Pájina aktualizada iha 20:05h, tersa-feira 18 Juñu

Hinu Liverpool ho kamizola Salah nian inspira joven manifestante sira iha Hong Kong

12 de Junho de 2019, 21:44

Hinu Liverpool nian “You’ll Never Walk Alone” serve hanesan inspirasaun ba joven millaun resin ne'ebé konsentra iha parlamentu Hong Kong nian, ne'ebé kántiku protestu sira troka ona ho guarda-xuva.


Joven balun ne'ebé hela iha antigu kolónia britániku hatais kamizola sira hosi jogador futebol Liverpool nian, Mohamed Salah, ho fraze “Never Give Up”, kanta hinu hosi ekipa ingleza, bainhira sira seluk dedika hamoos zona sira ne'ebé iha akumulasaun ba foer, "iha afirmasaun ida ba sivizmu", sira esplika ba Lusa.

Liutiha oras balun hafoin fó sai adiamentu ba debate hosi mudansa sira ba lei estradisaun nian ne'ebé hamosu ona mobilizasaun, manifestante barak buka fatin hodi halai hosi udan, bainhira balun toba iha rai hodi hetan fali forsa sira. Parte barak permanese vijilante, hamriik, kaer guarda-xuva sira.

Testu, ne'ebé proposta iha Fevereiru no ho votasaun ikus ne'ebé kalkula ba final fulan-Jullu, sei permiti atu xefe Ezekutivu ho tribunal sira Hong Kong nian prosesa pedidu sira estradisaun hosi jurisdisaun sira lahó akordu préviu sira, hanesan kazu hosi Xina kontinental.

Manifestante balun ne'ebé ko'alia ho Lusa, barak liu hanesan estudante sira, hatete katak sira iha disponibilidade hodi kontinua iha fatin to'o Governu rekua iha intensaun hodi avansa ba mudansa sira lei nian.

Iha teoria, tribunal lokal sira analiza kazu sira individualmente no bele uza poder bandu nian hodi impede estradisaun balun iha teritóriu semi-autónomu Xina nian no antigu kolónia britániku nian.

Defensor sira hosi lei argumenta katak bainhira mantén imposibilidade hodi halo estradisaun ba suspeitu sira krimi nian ba nasaun sira hanesan Xina, Hong Kong bele sai hanesan "refújiu ida ba kriminozu internasional sira".

Manifestante sira hatete katak tauk atu Hong Kong iha ligasaun hosi sistema judisial xinés hanesan sidade sira seluk hosi Xina kontinental no hosi justisa politizadu ida ne'ebé la garanti salvaguarda hosi direitu ema sira nian.

Transferénsia hosi Hong Kong ho Makau ba Repúblika Popular Xina, iha tinan 1997 ho 1999, hala'o ho prinsípiu "nasaun ida, sistema rua", razaun ne'ebé maka opozitor sira hasoru mudansa lei nian hatete katak sai hanesan kauza.

Ba rejiaun administrativu espesial rua hosi Xina iha akordu ba períudu ida tinan 50 ho aumentu grau autonomia aas, iha nível ezekutivu, lejislativu ho judisiáriu, no Governu sentral xinés hanesan responsável ba relasaun esterna ho defeza.

Lusa

 


Comentários

Critério de publicação de comentários