Pájina aktualizada iha 08:41h, sesta-feira 19 Jullu

JSMP alerta ba problema barak iha tribunal distrital sira

14 de Junho de 2019, 22:37

Falta kombustível ho bee, ekipamentu ne'ebé la sufisiente ka laiha no infraestrutura defisitáriu sira hanesan problema balun ne'ebé maka organizasaun timoroan ida konsidera afeta maka'as ba tribunal distrital sira iha Timor-Leste.


"Monitorizasaun ne'ebé maka JSMP halo dezde tinan 2017 hatudu katak maioria hosi tribunal sira sofre konsekuénsia sira hosi fundu limitadu hodi bele hatán ba nesesidade regular no diáriu sira hosi nia serbisu", refere hosi relatóriu hosi Programa Monitorizasaun hosi Sistema Judisial (JSMP, iha sigla inglés).

Dokumentu, ne'ebé haruka ba Tribunal Supremu no divulga iha loron-kinta ne'e hosi JSMP, analiza sirkunstánsia sira ne'ebé maka tribunal distrital timoroan sira hasoru, ho detalle liu iha kazu hosi Suai, maibé ezamina kestaun hanesan ne'ebé marka instánsia sira seluk iha nasaun, inklui iha kapital Díli.

"Tribunal Rekursu, tribunal importante liu iha Timor-Leste, iha duni nia prioridade rasik, maibé ami fiar katak hanesan importante ko'alia problema sira ne'ebé ami observa ona to'o ohin loron", refere hosi testu.

"Sirkunstánsia sira afeta beibeik kualidade hosi funsionamentu diáriu ho regular hosi tribunal sira", aponta hosi organizasaun ne'ebé husu solusaun lalais ba problema sira.

Iha testu, JSMP nota, hanesan ezemplu, katak "Tribunal Distrital Suai nian hasoru dezafiu importante sira kona-ba problema sira ho kombustível, bee ho hijiene, no ekipamentu limitadu ka laiha, ne'ebé afeta produtividade no kualidade traballu tribunal nian no hosi serbisu sira ne'ebé hala'o".

Aponta katak problema balun hatudu beibeik iha relatóriu sira JSMP nian dezde tinan 2015, organizasaun refere katak difikuldade polítika tinan 2017 ho 2018 agrava tan problema.

Problema sériu ida dezde tinan 2017 maka "falta kombustível" nune'e halo atrazu sira iha notifikasaun hosi parte sira no, nune'e, obriga ona adiamentu sira ba julgamentu sira.

"Limitasaun sira ho defisiénsia sira signifika katak dalaruma juís sira, ofisial sira justisa nian ho sekretáriu judisial sira uza ona sira nia osan rasik hosi sosa kombustível ba karreta sira no motor operasional sira hodi fahe notifikasaun sira ba parte sira ka fahe dokumentu relevante sira seluk", hakerek iha relatóriu.

JSMP aponta mós ba falta hosi karreta operasional sira - iha de'it karreta ida "hodi entrega karta rogatóriu sira, orden sira libertasaun nian, pedidu sira ba Tribunal Rekursu, hodi lori ofisial judisial sira ba tribunal móvel, nune'e mós hodi entrega notifikasaun sira kona-ba tribunal distrital haat.

Dezde tinan 2015 maka laiha hariis-fatin ne'ebé funsiona ba vizitante sira iha tribunal Suai nian, ho bombeiru sira tenki fornese bee, no utente sira husu hodi uza hariis-fatin hosi populasaun sira ne'ebé hela besik tribunal.

"Situasaun ida ne'ebé afeta ona to'o vítima sira hosi abuzu ka violénsia seksual ne'ebé tenki hein hodi to'o hariis-fatin ida hodi uza tanba tauk ba hariis-fatin iha ema deskoñesidu nia uma", refere hosi dokumentu.

"Tribunal Distritu Suai nian iha de'it sala rua ne'ebé disponível ba juís na'in neen. Dalaruma, bainhira iha audiénsia barak, parte sira tenki hein tanba sala sira tribunal nian ema uza hela", hatutan hosi testu ne'ebé hatete katak laiha sala ida hodi rai sasán sira krimi nian.

"Tanba iha falta ba fatin, objetu sira krimi nian tenki tau hamutuk ho kazu arkivadu sira ho risku ba kontaminasaun, korupsaun ka destruisaun, estraga ka adulterasaun", hakerek.

Falta komputador sira - komputador tolu ba ofisial justisa na'in neen - impresora ida ne'ebé ladi'ak dezde tinan 2017 - falta kadeira ho meza sira ho aparellu ar-kondisianu sira ne'ebé la funsiona hanesan mós problema sira seluk ne'ebé hato'o.

Iha tribunal Díli mós falta komputador sira, ar-kondisionadu ne'ebé la funsiona iha fulan barak nia laran, iha falta impresora ho tinteiru sira, falta material gravasaun iha sala audiénsia oioin no falta karreta sira.

Organizasaun hatete katak problema hanesan hasoru mós iha tribunal sira Baucau ho Oecusse, maski nune'e, iha kazu ikus, tribunal iha de'it juís na'in ida durante tinan 10 nia laran - ne'ebé hanesan mós juís administrador - no ofisial judisial na'in neen.

JSMP husu ba prezidente Tribunal Rekursu nian hodi halo vizita ba tribunal distrital sira ka haruka ekipa ida hodi analiza ho di'ak situasaun atual, hodi garanti atu sasán nesesáriu sira bele disponível ba traballu tribunal nian.

No, ikusmai, orsamentu "realístiku" ida ba Tribunal Distrital sira no iha liu atensaun ba rekursu sira ne'ebé iha.

Lusa

 


Comentários

Critério de publicação de comentários