Pájina aktualizada iha 23:13h, segunda-feira 25 Marsu

Sekretáriu-jeral hosi partidu iha Governu iha Timor-Leste seidauk sai hanesan arguidu

14 de Março de 2019, 00:26

Deputadu timoroan Francisco Kalbuadi Lay, ne'ebé hanesan sekretáriu-jeral CNRT nian, forsa prinsipal hosi koligasaun Governu nian, seidauk sai hanesan arguidu iha prosesu ruma, maski hanesan suspeitu iha investigasaun rua, hatete hosi nia advogadu ba Lusa.


"Notifikasaun sira ne'ebé halo antes hatudu katak nia hanesan suspeitu iha prosesu rua, ida iha tinan 2014 tanba partisipasaun ekonómiku iha negósiu no ida seluk, iha tinan 2018, tanba brankeamentu kapital", hatete hosi José Camões.

"Ha'u la hatene loloos prosesu sira ne'e refere ba tinan hira", advogadu hatete no refere katak, to'o agora, Kalbuadi Lay "seidauk hatán iha Ministériu Públiku no mós iha tribunal ida" no seidauk hetan medida koasaun ruma.

José Camões bainhira esplika katak prosesu rua iha hela segredu justisa nian no seidauk hatene tan detalle sira hatete katak prosesu ne'e sei kleur no iha ona notifikasaun dahuluk ba sekretáriu-jeral hosi Congresso Nacional da Reconstrução Timorense (CNRT).

Tanba entendimentu ne'ebé laloos no seidauk klaru, nia hatete, resposta ida hosi Kalbuadi ba notifikasaun ne'e - ne'ebé hatte katak labele marka prezensa iha loron markadu tanba tenki ba estranjeiru hodi halo tratamentu - seidauk to'o iha Ministériu Públiku.

Nia esplika katak ne'e hamosu ona emisaun hosi mandadu hodi kaer ne'ebé nunka iha esplikasaun.

Camões hatete katak númeru daruak CNRT nian, partidu ne'ebé lidera hosi Xanana Gusmão, ba estranjeiru hodi halo tratamentu médiku ho kompromisu sira seluk, fila ba Díli iha loron 23 Fevereiru.

Liutiha loron rua, Kalbuadi Lay asumi fali mandatu nu'udar deputadu hafoin fulan ualu hein simu pose hosi Prezidente timoroan nu'udar ministru Kordenador ba Asuntu Ekonómiku sira.

Desizaun ida ne'ebé hamosu krítika sira hosi opozisaun ne'ebé akuza ona Lay hodi tenta uza Parlamentu Nasional hodi "halai hosi justisa" no "subar iha imunidade", argumentu ne'ebé la simu hosi bankada sira ezekutivu nian.

Advogadu esplika ona katak audisaun ida hosi Lay nian iha Ministériu Públiku marka ona ba loron 27 Marsu oinmai, loron ne'ebé "sei labele kumpri", hodi esplika katak to'o agora nia kliente seidauk simu notifikasaun ruma.

Konfirma mós katak Parlamentu Nasional seidauk simu mós pedidu ruma hosi Ministériu Públiku hodi hasai imunidade hosi deputadu.

Lay nia kazu hamosu daudaun tensaun entre partidu sira hosi Governu ho Justisa, liuliu hafoin Ministériu Públiku hakerek ba prezidente CNRT, Xanana Gusmão, hodi husu autorizasaun hodi bele rona Kalbuadi Lay.

Iha parlamentu, nia esplika ona katak asumi fali funsaun sira tanba "iha lista hosi Aliansa Mudansa ba Progresu (AMP) [koligasaun Governu nian] hanesan "númeru dahaat" ne'ebé maka "hili hosi povu".

Iha esplikasaun badak ida, deputadu hatete ona katak ba iha estranjeiru hodi bele halo intervensaun médika ida no tratamentu sira seluk no afirma ona katak senti "preparadu ho disponível hodi kopera ho justisa no hodi deklara iha Ministériu Públiku".

Kalbuadi Lay esplika katak simu ona notifikasaun dahuluk hodi marka prezensa iha Ministériu Públiku maibé nia hatán hodi esplika katak tenki ba estranjeiru tanba motivu pesoal sira.

"Hafoin ne'e PGR haruka ona karta ida ba prezidente Xanana Gusmão. Ha'u hahú tratamentu hela no iha notifikasaun foun hodi marka prezensa ho mandadu ida hodi kaer", nia hatete.

CNRT akuza nafatin Ministériu Públiku hodi tenta difama líder sira hosi forsa polítika ne'e no viola segredu justisa nian bainhira fó informasaun kona-ba prosesu sira investigasaun nian ba Prezidente Repúblika.

Lusa

 


Comentários

Critério de publicação de comentários