Pájina aktualizada iha 01:26h, domingu 16 Setembru

Banku Sentral Timor-Leste konfirma orden hodi sosa partisipasaun iha Greater Sunrise

14 de Março de 2019, 21:03

Visi-governador hosi Banku Sentral Timor-Leste (BCTL) nian, Venâncio Alves Maria, konfirma ona, iha loron-kinta ne'e, ba Lusa katak entidade simu ona orden hodi prosesa pagamentu hodi sosa partisipasaun sira hosi ConocoPhillips ho Shell iha konsórsiu hosi Greater Sunrise.


"Sim, ha'u bele konfirma katak ami simu orden. Maibé sei hanesan sedu tebes hodi ko'alia kona-ba detalle sira", nia hatete ba Lusa hodi rekuza informa kona-ba karik hala'o ona ka la'e orden ne'e.

"BCTL serbisu ho dalan rigorozu iha nia prosesu sira no hanesan sedu tebes fó detalle sira hotu", nia esplika.

Visi-governador BCTL nian hatet katak "sei informa públiku sira iha momentu loos" kona-ba operasaun ne'ebé Timor-Leste, liuhosi nia petrolíferu Timor Gap, sei sosa ho dolar millaun 650 (euro millaun 574) partisipasaun ida hosi 56,6% iha konsórsiu.

Iha loron-kuarta, ministra interina Finansa nian, Sara Lobo Brites, hatete katak fó ona instrusaun ba BCTL, hanesan jestor operasional hosi Fundu Petrolíferu ba transferénsia hosi millaun 650 hodi sosa partisipasaun.

Brites rekorda katak operasaun ne'e prepara ona hamutuk ho Ministériu Finansa, BCTL ho Timor Gap, hatudu konfiante atu transferénsia "sei akontese iha semana ne'e".

Fundu sira sei sai hosi Fundu Petrolíferu (FP) ne'ebé, iha final fulan-Janeiru, iha saldu ida hamutuk dolar biliaun 16,41.

Tuir esplikasaun hosi Sara Brites, prosedimentu ne'ebé konkorda maka BCTL transfere fundu sira ba Timor Gap ne'ebé sei formaliza pagamentu ba petrolíferu sira Conoco ho Shell.

Ho konkretizasaun hosi negósiu, ne'ebé desidi ona iha tinan liubá ho petrolíferu sira, Timor-Leste sei asumi partisipasaun maioria ida ho 56,6% iha konsórsiu hosi projetu ne'ebé iha mós petrolíferu australianu Woodside, hanesan operadora, ho Osaka Gas.

Iha loron-sesta, iha entrevista ba Lusa, prezidente ho diretor ezekutivu Timor Gap nian, Francisco Monteiro, hatete ona katak Timor-Leste hakarak evita uza Fundu Petrolíferu (FP) hodi selu folin sira hosi kapital (CAPEX) to'o dolar biliaun 12 (euro biliaun 10,6) ba dezenvolvimentu hosi projetu gazodutu ba Timor-Leste no prosesamentu iha kosta-súl.

Hafoin hahú produsaun, hein benefísiu finanseiru ida ne'ebé bele hetan dolar biliaun 28 (euro biliaun 25 resin), esplika hosi responsável.

"Ami nia estimativa konservadora maka katak, pelumenus, biliaun 28 sei tama iha FP hosi Greater Sunrise, la konta ho benefísiu ekonómiku sira seluk hanesan kriasaun serbisu, ne'ebé bele akontese iha Timor-Leste", Monteiro hatete.

Iha senáriu ne'ebé konservador hosi lukru sira, konta sira hosi Timor Gap fiksa iha previzaun katak Greater Sunrise iha rezerva triliaun 4,6 tuir kúbiku sentímetru gás nian no millaun 226 tuir baril petróleu nian ho folin ida dolár 62,5 tuir baril.

Lusa

 


Comentários

Critério de publicação de comentários