Pájina aktualizada iha 20:39h, tersa-feira 18 Juñu

Uniaun Afrikanu suspende Sudaun to'o estabelesimentu hosi autoridade sivil

06 de Junho de 2019, 23:27

Konsellu Dame ho Seguransa hosi Uniaun Afrikanu (UA) anunsia ona iha loron-kinta suspensaun "ho efeitu lalais" ba Sudaun hosi atividade tomak hosi organizasaun tanba represaun hasoru manifestante sira ne'ebé halo ona ema na'in 100 resin mate.


"Konsellu Dame ho Seguransa hosi Uniaun Afrikanu (UA) suspende ona ho efeitu lalais partisipasaun hosi Repúblika Sudaun hosi atividade tomak UA nian to'o estabelese efetivu hosi autoridade sivil ida tranzisaun nian", hakerek hosi instituisaun iha mensajen ida iha rede sosial Twitter.

Ba Uniaun Afrikanu, ne'e sei hanesan dalan úniku "hodi permiti Sudaun saída ida ba krizi atual".

Anúnsiu akontese hafoin reuniaun ida hosi Konsellu Dame ho Seguransa kona-ba Sudaun ne'ebé halo iha loron-kinta ne'e, liutiha loron ida hafoin konfrontu foun sira ne'ebé halo ona ema na'in 108 mate, dezde loron-segunda, haktuir hosi movimentu opozitor sira.

Prezidente hosi Komisaun Uniaun Afrikanu nian, Moussa Fake Mahamat, kondena ona, iha inísiu semana ne'e, violénsia iha Sudaun no apela ona ba junta militar ne'ebé iha poder hodi "proteje ema sivil sira".

Dezde fulan-Dezembru maka Sudaun hasoru revolusaun popular ida ne'ebé nunka akontese no halo ona, iha fulan-Abril, depozisaun hosi Prezidente Omar al-Bashir ne'ebé maka troka hosi Konsellu Militar Tranzitóriu ida.

Maski mudansa, manifestante sira kontinua sai ba estrada, reklama transferénsia poder ida ba ema sivil sira, bainhira hala'o hela negosiasaun sira.

Negosiasaun sira entre movimentu sira kontestasaun nian ho Junta Militar iha loron 20 Maiu laiha susesu, ho parte rua hakarak kaer lideransa hosi períudu tranzisaun ba tinan tolu.

Iha loron-segunda, akampamentu, monta dezde loron 06 Abril, iha Cartum, estraga ona ho forsa, ho manifestante sira denunsia "masakre ida" ne'ebé halo hosi "milísia" sira hosi Konsellu Militar.

Movimentu opozitor sira ko'alia iha ema na'in 108 mate no na'in 500 resin kanek, bainhira Governu Sudaun sustenta katak númeru hosi vítima sira hosi represaun ne'e la liu hosi na'in 46.

Iha parte seluk, militar sira rejeita katak uza forsa, hodi adianta katak hanesan "operasaun ida limpeza nian" ne'ebé maka la'o ladi'ak.

Operasaun ne'e hetan ona kondenasaun hosi ONU, Estadus Unidus ho Reinu Unidu, no hosi nasaun sira seluk.

Arábia Saudita ho Emiradu Árabe Unidu, ne'ebé apoia militar sudanés sira, apela ona ba diálogu maibé la kondena represaun.

Lusa

 


Comentários

Critério de publicação de comentários