Pájina aktualizada iha 03:46h, kuarta-feira 25 Abril

Prezidente timoroan promulga Orsamentu tinan 2019 maski ho "rezerva"

08 de Fevereiro de 2019, 18:59

Prezidente Republika timoroan desidi promulga Orsamentu Jeral Estadu nian (OJE) ba tinan 2019 hafoin "analize klean" ida ba proposta lei nian no maski ho "rezerva" ba aspetu sira balun dokumentu nian, informa Prezidénsia.


Iha komunikadu, gabinete Francisco Guterres Lu-Olo nian esplika katak nia desidi promulga OJE ne'ebé maka altera no aprovadu hosi parlamentu hafoin vetu dahuluk xefe Estadu nian.

Informasaun ne'ebé detallada liu konabá analize ba testu ne'e, hare mós ho "vizaun ba mediu no badak nian no situasaun atual" sei fó sai iha tempu badak nian laran hosi Prezidente, esplika komunikadu ne'e.

Dekretu ne'ebé asinadu hosi Prezidente Republika, ne'ebé maka konfirma promulgasaun OJE nian, entrega ba Parlamentu Nasional iha lorokraik, oras sira hafoin reuniaun naruk ida ho primeiru-ministru, Taur Matan Ruak.

Desizaun Lu-Olo nian halo iha loron ne'ebé hanesan ne'ebé maka Governu, iha reuniaun estraordinariu, aprova proposta, ne'ebé aprezenta hosi ministra interina Finansas nian, Sara Lobo Brites, konabá valor masimu atu fixa ba fulan Fevereiru nian iha ámbitu rejime duodesimu nian.

Valor ne'e, ho dolares millaun 94,6, inklui mós pagamentu ba emprestimu sira, bele aumenta tan tanba, ofisialmente, ezekutivu iha ona fundus markadu iha OJE tinan 2019 nian.

OJE ba tinan 2019 nian fofoun ne'e veta tiha hosi Prezidente, no fila fali ba Parlamentu Nasional, ne'ebé maka aprova alterasaun sira balun, liu-liu dolares millaun 650 ne'ebé destina ba sosa partisipasaun maioritaria iha konsorsiu Greater Sunrise nian.

Hafoin aprovasaun maioritaria ne'e, Prezidente Republika hatete ba Lusa, iha komentariu kiik ida katak desizaun Parlamentu Nasional nian fó "razaun" ba ninian vetu maibé "la totalmente satisfatoria".

Governu no bankada koligasaun nian konsidera katak hasai dolares millaun 650 hosi OJE ne'e bele halo no sem kompromete operasaun tanba aprovasaun alterasaun ba Lei Atividade Petrolifera (LAP), ne'ebé promulga iha fulan Janeiru ne'e hosi Prezidente, permite pagamentu operasaun sira Greater Sunrise nian diretamente hosi Fundu Petroliferu (FP), la liu hosi OJE.

Grupu ida hosi deputadu sira na'in 23 Fretilin nian no PD nian aprezenta iha loron-kuarta ne'e ba Tribunal Rekursu pedidu fiskalizasaun abstrata ida ba konstitusionalidade ba polemika sira alterasaun ba LAP nian.

Alterasaun ne'e aprova hosi parlamentu, no veta hosi Prezidente, ne'ebé maka kestiona legalidade no konsekuénsia diploma nian, maibé rekonfirma fila fali hosi maioria parlamentar (iha sesaun ida ne'ebé maka Fretilin la partisipa tanba halo protestu", no hafoin ne'e, obrigatoriamente promulga hosi xefe Estadu.

OJE ba tinan 2019 nian ho valor total dolares millaun 1.482.

ho Lusa

 


Comentários

Critério de publicação de comentários