Pájina aktualizada iha 04:34h, tersa-feira 22 Maiu

Parlamentu timoroan rekorda tinan 20 ba akordu luzu-indonéziu ne'ebé permiti referendu

06 de Maio de 2019, 22:41

Parlamentu Nasional timoroan aprova ona iha loron-segunda ne'e ho unanimidade votu ida kongratulasaun nian ba tinan 20 hosi asinatura istóriku hosi akordu entre Portugal ho Indonézia ne'ebé permiti ona hala'o, iha tinan 1999, referendu ba autodeterminasaun iha Timor-Leste.


"Asinatura hosi akordu loron 05 Maiu ne'e hanesan marka importante ida iha ita nia istória no simboliza eskolla hosi dalan liberdade no dame nian, demokrasia ho dezenvolvimentu nian, ne'ebé ita nia povu halo durante tinan barak hosi luta ba independénsia", refere hosi votu ne'ebé aprovadu.

Aleinde hanoin hikas komemorasaun tinan 20 ba akontesimentu Nova Iorke nian, votu "fó homenajen ba ema timoroan tomak ne'ebé luta ona hodi nune'e mehi ba Timor-Leste independente bele sai hanesan realidade ida no ba povu belun tomak ne'ebé apoia ona kauza autodeterminasaun nian", refere.

Testu ne'e hato'o hosi elementu sira hosi bankada tomak no aprova ona ho unanimidade hosi deputadu sira ne'ebé marka prezensa iha sesaun plenáriu iha loron-segunda ne'e.

Akordu loron 05 Maiu mosu hafoin iha fulan-Janeiru 1999, no ba dala uluk, Governu indonézia, lidera hosi susesor Suharto nian iha Prezidénsia, Habibie, anunsia katak ema timoroan sira bele hili kona-ba nia futuru.

Negosiasaun sira entre Portugal ho Indonézia aumenta no nasaun rua konsege hetan, iha loron 05 Maiu 1999, ho protesaun hosi ONU, akordu "ko'alia kona-ba Kestaun Timor-Leste nian".

Testu, asina hosi xefe sira diplomasia Portugal ho Indonézia nian, Jaime Gama ho Ali Alatas, ho protesaun hosi sekretáriu-jeral Kofi Annan, permiti ona hodi hala'o konsulta popular ida ne'ebé maka ema timoroan sira hili entre autonomia iha Indonézia ka independénsia.

Akordu ne'e asina duni iha tuku 16:05 iha Nova Iorke (tuku 21:05 - oras Lisboa nian no tuku 04:05, loron 06 Maiu, oras Díli nian).

Liutiha loron rua, Konsellu Seguransa ONU nian aprova ona ho unanimidade rezolusaun ida ne'ebé determina hodi haruka misaun ida ba Timor-Leste, hodi organizasaun no superviziona votasaun ne'ebé maka ema timoroan sira sei desidi kona-ba estatutu polítiku hosi teritóriu.

Iha rezolusaun, Konsellu Seguransa salienta responsabilidade hosi Governu Jakarta nian hodi promove seguransa hosi elementu sira ONU nian ho observador internasional sira ne'ebé to'o iha Timor-Leste, hodi mantén klima ida dame ho estabilidade ne'ebé permiti halo konsulta ida iha "atmosfera ida livre hosi intimidasaun sira, violénsia ho interferénsia sira hosi orden ruma".

Iha deklarasaun sira hafoin asinatura, ne'ebé bele haree emosaun, Jaime Gama hatete katak "ideia justu sira mosu duni", hodi rekorda prosesu negosial naruk ho Indonézia, ne'ebé hahú iha tinan 1983 maibé halo hikas fali iha tinan 1992.

Inisialmente, konsulta ne'e marka ba loron 08 Agostu maibé adia tiha tanba situasaun seguransa iha nasaun.

Ministru Ali Alatas destaka ona "importánsia hosi loron" asinatura akordu nian, ne'ebé sei "promove solusaun hosi kestaun antigu ida" no ne'ebé nia rekoñese ona "hamosu terus naruk ida hosi povu timoroan".

"Akordu ne'e loke odamatan sira ba solusaun" hosi kestaun timoroan nian, afirma hosi xefe diplomasia indonéziu ne'ebé felisita mós postura hosi Kofi Annan bainhira afirma katak "lahó intervensaun hosi sekretáriu jeral ONU nian" rezolusaun hosi diferendu kona-ba Timor-Leste "sei la hetan pontu ne'e iha momentu ne'e".

Bainhira hanoin hikas momentu sira ne'e, Lídia Martins, hosi Fretilin (deputada ida ne'ebé hanesan proponente hosi votu loron-segunda ne'e), hatete katak votu hakarak asinala "esforsu ne'ebé halo hosi ONU, Portugal ho Indonézia ne'ebé fó ona ba Timor-Leste oportunidade hodi desidi kona-ba futuru liberdade ho dame" iha nasaun.

"Loron ne'e hanesan istóriku tebes ba Timor-Leste. Tenki komemora", nia afirma.

António da Conceição (PD) hamutuk mós ba votu saudasaun, hodi agradese "ba ONU ba konsisténsia fó ba Timor-Leste" no liuliu "ba diplomasia Portugal nian ne'ebé bele lori ba oin Timor-Leste nia problema to'o asinatura hosi akordu loron 05 Maiu".

Duarte Nunes (CNRT) subliña ona faktu hosi akordu loron 05 Maiu hanesan importante iha prosesu "hodi fó ba povu oportunidade hodi desidi nia destinu" no, tanba ne'e, tenki subliña ho asinala iha istória nasaun nian.

"Hanesan determinante iha istória hosi ami nia libertasaun nasional. Lahó nia, ami ohin loron sei laiha ne'e", hatutan hosi Francisco Branco (Fretilin), hodi rekorda katak permiti afirma fali, iha loron 30 Agostu 1999, vontade independénsia nian ne'ebé deklara iha 1975.

Branco hakarak hanoin hikas knaar CPLP nian "durante libertasaun nasional" Timor-Leste nian no, liuliu, Portugal nia serbisu ne'ebé mantén Timor-Leste iha nia konstituisaun, hodi loke dalan ba akordu.

"Karik lahó artigu iha konstituisaun, Timor-Leste sei laiha oportunidade istóriku ne'e", nia hatete.

Lusa

 


Comentários

Critério de publicação de comentários