e iha potensial ida ne'ebé forte hodi iha futuru ita bele reduz ita nian dependénsia iha petroleo", nia hatete.

Intervén iha enkontru ne'e, embaixador frensés ba Indonezia no Timor-Leste nian, Jean-Charles Berthonnet, konsidera ne'e hanesan dezafiu boot ida hodi kombate ba alterasaun klimatika sira, liu-liu iha zona kosteria sira.

Berthonnet refere katak, laos de'it tanba impaktu ambiental ne'e maibé tanba efeitu sira, espesialmente iha nasuan sira ne'ebé depende ba kosta, iha ekonomia no sosial, ho "vulneribilidade boot iha illa-nasaun kiik sira ne'ebé maka sente diretamente impaktu ne'e".

Iha ámbitu ne'e, diplomata ne'e destaka aspetu rua ne'ebé esensial - planeamentu urbanu no inovasaun - hanesan eixu serbisu nian, hodi dezenvolve politika sira iha área oioin hanesan abitasaun, transporte ka protesaun ambiental.

Francisco Martins, reitor Universidade Nacional Timor Lorosa'e (UNTL) nian, subliña importánsia medida olistika sira, no buka intervensaun sira ne'ebé maka maximiza potensial sira zona kosteira nian.

ho Lusa

 


Comentários

Critério de publicação de comentários