Pájina aktualizada iha 11:01h, sesta-feira 19 Jullu

AMP hakarak atu PM husu esplikasaun ba Prezidente Repúblika kona-ba membru sira ezekutivu

17 de Junho de 2019, 21:19

Koligasaun hosi Governu timoroan hakarak atu primeiru-ministru husu ba Prezidente Repúblika justifikasaun eskritu ida tanba kuaze tinan ida ona maka la nomeia membru na'in sira ne'ebé hili hodi halo parte iha ezekutivu.


Apelu ne'e aprova ona, ho unanimidade, iha reuniaun durante loron rua hosi partidu tolu ne'ebé halo parte iha Aliansa Mudansa ba Progresu (AMP), ne'ebé hala'o iha findesemana, informa hosi koligasaun ofisialmente iha loron-segunda ne'e.

"Tanba Governu la kompletu prejudika implementasaun hosi programa Governu nian no ezekusaun hosi Orsamentu. AMP repete fali nia apoiu ba membru sira hosi Governu daualuk ne'ebé maka nomeadu no ne'ebé maka seidauk simu pose", refere hosi rezolusaun.

Enkontru iha loron-sábadu ho loron-domingu akontese liutiha tinan ida hafoin membru dahuluk sira hosi Governu simu pose, ho Prezidente Repúblika, Francisco Guterres Lu-Olo, rekuza naran 12, ho argumentu katak sira iha prosesu sira iha justisa ka iha "perfil étiku ne'ebé kontroversu".

AMP ikusmai aprezenta naran foun tolu ne'ebé maka aseita tiha no nomeadu hosi Prezidente maibé ikusmai husu adiamentu 'sine die' ba pose ne'e, "hanesan solidariedade" ho naran sira ne'ebé rekuza tiha ona.

Iha testu, AMP konsidera katak Lu-Olo nia pozisaun prejudika daudaun integridade pesoal hosi sidadaun timoroan sira nian, haktuir ho konstituisaun no esplika katak "bainhira laiha solusaun", AMP "sei la halo diálogu ho entidade ruma ka personalidade polítika ruma".

nkontru ne'e konvoka hodi halo "avaliasaun klean ida no hametin AMP nia serbisu, hosi Governu daualuk no hosi Parlamentu Nasional nian" no iha tempu hanesan "promove estabilidade ho impulsiona dezenvolvimentu nasional".

Reuniaun apoia liña sira orientasaun nian hosi proposta Orsamentu Jeral Estadu (OJE) nian ba tinan 2020-2023 ne'ebé aprezenta hosi Taur Matan Ruak iha enkontru ne'ebé maka líder máximu hosi koligasaun, Xanana Gusmão, la marka prezensa.

Entre rekomendasaun sira, AMP husu ba Governu hodi "selu tusan sira iha área infraestrutura sira", inklui projetu hamutuk 143 "ne'ebé implementa ona", hodi konsidera katak tusan sira "impede dezenvolvimentu nasional no kresimentu hosi setór privadu" nasaun nian.

Defende mós programa desentralizasaun, ho aumentu hosi projetu sira, tuir faze sira, iha nível sub-rejional no reforsu ida hosi prestasaun ba serbisu sira iha saúde, edukasaun, justisa ho administrasaun públika.

Ba parlamentu, membru sira AMP nian husu atu kontinua serbisu iha prosesu hosi reforma iha área justisa, aumenta kapasidade sira hosi ajente sira justisa nian hodi nune'e bele hanesan "transparente, justu ho ekilibradu".

Lusa

 


Comentários

Critério de publicação de comentários