Pájina aktualizada iha 03:54h, tersa-feira 22 Maiu

Xina aviza katak sei luta to'o final iha funu komersial ho Estadus Unidus

14 de Maio de 2019, 23:22

Iha loron-tersa ne'e, Xina hatete katak nia kapasidade no vontade hodi defende labele haree hanesan laiha kualidade no resalta ona katak, maski lakohi funu komersial ida ho Estadus Unidus, "la senti hakfodak" no "sei luta to'o fin".


Portavós hosi ministériu xinés hosi Negósiu Estranjeiru, Geng Shuang, justifika ona aumentu hosi taxa alfandegáriu sira kona-ba ekivalente hosi dolar biliaun 60 hosi sasán sira ne'ebé importadu hosi Estadus Unidus hanesan vingansa, hasoru taxa sira ne'ebé maka halo antes hosi Prezidente norte-amerikanu, Donald Trump.

"La hanesan ho EUA, ami mantén kompostura, ami hakarak serbisu nafatin no hetan solusaun ida, ne'ebé sei permiti asina akordu ida ne'ebé benéfiku", nia afirma.

"Ami nia atitude hanesan konstrutivu, maibé ema ruma subestima ona ami nia kapasidade ne'ebé ami uza hodi defende no tenta halo konfuzaun ba opiniaun públika", nia hatutan.

Geng kritika mós "presaun máximu" ne'ebé halo hosi Washington, ne'ebé iha loron-sesta liubá hahú halo taxa alfandegáriu sira 25% kona-ba ekivalente dolar biliaun 200 hosi sasán sira ne'ebé importa hosi Xina.

"Ami akonsella ba EUA hodi rona reasaun hosi komunidade internasional, rona lian sira hosi área oioin no kalkula lakon ho lukru sira" ne'ebé mosu hosi "nia asaun unilateral sira", hodi "fila ba dalan loos", ne'ebé maka "serbisu" hamutuk no "hetan konsensu" ida ne'ebé "fasilita" akordu ida.

Porta-vós, ne'ebé iha semana liubá lakohi komenta desizaun Trump nian, rekuza mós akuzasaun sira hosi Prezidente norte-amerikanu ne'ebé hatete katak Xina hakiduk ho kompromisu sira ne'ebé halo antes, durante negosiasaun sira.

"Hanesan normal iha diferensa sira no ne'e hanesan razaun hodi ami bele kontinua konversa", nia hatete.

"Oinsá bele akuza ema ida hodi la halo tuir promesa ida bainhira laiha akordu asinadu ida?", nia kestiona.

"Bainhira ema ruma halo ne'e hosi EUA. Hafoin hetan tiha konsensu oioin, hosi parte amerikanu maka aumenta ona nia ezijénsia sira", nia argumenta.

Tuir porta-vós, Xina "fó onra nafatin ba nia liafuan no hatudu vontade di'ak ho boa-fé".

"Xina lakohi funu komersial ida maibé la tauk no, bainhira ema ruma dezafia ami, ami sei luta to'o fin", nia asegura.

Hatán kona-ba presu ne'ebé halo hosi Trump sei afeta ekonomia xineza, Geng lembra ona katak ambiente emprezarial xinés "di'ak nafatin iha tinan 40 ikus ne'e".

Pekin "hakarak kria ambiente negósiu ida ne'ebé estável liu, transparente, justu ho previzível ba empreza estranjeiru sira no kotnribui ba rejimi ida komérsiu justu nian no ba kresimentu global", nia hatete.

Hahú hosi veraun liubá, governu hosi ekonomia boot rua iha mundu hahú ona taxa alfandegáriu sira ba dolar biliaun atus resin hosi esportasaun hosi nasaun ida-idak nian.

Iha fulan-Dezembru liubá, Washington ho Pekin hetan ona akordu ba períudu trégua nian maibé prolonga ona to'o fulan-Marsu.

Maibé, prezidente norte-amerikanu, Donald Trump, anunsia ona iha loron-domingu liubá katak EUA sei aumenta taxa alfandegáriu sira, hodi akuza ema xinés sira hodi hakiduk iha kompromisu sira ne'ebé halo ona antes.

Iha sentru hosi konflitu maka iha polítika hosi Pekin ba área teknolójiku, ne'ebé hakarak muda firma estatal sira nasaun nian iha atór global sira iha área sira ho valor agragadu aas, hanesan intelijénsia artifisial, enerjia renovável, robótiku ho karreta elétriku sira.

EUA konsidera katak planu ne'e, impulsiona hosi Estadu xinés, viola kompromisu sira Xina nian hodi loke nia merkadu, liuliu obriga empreza estranjeiru sira hodi transfere teknolojia no bainhira atribui subsídiu sira ba empreza doméstika sira, bainhira sira proteje hosi kompetisaun estranjeiru.

Lusa

 


Comentários

Critério de publicação de comentários