Pájina aktualizada iha 21:55h, kuarta-feira 20 Novembru

Timor-Leste hasoru dezafiu sira, inklui pobreza, ne'ebé hanesan risku ba estabilidade

20 de Maio de 2019, 21:21

Timor-Leste hasoru nafatin dezafiu boot sira ne'ebé bele hamosu risku iha estabilidade nasaun nian, ho ema timoroan barak, inklui kuaze metade hosi labarik sira, sei moris iha situasaun pobreza ho mizéria, hatete hosi Prezidente timoroan iha loron-segunda ne'e.


"Futuru hosi nasaun ne'e komprometidu hela bainhira 46% hosi ita nia labarik sira ne'ebé seidauk to'o tinan 14 moris iha pobreza nia okos", afirma hosi Francisco Guterres Lu-Olo iha komemorasaun ofisial sira ba tinan 17 ba restaurasaun independénsia nian.

"Produsaun, produtividade ho kualidade alimentar sai aat nafatin. Taxa dezempregu kontinua aas iha ita nia nasaun no maioria hosi ita nia joven sira buka serbisu iha estranjeiru", nia hatete.

Lu-Olo ko'alia iha komemorasaun ofisial sira ba aniversáriu dala 17 hosi restaurasaun independénsia Timor-Leste nian, ne'ebé akontese iha loron-segunda ne'e iha Palásiu Prezidensial iha Dìli no ne'ebé marka prezensa hosi dignidade prinsipal sira Estadu nian.

Iha diskursu ida ho alerta oioin kona-ba futura estabilidade nasional, Lu-Olo refere ona ba problema hosi falta hahán sira, hosi oportunidade serbisu nian, ba bee no eletrisidade, ka falta asesu ba serbisu sira saúde ho tratamentu médiku nian, ne'ebé "bele hanesan fator hosi risku ba dame sosial ho estabilidade".

Nia hatete katak atu ultrapsa dezafiu sira ne'e presiza iha "diálogu abertu, ho partisipasaun ativu hosi sidadaun sira", buka "estabelese konsensu sira ho identifika solusaun adekuadu sira ba problema sira nasaun nian".

Lu-Olo ko'alia fali kona-ba tema diversifikasaun ekonómiku nian, liuliu aposta iha aumentu apoiu ba área agríkola, empregador boot iha Timor-Leste, ne'ebé "60% resin hosi populasaun" depende hosi área ne'e.

"Aleinde nia knaar hodi hamenus pobreza no hamlaha iha nasaun barak, agrikultura hanesan baze ba dezenvolvimentu hosi área sira seluk no kontribui maka'as ba konservasaun hosi biodiversidade nian", nia hatete.

Xefe Estadu refere ona liuliu ba kafé, ne'ebé nia produsaun depende liu hosi família rihun 38 resin, reprezenta rendimentu anual ida hosi área ne'ebé ultrapasa dolar millaun 22, ho produtividade ida ki'ik ne'ebé maka bele aumenta.

"Ha'u hakarak husik apelu ida ba Governu, hodi reforsa esforsu sira iha sentidu insentiva produtor nasional ki'ik sira hodi aumenta produtividade hodi nune'e ita bele hamenus importasaun hosi hahán sira", nia hatete.

"Ita labele haluha katak, bainhira ita importa, ita hasai osan hosi Tasi Mane hodi "halo nia mout" iha Tasi Feto", nia hatete hodi refere ba tasi hosi súl, ne'ebé mai hosi reseita petrolíferu sira no ba tasi norte ne'ebé maka hanesan fatin ne'ebé to'o importasaun sira.

Lu-Olo apela mós atu Governu esforsa hodi investe Fundu Petrolíferu hosi nasaun ho dalan sustentável liu, aselera "reforma sira ne'ebé bele otimiza no impulsiona kompetividade no estimula potensial hosi kresimentu no kapasidade hosi ekonomia hodi hatán hasoru xoke ida".

Nia hatete katak ezekutivu sira tenki serbisu liuliu hodi kria "ambiente jeral ida hosi negósiu sira ne'ebé fasilita investimentu no atividade komersial sira iha ita nia nasaun", ho reforma sira ne'ebé haree mós iha merkadu serbisu nian no tributasuan nian.

Iha komemorasaun sira loron ohin nian, Prezidente kondekora veteranu sira hosi luta hasoru okupasaun indonéziu na'in 10 ho Kolar Orden Timor-Leste nian no na'in 15 ho Medalla Orden hosi Timor-Leste, na'in 15 simu ho títulu hafoin mate nian.

"Veteranu sira ne'e husik buat hotu. Husik ona sira nia uma, sira nia moris di'ak, sira nia família, hodi kumpri mehi koletivu ida", nia afirma.

Ho tema "Reforsa Unidade ho Garanti Estabilidade ba Dezenvolvimentu Nasional", komemorasaun sira iha tinan ne'e serve, haktuir hosi xefe Estadu, hodi asinala importánsia hosi unidade, dame ho estabilidade ba dezenvolvimentu nasional.

"Ita hatene katak presiza reforsa unidade hodi ita garanti estabilidade no, nune'e, ita kontinua dezenvolve ita nia nasaun. Maibé, unidade ne'e tenki iha baze iha regra sira, prinsípiu sira ho valor sira. Unidade ida reforsadu hosi prinsípiu inkluzaun nian, ne'ebé laiha ema ida maka hanesan exkluidu", nia afirma.

Xefe Estadu rekorda "legadu hosi valor sira no prinsípiu sira ne'ebé aman sira hosi Nasaun ne'e husik ona" no ne'ebé ohin loron tenki defende "hanesan heransa ba jerasaun futuru sira".

No nia relembra katak "grupu ki'ik hosi nasionalista informal sira ne'ebé lidera hosi saudozu Prezidente Nicolau Lobato, antes lakon hosi rejimi Salazar nian iha loron 25 Abril 1074 iha Portugal" ne'ebé maka hahú promove "konsiénsia nasional" ne'ebé halo hetan independénsia nasaun nian ne'ebé maka restauradu iha tinan 17 liubá.

Prosesu ida ne'ebé hahú hosi rekoñese "patrimóniu kultural ne'ebé halibur" ema timoroan sira ho nia "identidade rasik, sabedoria ho forsa", iha kuadru ida hosi luta hasoru kolonializmu no ohin loron permiti konsolida nasaun.

Lusa

 


Comentários

Critério de publicação de comentários