Pájina aktualizada iha 03:56h, tersa-feira 22 Maiu

CPLP diskute proposta sira hodi garanti meiu finanseiru ba Institutu Lian Portugeza nian

03 de Maio de 2019, 21:01

Embaixador Cabo Verde nian iha Lisboa hatete iha loron-kinta ne'e ba Lusa katak Estadu-membru sira hosi Komunidade hosi Nasaun sira Lian Portugeza nian (CPLP) ko'alia hela proposta sira hodi garanti meiu finanseiru ba Institutu Internasional Lian Portugeza nian (IILP).


"Kestaun [hosi problema finanseiru] IILP nian ko'alia tiha ona iha reuniaun balun hosi komité konsertasaun permanente no loos duni ami sei debate fali, durante tinan ne'e nia laran, ha'u la hatene karik antes Konsellu Ministru sira Negósiu Estranjeiru nian, iha fulan-Jullu", afirma hosi Eurico Monteiro, ne'ebé hanesan mós reprezentante iha Lisboa hosi prezidénsia kabu-verdianu nian iha CPLP, ne'ebé hanesan rotativu.

"Saida maka ha'u hatene maka iha nafatin preokupasaun ida hosi Estadu-membru sira ho kestaun sira hosi orden organizativu, institusional ho finanseiru, hodi garanti kontribuisaun sira ba IILP", nia hatutan.

Ba embaixador Cabo Verde nian iha Portugal, iha nível rua problema nian: ida uluk maka esforsu ne'ebé maka Estadu-membru ida-idak tenki halo hodi kumpri pagamentu hosi sira nia kontribuisaun, tanba, bainhira sira kumpri, nesesidade finanseiru sira IILP nian sei diminui "maka'as", nia esplika.

Ida seluk, halo parte adisional, ne'ebé "hatene saida maka bele halo liután hodi mobiliza tan rekursu sira", ba entidade ne'e, nia esklarese.

"Ami agora hakarak maka asegura mekanizmu sira ne'ebé garanti atu Estadu sira kumpri ho sira nia obrigasaun kona-ba IILP", hatutan hosi Eurico Monteiro.

IILP konsidera ona hosi partisipante oioin iha semináriu kona-ba "Importánsia hosi Lian Portugeza ba Jerasaun Futuru sira", ne'ebé halo iha Lisboa, hanesan dalan sentral ida hodi promove lian no aumenta ensinu portugés.

Tuir Eurico Monteiro, Cabo Verde "kumpri ona parte ida hosi nia obrigasaun sira, suporta reforma hosi instalasaun sira IILP nian", ne'ebé iha sede iha teritóriu kabu-verdianu.

Agora, "aleinde dilijénsia habitual sira iha hodi kumpri obrigasaun sira ne'e, halo mós apelu sira insistente liu, forte ho firmi liu, hodi nune'e Estadu sira bele kumpri, halo mós reuniaun espesífiku sira kona-ba situasaun IILP nian", refere hosi diplomata.

"Iha sujestaun ho proposta oioin ne'ebé maka halo hosi Estadu-membru sira no iha ona asaun balun ne'ebé bele adopta" hodi asegura kapasidade finanseiru IILP nian, nia hatete no hatutan: "Hanesan proposta ne'ebé ha'u la hatene sei iha posibilidade hodi ko'alia antes Jullu, tanba hanesan asaun sira ne'ebé tenki konserta antes ho Diresaun IILP nian no tenki konserta entre Estadu-membru sira".

Diretor ezekutivu IILP nian, Incanha Intumbo, orador sira seluk hosi semináriu, ko'alia ona kona-ba importánsia ne'ebé lian portugeza iha ba koñesimentu hosi Istória, "tanba iha sékulu barak Istória nian iha pontu oioin iha mundu no hos nasaun sira ne'ebé maka bazeia iha dokumentu sira ne'ebé hakerek iha lian portugeza".

Iha mundu global ho internasionalizasaun, koñesimentu ne'e iha liután relevánsia, nune'e mós portugés hanesan lian negósiu nian, konsidera ona hosi Incanha Intumbo, refere katak maski iha nasaun sira Áfrika nian ho tradisaun la'ós portugeza, hanesan frankófonu Senegal, adezaun ba ensinu lian portugeza aumenta ona. Iha Senegal, ohin loron, iha ona alunu portugés nian hamutuk rihun 40.

"Nune'e, ita nia lian iha futuru no bainhira ita la serbisu ba nia dezenvolvimentu, jerasaun futuru sira sei reklama ba ita", afirma hosi diretor ezekutivu IILP nian.

Aleinde Cabo verde, Angola, Brazil, Guiné-Bissau, Guiné Ekuatorial, Mosambike, Portugal, São Tomé & Prínsipe ho Timor-Leste halo mós parte iha CPLP.

Lusa

 


Comentários

Critério de publicação de comentários