Pájina aktualizada iha 16:02h, sesta-feira 23 Agostu

Parlamentu tailandés hili líder hosi golpe Estadu tinan 2014 nian nu'udar primeiru-ministru

06 de Junho de 2019, 20:00

Parlamentu Tailándia, iha loron-kuarta ne'e, hili ona líder hosi golpe Estadu tinan 2014 nian hodi sai nu'udar primeiru-ministru, reforsa domíniu militar hosi polítika dezde nasaun ne'e sai monarkia konstitusional ida kuaze dékada sia nia laran.


Partidu ne'ebé apoia hosi militar sira ne'ebé nomeia ona Prayuth Chan-ocha konkista ona númeru boot daruak hosi fatin sira iha Kámara Reprezentante sira nian iha eleisaun jeral iha fulan-Marsu.

Maibé, eskolla ne'e hametin tebes tanba primeiru-ministru hili iha votasaun hamutuk ida hosi Kámara Reprezentante sira (fatin 500) no hosi Senadu (fatin 250), ne'ebé nia membru sira nomeia hosi junta militar ne'ebé lidera hosi Prayuth.

Prayuth eleitu hodi serve mandatu daruak ida hosi votu ida 500 ba 244, halakon líder hosi grupu Futuru Foun, Thanathorn Juangroongruangkit.

Prayuth, eis-komandante ida hosi Ezérsitu, uluk hanesan kandidatu hosi partidu Palang Pracharath, apoia hosi militar sira, ne'ebé kaer asentu hamutuk 116 iha Kámara, nune'e mós hosi deputadu sira hosi partidu ki'ik sira.

Nomeasaun Prayuth nian sai ofisial bainhira apoia hosi liurai-mane Maha Vajiralongkorn.

"Ema sira sei husu liberdade sira. Ema sira sei husu justisa", Thanathorn hatete hafoin votasaun.

"Ne'e la'ós hanesan momentu hodi lakon esperansa. Esperansa sei iha ita nia parte. Tempu sei iha ita nia parte. Ha'u hakarak agradese ba ema na'in 244 tomak ne'ebé hadomi demokrasia hodi vota iha ha'u", nia hatutan.

Prayuth la disputa kargu iha eleisaun sira Marsu nian - konstituisaun promulga ho baze iha junta militar ne'ebé nia lidera ona la presiza atu primeiru-ministru eleitu entre deputadu sira hosi parlamentu.

Lei sira ne'ebé aprova durante nia mandatu haree ba ezisténsia hosi partidu polítiku sira ne'ebé estabelesidu, hamosu preokupasaun sira katak eleisaun sira la halo iha kondisaun sira ne'ebé hanesan.

Krítiku sira kestiona mós imparsialidade hosi komisaun eleitoral, hodi alega katak muda ona regra sira hafoin votasaun hodi fó benefísiu ba Palang Pracharath.

Lei eleitoral foun sira haree liuliu ba partidu Pheu Thai, ne'ebé lidera ona Governu ne'ebé tuun hosi golpe tinan 2014 nian no manán ona fatin maioria iha Kámara iha fulan-Marsu.

Lusa

 


Comentários

Critério de publicação de comentários