Pájina aktualizada iha 16:38h, kuarta-feira 24 Jullu

Denunsia konabá akumulasaun lixu nian iha Timor-Leste presiza asaun limpeza

08 de Fevereiro de 2019, 21:09

Imajen ba akumulasaun lixu nian iha fatin barak Timor-Leste nian, ne'ebé divulga iha rede sosial sira iha fulan ikus ne'e, bolu atensaun ba debate barak konabá problema ne'e no asaun espontánea ba limpeza sira hosi entidade barak publiku no privada.


Eskola sira, organizasuan relijioza sira, ekipa funsionariu publiku sira no grupu sidadaun sira, halo asaun limpeza iha zona barak kapital Dili, Baucau no iha enclave Oecusse.

Asaun sira ne'e mosu hafoin aumentu ba numeru foto no video sira ne'ebé maka halo poluisaun barak no akumula lixu, liu-liu iha mota nian no iha kosta nasaun ne'e nian.

Ezemplu, iha loron-sesta ne'e, divulga ona imajen balun ekipa funsionariu sira Ministeriu Obras Publika nian ne'ebé halo limpeza jeral iha aredor Ministeriu nian.

Iha loron-kinta ne'e, funsionariu no abitante sira balun zona ne'e nian, hamutuk hodi hamoos zona ponte Noefefan, loron balun hafoin divulga imajen sira ne'ebé maka hatudu lixu barak iha mota ne'e.

Udan boot ne'ebé maka iha zona barak nasaun ne'e agrave tan de'it, iha fulan ikus sira ne'e, problema lixu nian ne'ebé maka afeta Timor-Leste, liu-liu iha kapital Dili.

Falta edukasaun ambiental, mau ábitu iha tratamentu lixu no sistema drenajen ne'ebé ladun di'ak kontribui ba problema ne'ebé maka sae esponensialmente ho dezenvolvimentu ekonomiku no importasaun ne'ebé makas.

Timor-Leste la produz plastiku, maibé supermekadu no loja sira nakonu ho produtu sira ne'ebé maka halo ho plastiku ne'ebé maka soma ho tonelada garafa sira bee nian ne'ebé maka fan lorloron iha sidade.

Normal ona hare loja ka restaurante na'in sira soe foer sira ne'e iha kanal irigasaun nian ka iha mota.

Maski iha barak ona kontentor lixu nian - sei insufisiente nafatin -, iha lokal sira ne'ebé maka ezisti, iha parte barak, sidadaun sira hili, hodi soe lixu iha rai no iha kontentor sira nian sorin, no hafoin ne'e lori ba tasi - liu-liu iha tempu udan ne'e.

Membru ida hosi Movimentu Tasi Mos, Gally Soares Araújo, rekoñese importánsia rede sosial nian iha kombate ba ida ne'e.

"Hare ba metade hosi populasaun sira nu'udar utilizador ativu iha rede sosial, ami sente katak ne'e bele sai hanesan meiu efikaz ida hodi komunika. No komunikasaun ne'e fundamental. Liu-liu tanba ita koalia ba populasaun sira ne'ebé maioritariamente joven no estudante sira, ne'ebé maka halo lixu ho forma inkonsiente", hatete membru asosiasaun ne'e, ne'bé maka hahú iha tinan 2015 ninian asaun sensibilizasaun no protesaun ambiental sira no kampaña dahuluk sira limpeza nian.

Araújo repete mós katak, problema ne'e tenki rezolve ho forma oinseluk, la too de'it asaun limpeza sira, bele importante, maibé se la iha intervensaun hamutuk ho komunidade sira "ne'ebé maka hela besik mota no soe foer ba mota".

"Falta solusaun ne'ebé klaru ne'ebé maka pasa hosi intervensaun ne'ebé efikaz liu hosi parte Governu nian", nia subliña.

Gally Soares Araújo fó ezemplu hanesan falta kaixote lixu nian ka rekolla iregular iha zona sira ne'ebé maka turista nasional no internasional sira frekuenta liu.

"Movimentu sira hanesan ne'e, ho asaun ne'ebé konkreta hosi parte entidade limpeza nian ne'e pozitivu, maibé ha'u hein katak laos ba agora ne'e de'it, tenki sai asaun ida ne'ebé maka presiza medida sira ne'ebé maka konkreta liu", nia afirma.

"La too de'it ba hamoos, tenki iha konsiensia atu labele soe foer ba rai. Presiza serbisu tuir lolos ho lixu no sosiedade sira hotu ne'ebé maka envolve hodi bele iha rezultadu ne'ebé di'ak", nia afirma.

ho Lusa

 


Comentários

Critério de publicação de comentários