Pájina aktualizada iha 21:53h, kuarta-feira 20 Novembru

Ramos-Horta: Debate kona-ba difamasaun iha rede sosial sira iha Timor-Leste eziji prudénsia

24 de Maio de 2019, 20:28

Eis-Prezidente timoroan José Ramos-Horta defende ona, iha loron-sesta ne'e, katak líder polítiku sira tenki halo atuasaun ho kuidadu no ekilíbriu hodi garanti medida sira kontra difamasaun ho insultu sira iha rede sosial sira no media tradisional sira hodi la hamosu risku ba liberdade espresaun.


"Tenki iha reflesaun ho prudénsia loloos hodi nune'e kombate hasoru bosok, hasoru difamasaun gratuitu, sei la sai hanesan deskulpa ho instrumentu hodi nune'e hamenus liberdade imprensa no espresaun nian", afirma hosi eis-xefe Estadu iha deklarasaun sira ba Lusa.

Troka insultu sira, haree liuliu ba Prezidente Repúblika, Francisco Guterres Lu-Olo, hosi parte seluk, no eis-Prezidente ho líder hosi partidu boot koligasaun Governu nian, CNRT, Xanana Gusmão, hamosu fali debate kona-ba insultu sira iha rede sosial sira iha Timor-Leste.

"Ha'u hanoin katak presiza hasoru impaktu triste hosi rede sosial sira iha sosiedade", afirma hosi Ramos-Horta. "Hanesan ema sira ne'ebé uza rede sosial sira, maibé debate iha ne'e akontese tanba iha grupu sira ne'ebé uza online, partidu polítiku sira ne'ebé uza rede sosial sira hodi halo difamasaun ba xefe Estadu, insultu oioin sira", nia hatete.

Kazu ida ne'ebé foin lalais akontese maka insultu sira ne'ebé publika iha pájina pesoal hosi Sabino Guntur, deputadu hosi Partidu Libertasaun Popular (PLP) - partidu ida hosi partidu koligasaun Governu nian - ho insultu sira hasoru xefe Estadu.

"Post" motiva ona karta ida hosi Lu-Olo ba prezidente Parlamentu hodi hatudu preokupasaun ho asuntu.

Ba Ramos-Horta, debate ne'e iha Timor-Leste la akontese izoladu ho debate sira seluk, "ne'ebé akontese oituan iha mundu tomak, tanba uzu maka'as hosi rede sosial sira iha difamasaun, bosok, hodi hamosu violénsia, diskriminasaun rasial xenofobizmu".

Afirma katak iha "Timor-Leste debate ne'e mosu liuliu tanba rede sosial sira", maibé akontese mós iha media tradisional sira, Ramos-Horta hatete katak polítiku sira iha "responsabilidade espesial" tanba iha obrigasaun hodi "promove toleránsia, konvivénsia ho respeitu" iha sosiedade.

"Kona-ba polítiku sira rasik tenki iha lei, balun instrumentu legal sira ne'ebé presiza responsabilidade no iha konsekuénsia sira. Deputadu sira labele subar iha imunidade hodi halo buat hotu", nia afirma.

"Parlamentu la'ós hodi halo atake ho akuzasaun falsu sira", nia hatete.

Kombate hasoru krimi hanesan ne'e hetan susar tanba falta sira iha lei, liuliu kona-ba aspetu sira hanesan difamasaun, direitu ba privasidade, prezunsaun inosénsia nian, violasaun hosi segredu justisa nian no étika no deontolojia jornalístiku nian, maibé iha tinan ida resin liubá polísia kaer ona ema balun hodi halo interogatóriu tanba deskonfia insultu sira ho ameasa sira iha Facebook.

Ho kuaze 1/3 hosi populasaun nasaun nian hanesan utilizador Facebook, haktuir hosi informasaun hosi organizasaun Timor Social, rede sosial, ba ema barak, hanesan fonte únika informasaun nian.

Lusa

 


Comentários

Critério de publicação de comentários