Pájina aktualizada iha 03:25h, kuarta-feira 22 Agostu

Atentadu sira iha Sri Lanka halo pelumenus ema na'in 257 mate

02 de Maio de 2019, 20:49

Atake sira ne'ebé akontese iha loron-domingu Páskoa iha Sri Lanka halo ona ema na'in 257 mate, haktuir hosi balansu foun ne'ebé fó sai iha loron-kinta ne'e hosi autoridade sira, ne'ebé alerta ona katak númeru sira ne'e bele aumenta.


"Saldu agora maka ema na'in 257 mate", hatete hosi diretor-jeral hosi serbisu saúde nian, Anil Jasinghe, ba ajénsia notísia franseza AFP.

Balansu anterior hosi autoridade singalés sira hatudu ba na'in 253.

"Aumentu ne'e akontese tanba mate sira iha ospital sira. Iha mós parte hosi mate-isin sira, nune'e hamutuk ona na'in 257" maka mate, hatutan hosi Jasinghe.

Sri Lanka anunsia ona iha loron hirak liubá katak identifika ona sidadaun estranjeiru na'in 42 entre vítima mortal sira. Entre ema estranjeiru sira ne'ebé mate iha mós portugés na'in ida ne'ebé hosi Viseu.

Ema estranjeiru sira seluk ne'ebé seidauk hetan no karik bele halo parte iha mate-isin sira ne'ebé seidauk identifika iha morgue iha Colombo, hatete hosi Ministériu Negósiu Estranjeiru iha komunikadu ida ne'ebé publika iha loron-segunda kalan.

Tuir balansu, ema na'in 496 ne'ebé kanek lori ba ospital, na'in 47 sei hetan tratamentu hela (na'in 12 iha kuidadu intensivu nian).

Lusa

 


Comentários

Critério de publicação de comentários