Pájina aktualizada iha 07:59h, sabado 18 Agostu

Kardeal hatete katak akordu entre Vatikanu ho Xina sei ajuda Igreja iha nasaun

04 de Março de 2019, 20:56

Prefeitu hosi Kongregasaun ba Evanjelizasaun hosi Povu sira, kardeal Fernando Filoni, afirma iha loron-segunda ne'e, iha Makau, katak "akordu pastoral" entre Vatikanu ho Xina "sei ajuda tebes Igreja" katólika iha nasaun.


Fernando Filoni prezidi ona inaugurasaun ofisial hosi instalasaun foun sira hosi Universidade São José, iha Makau, ne'ebé halibur ona ema na'in 500 resin iha auditóriu hodi asisti misa.

Makau, hanesan mós Hong Kong, hanesan fatin úniku sira iha Xina tomak ne'ebé maka aseita autoridade hosi papa nian.

Bainhira hakotu eventu, kardeial subliña ba jornalista sira katak akordu "sei hanesan di'ak tebes ba Igreja iha futuru no ba mós Xina".

Nia hatete katak "Xina nakloke tebes ona iha komérsiu, iha moris polítika, iha realidade".

"Bainhira ha'u ba Áfrika, ha'u hasoru ema xinés sira iha Áfrika tomak", hatete hosi kardeal, hafoin serimónia bénsaun ba instalasaun sira no misa ida ne'ebé selebra iha auditóriu universidade nian.

Iha portugés, prefeitu hosi Kongregasaun ba Evanjelizasaun Povu nian fó hanoin katak akordu ne'e "la'ós hanesan polítiku, la'ós diplomátiku maibé hanesan pastoral".

Akordu, ne'ebé sei implementa iha tinan rua no ne'ebé hapara antagonizmu ne'ebé dura ona tinan 70 resin entre Pekin ho Vatikanu, sei fó ba Pekin liafuan ida iha nomeasaun bispu sira nian.

Xina ho Vatikanu hakotu ligasaun diplomátiku sira iha 1951, hafoin Pio XII duni tiha bispu sira ne'ebé maka hili hosi Governu xinés.

Hahú momentu ne'ebá maka ema katóliku xinés sira fahe iha igreja rua: Asosiasaun Katólika Patriótiku Xineza ne'ebé aprova hosi Pekin, ho igreja klandestina ne'ebé fiar nafatin ba Vatikanu.

Vatikanu konsidera katak hanesan nia direitu hodi hili bispu sira, hodi bele prezerva susesaun apostóliku ne'ebé mai hosi apóstolu sira Jesus Cristo nian. Xina konsidera ezijénsia hosi Vatikanu hanesan violasaun ida ba soberania.

Tanba konflitu ne'e, rejimi xinés nomeia ona, iha dékada hirak ikus ne'e, bispu oioin lahó akordu hosi papa, balun Vatikanu hasai tiha ona.

Padre sira ne'ebé fiar nafatin ba Vatikanu hetan beibeik perseguisaun ka hetan kaer beibeik.

Francisco, no antes papa Bento XVI, tenta ona halibur igreja rua, no tinan negosiasaun sira hetan ona akordu ida, asina iha fulan-Setembru tinan liubá, ne'ebé inklui rekoñesimentu hosi Vatikanu ba bispu na'in hitu ne'ebé nomeia hosi Pekin, bainhira tenki hadook bispu na'in rua hosi igreja klandestinu.

Testu provizóriu, ne'ebé bele hetan neineik revizaun, "hanesan esperansa ida ba ema tomak", afirma hosi Fernando Filoni.

Kona-ba posibilidade hosi susar sira ne'ebé bele mosu bainhira hahú akordu ne'e, kardeal hato'o ona mensajen ida konfiansa nian: "iha moris iha nafatin susar sira. Mai ita estabelese konfiansa maka'as ida no ne'e sei di'ak tebes ba entendimentu hosi ema tomak nian".

Kona-ba relasaun hosi alunu sira iha interior Xina nian ne'ebé labele estuda iha Universidade katólika São José, kardela hatudu konfiansa atu ne'e bele akontese iha futuru.

"Ne'e pertense ba futuru, maibé ha'u hein katak bele", nia afirma hodi hatutan katak "estrutura universitáriu ne'e bele aproveita hosi ema tomak".

"Kultura labele hetan limite ba ema balun ka ba fatin balun, kultura ne'ebé la nakloke ne'e la'ós hanesan kultura ida", nia konsidera.

Iha Makau, iha loron-sábadu ne'e, kardeal selebra ona eukaristia ida iha Sé Episkopal, iha loron-domingu, no prezidi ona enkontru ida saserdote nian iha fatin ne'ebé hanesan sentru katóliku prinsipal ida iha Ázia.

Antes, Fernando Filona vizita ona Taiwan, illa ne'ebé iha katóliku rihun 300 resin no ne'ebé Igreja Katólika dezenvolve serbisu edukativu, médiku ho solidariedade importante ida, ne'ebé nia prezidi ona iha loron-sesta Kongresu Eukarístiku dahaat Taiwan nian nu'udar reprezentante espesial papa nian.

Tuir Vatican News, Fernando Filoni ko'alia ona kona-ba importánsia hosi obra misionáriu, "importante tebes iha illa Taiwan ne'ebé Igreja hanesan realidade ki'ik ida, maski iha tinan barak evanjelizasaun nian no iha ona obra sosial sira ho edukasional sira ne'ebé konsideradu".

Iha fulan-Dezembru nia klaran, líder Taiwan nian, Tsai Ing-wen, konvida ona papa hodi vizita illa.

Ne'e hanesan konviti datoluk ne'ebé maka Taiwan haruka ba Francisco hodi halo vizita ba illa, ne'ebé iha ema katóliku rihun 300 resin no ne'ebé Igreja katólika dezenvolve serbisu importante iha edukasaun, médiku ho solidariedade.

Maski Vatikanu hanesan aliadu diplomátiku Taiwan nian, sei laiha posibilidade atu Francisco aseita konviti hosi autoridade sira illa ne'e nian, tanba diverjénsia polítika sira entre Taipé ho Pekin, no tanba aproximasaun entre Estadu katóliku ho Xina ne'ebé iha ona asinatura hosi akordu importante sira iha tinan ne'e.

Lusa

 


Comentários

Critério de publicação de comentários