Pájina aktualizada iha 18:59h, segunda-feira 22 Jullu

Timor-Leste sei iha ligasaun ho fiu fibra ótika internasional iha tinan 2020

10 de Abril de 2019, 20:39

Primeiru-ministru timoroan, Taur Matan Ruak, afirma iha loron-kuarta ne'e katak nasaun sei fó orsamentu iha tinan 2020 ba konstrusaun hosi ligasaun internasional ida hosi fibra ótika ba nasaun.


"Prosesu ne'e la'o lalais hela no ha'u hein katak sei hakotu serbisu ne'e iha tinan oinmai", Matan Ruak afirma iha Palásiu Governu, iha Díli, ba Lusa.

"Desizaun ne'e sei foti iha Konsellu Ministru sira, maibé ami prepara hela hodi avansa", nia hatete maibé lakohi identifika iha ne'ebé maka sei halo ligasaun internasional.

Nia hatete katak objetivu maka konklui iha tinan ne'e preparativu sira ne'ebé presiza hodi "hahú ho instalasaun hosi fiu iha tinan oinmai", no folin hosi projetu ne'e sei halo parte iha orsamentu iha konta públika tinan 2020.

Xefe Governu ko'alia ba Lusa bainhira hakotu lansamentu hosi projetu fibra ótika rai nian ne'ebé fortalese Governu eletróniku no hakbesik ezekutivu no sidadaun sira iha nasaun tomak.

"Laiha justifikasaun atu Timor la aproveita teknolojia komunikasaun nian ne'ebé avansadu tebes iha mundu. Governu halo ona esforsu boot ida hodi nune'e ohin ita bele lansa ofisialmente inisiativu ne'e", Matan Ruak hatete.

Instalasaun hosi rede hahú ona hamutuk ho konstrusaun hosi rede elétrika nasional ho fiu OPGW ho rede elétriku hamutuk kilómetru 600 resin ne'ebé halo hosi Governu anterior sira.

Fiu sira PPGW (sigla ingleza hosi Overhead Power Ground Wire) hanesan fiu sira hosi rai ne'ebé instala iha liña elétriku sira ho tensaun aas ne'ebé sei introduz fiu sira ho fibra ótika, no ne'ebé sei funsiona hanesan para-raiu no mós ba transmisaun hosi dadus sira no lian nian.

Aumentu hosi projetu fibra ótika rai nian hahú ona iha Governu dahaat bainhira iha tinan 2016 halo ona estimativa dahuluk sira no hahú prosesu konkursu nian, no Governu dahitu, iha tinan tuirmai, asina akordu ida ho Timor Telecom.

Ho folin ida dolar biliaun 1,88 resin, projetu ne'e, iha konkretu, abranje interligasaun hosi rede fibra ótika entre subestasaun sira hosi EDTL (Eletrisidade Timor-Leste nian) ho edifísiu sira hosi administrasaun munisipal nian iha munisípiu hamutuk 12.

Maski hanesan rede interna, kliente sira hosi internet iha Timor-Leste selu kleur ona folin ida "aas tebes" ba serbisu ida ne'ebé ladún iha velosidade tanba Governu timrooan seidauk avansa ho ligasaun internasional ida hosi fiu fibra ótika nian, haktuir hosi operador sira.

Situasaun ne'e, tuir responsável sira hosi Timor Telecom ho Telkomsel, halo Timor-Leste gasta, iha tinan hirak ikus ne'e, dolar millaun 50 (euro millaun 44,5) iha asesu liuhosi satelit, ba serbisu ida ne'ebé karun tebes ho kualidade ne'ebé ladi'ak duké fibra ótika.

Kustu aas hosi ‘input’ – folin ne'ebé maka operador sira sosa internet hodi sira fa'an fali - maski iha konkorénsia iha merkadu, sei ladi'ak maka'as hosi presu no mós kualidade.

Timor-Leste bele hili ba ligasaun ida to'o illa indonézia Alor - "bele hakotu iha fulan tolu no nia folin maka dolar millaun 20 resin" (euro millaun 18) - ka liuhosi fiu ida hosi súl nasaun nian ba parte seluk ne'ebé liuhosi fronteira tasi ho Austrália, iha Tasi Timor.

"Folin sira varia entre millaun 16 no millaun 25 depende hosi fiu ne'e depozita ka hakoi iha tasi okos", esplika hosi fonte hosi área ne'e.

Opsaun seluk, ne'ebé karun liu, maka rekore ba ligasaun direitu ida ba Singapura ne'ebé nia folin "bele to'o millaun 100" (euro millaun 88).

"Folin hosi fiu maka dolar rihun 20 resin (euro rihun 17) tuir kilómetru, tau iha bee laran. No folin sira diminui nafatin", adianta hosi fonte hosi área ne'e.

Fonte ne'e hatete, nasaun la hili fiu maibé depende ba ligasaun hosi satelit ba 03B-CES ne'ebé "kusta ona dezde tinan 2012 ba operador sira osan dolar millaun 50 resin" (euro millaun 44).

Lusa

 


Comentários

Critério de publicação de comentários