Pájina aktualizada iha 20:03h, tersa-feira 18 Juñu

Mate ona ativista ho antiga primeira-dama hosi Koreia-Súl, Lee Hee-ho

11 de Junho de 2019, 19:51

Antiga primeira-dama hosi Koreia-Súl, Lee Hee-ho, ativista ida ne'ebé luta ona ba demokrasia ho ba direitu ema sira nian hamutuk ho nia laen no eis-Prezidente Kim Dae-jung, mate ona iha loron-segunda ne'e ho tinan 97.


Prezidente súl-koreanu atual, Moon Jae-in, afirma ona katak nasaun lakon ona "ema boot ida", ne'ebé dedika ona nia moris ba feto sira no ba demokrasia, iha publikasaun ida ne'ebé fahe iha rede sosial Twitter.

Iha testamentu ida, Lee, kristaun devotu ida, hatete katak sei reza ba povu súl-koreanu no ba unifikasaun pasífiku ho Koreia-Norte, haktuir hosi funsionáriu ida hosi Sentru Dame Kim Dae-jung, ne'ebé harii hosi nia laen hodi promove rekonsiliasaun entre nasaun rua.

Moris iha Seul, iha tinan 1921, Lee hahú kampaña ida ba feto sira nia direitu iha dékada 1950, hafoin hakotu tiha estudu universitáriu sira iha Estadus Unidus, kria grupu ativista sira no investigasaun nian.

Kaben ho Kim iha tinan 1962, bainhira nia hanesan polítiku afastadu ida. Kim, ne'ebé mate ona iha tinan 2009, sobrevive ba kastigu mate ida no ba tentativa ezekusaun ida antes sa'e ba poder iha tinan 1997.

Kim Dae-jung simu ona Prémiu Nobel Dame nian iha tinan 2000 tanba esforsu sira rekonsiliasaun nian ho Koreia-Norte, liutiha fulan balu hafoin hasoru malu ho líder norte-koreanu iha momentu ne'ebá, Kim Jong-il, iha simeira dahuluk ida entre Koreia sira hafoin funu (1950-1953).

Lusa

 


Comentários

Critério de publicação de comentários