Pájina aktualizada iha 16:04h, sesta-feira 23 Agostu

Primeiru-ministru Guiné Ekuatorial nian simu misaun hosi CPLP

05 de Junho de 2019, 21:44

Primeiru-ministru ho ministru hosi Relasaun Esterior ho Koperasaun Guiné Ekuatorial nian sei hasoru malu ho misaun avaliasaun hosi Komunidade Nasaun sira Lian Portugeza (CPLP) nian ne'ebé maka hahú, iha loron-kuarta, ne'e vizita ida ba nasaun ne'e.


Tuir programa foun ne'ebé maka Lusa iha asesu iha loron-kuarta ne'e, primeiru-ministru Guiné Ekuatorial nian, Francisco Pascual Obama Asue, hasoru malu ho responsável sira hosi misaun CPLP nian iha loron ikus vizita nian iha nasaun, 07 Juñu.

Ministru Relasaun Esterior sira ho Koperasaun Guiné Ekuatorial nian, Simeón Oyono Esono Angüe, sei simu iha audiénsia xefe misaun CPLP nian, embaixador José Luís Monteiro, hosi Cabo Verde, nasaun ne'ebé agora daudaun kaer prezidénsia rotativu hosi organizasaun, iha loron 06 Juñu dadeer.

Vizita hosi misaun CPLP nian hakarak "avalia dezenvolvimentu sira ne'ebé rejista" dezde adezaun hosi nasaun ne'e ba organizamu, iha tinan 2014, no hanesan ba dala uluk maka halo vizita ne'e.

Misaun Akompañamentu hosi Programa Adezaun Guiné Ekuatorial nian ba CPLP sei xefia hosi embaixador Cabo Verde nian, José Luís Monteiro, no sei iha membru na'in 17, inklui reprezentante sira ne'ebé indikadu hosi Estadu-membru sira CPLP nian, hosi Sekretariadu Ezekutivu hosi Komunidade no hosi Institutu Internasional Lian Portugeza (IILP) nian.

"Ami iha ekipa di'ak ida, hosi área oioin, ho esperiénsia maka'as, ho nível ne'ebé aas tebes, nune'e ami nia espetativa hanesan aas tebes hodi koñese ho di'ak situasaun", hatete hosi embaixador Cabo Verde nian iha Portugal, Eurico Monteiro, ne'ebé hanesan mós reprezentante hosi prezidénsia kabu-verdianu hosi CPLP nian iha Lisboa, ba ajénsia Lusa.

Diplomata asegura katak "iha loloos duni" abertura hosi Guiné Ekuatorial hodi konkretiza programa, tanba ne'e Eurico Monteiro hatete katak iha "esperansa" atu konkluzaun sira hosi misaun sei hanesan pozitivu.

Programa misaun nian sei haree ba "reuniaun plenáriu sira ho autoridade ekuato-guiniense sira ho enkontru setorial sira" iha liña sira ne'ebé defini iha programa hosi adezaun nasaun nian ba komunidade.

Kona-ba nia entrada iha CPLP, Guiné Ekuatorial kompromete hodi dezenvolve temátiku lima: divulgasaun lian portugeza, akollimentu ho implementasaun hosi aservu komunitáriu, reabilitasaun hosi memória istóriku ho kultural, komunikasaun institusional ho promosaun ho integrasaun hosi sosiedade sivil.

Aleinde ne'e, misaun sei hasoru malu ho reprezentante sira hosi Ministériu sira hosi Asuntu Esterior sira ho Koperasaun, Justisa, Kultura, Edukasaun ho Direitu Ema nian, no ho reprezentante sira hosi Kbiit Judisiáriu ho Lejislativu Guiné Ekuatorial nian.

Maibé sei simu mós iha Kámara sira Deputadu nian, iha Senadu no iha Provedoria Justisa Guiné Ekuatorial nian.

Konkluzaun sira hosi misaun sei haktuir iha relatóriu final ida ne'ebé sei aprezenta ba Komité Konsertasaun Permanente no, iha faze futuru, sei haruka ba reuniaun foun hosi Konsellu Ministru sira CPLP nian.

Reuniaun foun hosi Konsellu Ministru sira CPLP nian marka ba loron 19 Jullu, iha sidade Mindelo, Cabo Verde.

Governu Guiné Ekuatorial nian, lidera hosi Teodoro Obiang Nguema, tinan 76, iha poder durante tinan 39 nia laran, hetan beibeik akuzasaun ba violasaun direitu ema nian hosi nia opozitor sira no hosi organizasaun internasional sira.

Guiné Ekuatorial hala'o hela kastigu mate nian.

Iha final fulan-Maiu, Prezidente Repúblika portugés hatete, iha São Tomé & Prínsipe, katak simu ona xefe diplomasia hosi Guiné Ekuatorial garanti katak sei halakon kastigu mate iha nasaun ne'e antes simeira foun CPLP nian iha tinan 2020.

Iha findesemana liubá, AFP fó sai notísia katak ema na'in 130 ne'ebé akuza iha envolvimentu iha tentativa golpe Estadu ida iha Guiné Ekuatorial hetan ona kondenasaun iha loron-sesta ba kadeia entre tinan tolu to'o tinan 96.

Nasaun sira ne'ebé halo parte iha CPLP maka hanesan Portugal, Angola, Brazil, Cabo Verde (ne'ebé iha prezidénsia rotativu CPLP nian), Guiné-Bissau, Guiné Ekuatorial, Mosambike, São Tomé & Prínsipe ho Timor-Leste.

Lusa

 


Comentários

Critério de publicação de comentários