Pájina aktualizada iha 03:54h, tersa-feira 22 Maiu

Prezidente Repúblika husu tan kualidade ba media timoroan sira hodi reforsa demokrasia

10 de Maio de 2019, 21:45

Prezidente Repúblika, Francisco Guterres Lu-Olo, defende iha loron-sesta ne'e reforsu ida hosi kualidade komunikasaun sosial nian iha Timor-Leste, hodi prezerva imprensa ida responsável ho livre, kondisaun importante sira hodi fortalese demokrasia nasaun nian.


"Kondisaun fundamental ida hosi demokrasia ida maka liberdade espresaun no ezisténsia hosi imprensa ida responsável ho livre", Lu-Olo hatete iha diskursu ida iha Díli.

"Kualidade hosi informasaun ne'ebé fó hanesan rekizitu fundamental ida ba sosiedade ida ne'ebé konstitui hosi sidadaun responsável sira. Falta hosi kualidade no kredibilidade informasaun nian bele halo sidadaun sira foti desizaun sira ne'ebé la loos, ne'ebé laiha kualidade kona-ba lia loos no seguransa", nia hatete.

Lu-Olo ko'alia iha sesaun enseramentu hosi Díli Dialogue Fórum, iha Díli, ne'ebé organiza hosi Konsellu Imprensa kona-ba dezafiu sira ne'ebé rede sosial sira hamosu ba jornalizmu atualidade nian.

Kona-ba tema ne'e, Lu-Olo hatete katak dezafiu boot ida hodi hala'o jornalizmu maka aumentu hosi rede sosial sira no "fenómenu preokupante hosi fake news".

"Sosiedade ida tenki moris hamutuk liuhosi asesu ba informasaun loloos sira. Bosok estraga valor sira ho prinsípiu sira hosi demokrasia no liberdade nian! Iha fundu, hanesan lia-loos maka liberta mane sira ho feto sira no transforma sira nu'udar sidadaun responsável sira iha benefísiu ba nia nasaun. Dalan di'ak ba bosok maka konsiénsia hosi sidadaun ida-idak", nia afirma.

Lu-Olo konsidera ona katak "liberdade imprensa hanesan baze fundamental hosi rejimi demokrátiku ruma" no "kualidade hosi demokrasia ida iha baze hosi responsabilidade no maturidade hosi profisional sira hosi komunikasaun sosial nian".

Nia rekorda katak Timor-Leste iha "esperiénsia moris barak hosi rejimi totalitáriu ida, durante tinan 24 nia laran hosi okupasaun indonézia", no jornalista sira nia papel hanesan importante ba luta ba independénsia.

Lu-Olo rekorda ona jornalista australianu na'in lima ne'ebé mate iha Balibo iha tinan 1975, timoroan Borja da Costa ho Roges East ne'ebé maka mate iha Díli iha tinan 1975, Kamal Bamadhaj ne'ebé mate iha masakre Santa Cruz iha tinan 1991 no Sander Thoenes ho Agus Mulyawan iha tinan 1999.

Nia destaka mós jornalista portugés sira, inklui hosi Lusa, ne'ebé akompaña ona períudu hosi okupasaun iha Timor-Leste no ne'ebé "fó ona nia kontributu ba prosesu libertasaun" nasaun nian.

Durante enkontru, Lu-Olo konfere ona ba jornalista portugés Adelino Gomes kondekorasaun ida hosi Konsellu Imprensa hodi rekoñese nia papel iha kobertura Timor-Leste nian durante okupasaun indonéziu nian.

Hanoin mós, iha tinan ne'e, entrega hosi Prémiu foun hosi Jornalizmu Adelino Gomes, maibé júri la identifika serbisu ida ne'ebé maka kumpri kritériu sira ezijénsia nian.

"Sai nu'udar jornalista hanesan priviléjiu ida. Jornalista sira tenki agradese ba sosiedade, no dalan di'ak hodi agradese maka halo liután jornalizmu ida livre liu no responsável liu ne'ebé maka aspira nafatin ba exelénsia", hatete hosi Adelino Gomes iha intervensaun ida iha enkontru.

Lusa

 


Comentários

Critério de publicação de comentários