Pájina aktualizada iha 03:20h, kuarta-feira 25 Abril

Banku Mundial alerta ba konsentrasaun kiak maka'as iha Áfrika subsarianu

12 de Abril de 2019, 23:05

Prezidente hosi Banku Mundial (BM), David Malpass, alerta ona iha loron-kinta katak, iha tinan 2030, ema na'in sia hosi ema na'in sanulu konsidera hanesan kiak sei moris iha Áfrika, liuliu iha Áfrika subsarianu, ne'ebé iha aumentu maka'as hosi kiak maka'as.


Avizu ne'e halo iha konferénsia imprensa dahuluk hosi David Malpass nu'udar prezidente hosi BM, iha Washington, iha reuniaun sira primavera nian hosi Fundu Monetáriu Internasional (FMI), ne'ebé norte-amerikanu hatete katak iha tinan 2030, ema na'in sia hosi ema na'in sanulu konsidera hanesan kiak tebes sei hela iha Áfrika.

Maski númeru hosi ema sira ne'ebé moris iha kondisaun sira kiak maka'as nian tuun dezde dékada 1990, BM konsidera hanesan preokupante tebes katak maioria hosi ema kiak millaun hitu konsentra liuliu iha kontinente afrikanu.

Iha Áfrika subsarianu lokaliza ona nasaun neen hosi Komunidade Nasaun sira ho Lian Portugeza: Angola, Cabo Verde, Guiné-Bissau, Guiné Ekuatorial, Mosambike ho São Tomé & Prínsipe.

Prezidente hosi BM aviza ona katak akumulasaun hosi tusan sira iha nasaun sira ne'ebé ladún dezenvolvidu hanesan dalan ida hosi nasaun sira ne'e aumenta iha nível ekonomia, dezde prosesu ne'e halo ho dalan transparente.

Mosambike hanesan nasaun ida ne'ebé ho tusan aas tebes, no konsultor oioin kalkula katak tusan públika ultrapasa ona 100% hosi Produtu Internu Brutu, valor ida ne'ebé konsidera la sustentável hosi analista sira.

Estadu mosambikanu agora iha eskándalu ida ho naran "dívida okulta", hafoin asumi tiha empréstimu sira ne'ebé hamosu dúvida ho folin euro biliaun rua iha marjen lei nian, iha kazu korupsaun ida nian.

David Malpass refere ona katak, ba Mosambike, ne'ebé foin lalais ne'e afetadu ho siklone Idai, Banku Mundial serbisu hela iha projetu sira ho programa sira distribuisaun efetivu ba rekursu sira.

Banku Mundial anunsia ona, iha fulan liubá, katak sei finansia Mosambike ho dolar millaun 90 (kuaze euro millaun 80), iha ámbitu hosi programa jestaun ba asidente sira no risku sira (DRM), inklui minimizasaun hosi konsekuénsia sira hosi pasajen siklone Idai nian.

Iha rejiaun kontinente afrikanu nian, aumentu ne'ebé previstu maka menus hosi 1% to'o tinan 2021, nune'e aumentu risku hosi konsentrasaun kiak maka'as nian.

Diminuisaun hosi ekonomia akontese daudaun iha nível global, nune'e hamosu avizu tolu ne'ebé preokupante ba BM: diminuisaun hosi reforma estrutural sira iha ekonomia prinsipal sira, stress finanseiru iha ekonomia boot emerjente sira no aumentu hosi polítika sira ne'ebé laiha serteza, iha nível global.

Lusa

 


Comentários

Critério de publicação de comentários