Pájina aktualizada iha 16:40h, kuarta-feira 24 Jullu

Interogadu ona padre ne'ebé akuzadu ba abuzu sexual ba labarik sira iha Timor-Leste

07 de Fevereiro de 2019, 22:16

Komandante Polisia Nasional Timor-Leste nian (PNTL) konfirma iha loron-kinta ne'e katak padre norte-amerikanu ida suspeitu ba abuzu sexual ba menor sira iha enclave timoroan Oecusse interogadu ona no kazu ne'e investiga hela.


"Prosesu ne'e lao hela. Interoga hela hosi investigasaun kriminal no prosesu ne'e lao hela. Ami mós koalia ona ho Ministeriu Publiku konabásituasaun ne'e no ami mós koalia ona ho bispu", hatete Júlio Hornay, no lakoi halo komentariu barak konabá kazu ne'e.

Kestiona hosi Lusa konabá ba kazu ne'e, Hornay hatete katak asunte ne'e jere hela hosi autoridade investigasaun no hosi Ministeriu Publiku.

"Iha mós kestaun sira seluk, inklui mós imigrasaun, tanba nia nu'udar sidadaun estranjeiru", hatete iha saida hosi ninian enkontru semanal ho Prezidente Republika, Francisco Guterres Lu-Olo.

"Mai ita hein rezultadu investigasaun sira", nia hatete.

Primeiru-ministru timoroan, Taur Matan Ruak mós hatete iha loron-kinta ne'e katak polisia ho justisa maka sei investiga kazu padre norte-amerikanu nian ne'ebé suspeitu ba abuzu ba labarik sira iha orfanatu ne'ebé maka nia jere iha enklave Oecusse-Ambenu.

"Husik justisa maka toma konta. Prosesu lao hela. Ha'u iha respeitu boot ida ba ida ne'e. No ha'u husik polisia no justisa maka halo konta ba asuntu ne'e", hatete ba jornalista sira iha Palasiu Prezidensial hafoin ninian enkontru semanal ho xefe Estadu.

Publikasaun timoroan Tempo Timor notisia iha semana kotuk katak padre Richard Daschbach afsta tiha hosi Kongregasaun Doutrina Fé nian (KDF) iha Vatikanu hafoin akuzasaun sira katak nia abuza labarik barak ne'ebé maka iha ninian kuidadu iha Oecusse.

Sita responsavel katoliku timoroan sira, Tempo Timor revela katak Dascbach admiti duni ninian krimi sira ba kongregasaun Societas Verbi Divini (SVD ka Sosiedade Liafuan Divina), no ne'ebé maka hasai tiha hosi enklave.

Daschback, ho tinan 81, natural hosi Pittsburg, iha Estadus Unidus, hela iha Timor-Leste dezde tinan 1966 no iha tinan 1992 nia halo uma rua ba abrigu labarik sira, Topu Honis, iha fatin rua iha enklave Oecusse.

Pajina Topu Honis deskreve uma abrigu ne'e hanesan espasu seguru ba orfaun sira, labarik sira hosi familia kiak, ema boot sira ho defisiénsia no feto sira ne'ebé maka tenta halai hosi abuzu.

Yohanes Suban Gapun, esplika katak kongregasaun ne'e simu iha inisiu tinan 2018 informasaun konabá abuzu sexual sira hosi parte Daschback, no suspensu hosi ninian funsaun sira enkuantu investigasaun ne'e lao hela.

Gapun hatete katak nia rona konversa telefonika ida entre Daschback no ninian superior sira iha Roma no ne'ebé maka nia konfirma suspeita sira ne'e: " 'Ne'e 100% loos' nia hatete. Nia repete ne'e dala hat".

Maski nia suspensu no iha fulan Novembru 2018 laisizadu tiha, tuir relatu sira hosi Catholic News Servisse (CNS), Daschback fila fali ba Oecusse ne'ebé maka nian hela fatin bá.

ho Lusa

 


Comentários

Critério de publicação de comentários