Pájina aktualizada iha 10:41h, sesta-feira 19 Jullu

AMP lakohi renova Alkatiri nia mandatu iha Oecusse

17 de Junho de 2019, 19:05

Koligasaun hosi Governu anunsia iha loron-segunda ne'e katak hato'o ona ba primeiru-ministru hodi la renova mandatu hosi Mari Alkatiri nu'udar prezidente hosi Zona Espesial ba Ekonomia Sosial Merkadu nian (ZEESM) no hosi Rejiaun Administrativu Espesial hosi Oecusse-Ambeno (RAEOA).


Pozisaun ne'e aprova ona, ho unanimidade, iha reuniaun durante loron rua hosi partidu tolu ne'ebé halo parte iha Aliansa Mudansa ba Progresu (AMP), ne'ebé hala'o iha findesemana, informa hosi koligasaun ofisialmente iha loron-segunda ne'e.

"AMP repete fali pozisaun hodi kumpri kompromisu eleitoral 2018 nian, hodi la renova mandatu hosi atual prezidente RAEOA nian. Ami apela ba señór primeiru-ministru Taur Matan Ruak hodi informa desizaun ba Prezidente Repúblika", refere hosi rezolusaun ida ne'ebé debate no aprova ona iha enkontru.

Xanana Gusmão, líder hosi Congresso Nacional da Reconstrução Timorense (CNRT), partidu boot hosi AMP, la marka prezensa iha enkontru ne'ebé maka hetan prezensa hosi membru oioin Governu nian, deputadu sira ho dirijente sira hosi CNRT, hosi Partidu Libertasaun Popular (PLP) no hosi Kmanek Haburas Unidade Nacional Timor Oan (KHUNTO).

"Nia [Xanana Gusmão] senti haksolok ho rezultadu sira hosi reuniaun. Ha'u hamutuk ona ho nia horseik no ohin no ami ko'alia ona", hatete hosi sekretáriu-jeral Francisco Kalbuadi Lay, númeru daruak hosi CNRT, ba Lusa. "Ha'u marka prezensa iha ne'ebá hodi reprezenta nia", nia hatutan.

Primeiru-ministru, Taur Matan Ruak, hanesan mós porta-vós hosi AMP no líder PLP nian, partisipa ona iha parte balun hosi serbisu nian iha loron dahuluk. Iha loron-domingu nia halo ona viajen ba Singapura hodi halo tratamentu médiku sira.

Enkontru ne'e konvoka hodi halo "avaliasaun klean ida no hametin AMP nia serbisu, hosi Governu daualuk no hosi Parlamentu Nasional nian" no iha tempu hanesan "promove estabilidade ho impulsiona dezenvolvimentu nasional".

Hosi reuniaun iha ona rezolusaun oioin, inklui afirma fali konfiansa iha lideransa Xanana Gusmão nian, iha Taur Matan Ruak iha kargu nu'udar primeiru-ministru no iha Konsellu Diretivu AMP nian, hodi "fasilita komunikasaun entre Parlamentu Nasional no Governu hodi serbisu ba povu timoroan nia moris di'ak".

Enkontru ne'e serve mós hodi destaca serbisu hosi Xanana Gusmão nian iha prosesu dezenvolvimentu hosi projetu gazodutu hosi Tasi Timor ba Timor-Leste, hodi konkretiza "soberania total" no "sustentabilidade ekonómiku" nasaun nian.

Lusa

 


Comentários

Critério de publicação de comentários