Pájina aktualizada iha 12:30h, kuarta-feira 22 Maiu

Xina husu ba Konsellu Seguransa hodi reflete fali kastigu ba Koreia-Norte

02 de Março de 2019, 00:56

Iha loron-sesta ne'e, Xina husu ona ba Konsellu Seguransa ONU nian hodi reflete fali kastigu sira ne'ebé fó ba Pyongyang hodi avansa ho negosiasaun sira ba desnuklearizasaun hosi Koreia-Norte, hafoin simeira entre norte-koreanu ho Estadus Unidus ne'ebé falla.


"Xina fiar katak, tuir rezolusaun pertinente sira ho progresu sira ne'ebé halo iha península, liuliu medida sira ne'ebé oferese hosi Koreia-Norte ba desnuklearizasaun, Konsellu Seguransa tenki konsidera no ko'alia ho dispozisaun hosi Konsellu hodi muda kastigu sira", hatete hosi porta-vós hosi Ministériu Negósiu Estranjeiru Xina nian, Lu Kang.

Prezidente EUA, Donald Trump, ho líder norte-koreanu, Kim Jong-Un, partisipa ona iha reuniaun ida ne'ebé halo entre loron-kuarta ho loron-kinta iha Hanói, iha Vietname, kona-ba desnuklearizasaun hosi península koreanu ho tema sira seluk.

Tuir esplikasaun sira ne'ebé hato'o hosi Trump no hosi nia sekretáriu Estadu, Mike Pompeo, falla hosi simeira akontese tanba líder norte-koreanu oferese sobu sentru investigasaun nuklear iha Yongbyon, ne'ebé halo kombustível ba bomba atómiku sira, hodi bele halakon total kastigu sira.

Tuir ajénsia notísia súl-koreana Yonhap, ministru Negósiu Estranjeiru hosi Koreia-Norte, Ri Yong-ho, la konkorda ho versaun norte-amerikanu durante konferénsia imprensa ida, hodi garanti katak Kim husu de'it atu Washington halakon "kastigu balun" ne'ebé afeta nia ekonomia, hodi bele troka ho sobu Yongbyon.

"Hafoin simeira, ami haree katak parte rua halo ona deklarasaun sira kona-ba halakon kastigu sira. La hanesan, maibé parte rua fiar katak halakon kastigu sira hanesan parte importante hosi desnuklearizasaun no tenki reflete fali", hatete hosi porta-vós hosi diplomasia xineza iha konferénsia imprensa ida.

Nune'e, porta-vós xinés husu ona ba parte envolvidu sira hodi ko'alia kestaun ne'e "ho dalan responsável" no halo esforsu hamutuk hodi bele hetan akordu ida.

Xina, parseiru komersial boot Koreia-Norte nian no tuir tradisaun hanesan nia apoiu polítiku prinsipal, hili ona iha fulan hirak ikus ne'e kastigu todan sira hasoru Pyongyang ne'ebé aprova hosi Konsellu Seguransa ONU nian hodi obriga rejimi norte-koreanu trava nia programa sira hodi dezenvolve arma nuklear sira ho misil sira.

Kona-ba informasaun sira ne'ebé hatudu ba posibilidade ida atu Kim vizita Xina - durante nia viajen bainhira sai hosi Vietname ba Koreia-Norte iha nia komboiu blindadu -, hodi hasoru malu ho Prezidente xinés, Xi Jinping, no informa nia kona-ba rezultadu sira hosi reuniaun ho Trump, Ministériu Negósiu Estranjeiru xinés lakohi ko'alia fali kona-ba asuntu iha loron-sesta ne'e.

Lusa

 


Comentários

Critério de publicação de comentários