Pájina aktualizada iha 11:01h, sesta-feira 19 Jullu

Prezidente Repúblika renova mandatu hosi komandante forsa sira defeza nian

17 de Junho de 2019, 22:41

Prezidente Repúblika, Francisco Guterres Lu-Olo, renova ona mandatu hosi Xefe Estadu-Maior Jeneral hosi Forsa Armada sira nian, Lere Anan Timur, iha dekretu ida ne'ebé la klaru kona-ba tempu to'o bainhira maka sei okupa funsaun sira.


Lu-Olo determina "kontinuidade mandatu iha kargu Xefe Estadu-Maior-Jeneral nian hosi Forsa Armada sira hosi nia prezidente titular, major-jeneral Lere Anan Timur, ho efeitu sira hahú hosi loron 06 Outubru 2018 no durasaun ne'ebé la aas liu duké limiti ne'ebé defini legalmente".

Maibé la krafika loloos kalendáriu ne'ebé maka aplika tanba, tuir dalan formal, Lere Anan Timur, hakotu ona nia mandatu datoluk iha loron 06 Outubru 2018, mandatu ikus ne'ebé maka uluk permiti iha rejimi esepsional ida ne'ebé hotu ona iha loron 31 Dezembru 2016.

Rekorda katak, iha tinan ne'ebá, mudansa iha komando F-FDTL nian hamosu ona momentu boot ida tensaun nian entre Governu no Prezidente iha momentu ne'ebá, Taur Matan Ruak (antesesor hosi Lere iha komando FDTL nian), ne'ebé demiti tiha komandante, hafoin ne'e anunsia promosaun hosi Filomeno Paixão hodi okupa kardu no rekua ikusmai iha desizaun rua ne'e hodi ikusmai aumenta mandatu sira.

Nune'e, halo ezekutivu aprova mudansa ida ba estatutu hosi militar sira hodi permiti aumenta komando F-FDTL ho dalan esepsional.

Mudansa ne'e refere katak "ezersísiu hosi kargu xefe Estadu Maior F-FDTL sira nian (…) bele hanesan títulu esepsional no provizóriu, renova ba mandatu datoluk ida, ho durasaun máximu ida ba tinan rua", hodi nota katak "rejimi esepsional, hotu iha 31 Dezembru 2016, mantén efeitu sira hosi nomeasaun sira ne'ebé halo iha nia ámbitu to'o loron ne'ebé hakotu funsaun sira".

Prezidénsia Repúblika la informa ba públiku kona-ba dekretu prezidensial ne'ebé maka publika ofisialmente iha loron 14 Juñu iha Jornal Repúblika, la fó hatene informasaun adisional ruma ba testu.

Dekretu refere katak foti ona desizaun hafoin simu pozisaun hosi Governu kona-ba asuntu no rona ona Konsellu Superior Defeza ho Seguransa nian, "hanesan urjente no imperiozu, iha interese aas tebes hosi unidade militar no Estadu nian, nune'e mós ba funsionamentu regular hosi instituisaun militar, dekreta kontinuasaun ba Lere Anan Timur iha mandatu".

Iha fulan-Outubru nia laran, Francisco Guterres Lu-Olo hatete katak hanesan konkorda ba renovasaun hosi mandatu Lere Anan Timur nian nu'udar komandante F-FDTL nian, hodi esplika katak fó hatene ona pozisaun ne'e ba xefe Governu.

Iha momentu ne'ebá, fonte sira hosi ezekutivu hatete ona ba Lusa katak primeiru-ministru, Taur Matan Ruak, la konkorda ho renovasaun hosi Lere Anan Timur nia mandatu.

Iha fulan-Janeiru, ONG timoroan ida alerta ona ba situasuan "inserteza legal" kona-ba mandatu hosi komandante Forsa Defeza Timor-Leste (F-FDTL) nian ne'ebé, tuir dalan formal, hotu ona iha fulan-Outubru tinan liubá.

ONG Fundasaun Mahein, ne'ebé akompaña besik área defeza ho seguransa iha Timor-Leste, konsidera ona katak "Governu ho Prezidente timoroan seidauk rezolve dúvida" hosi situasaun Lere Anan Timur nian.

"Bainhira komandante superior hosi forsa armada sira nia mandatu la bazeia iha baze legal metin ida, sai susar ba ofisial sira hosi F-FDTL hodi kumpri sira nia obrigasaun, tanba labele ezerse poder lejítimu ho baze iha lei sira ho prosedimentu sira ne'ebé iha", argumenta.

Organizasaun haree mós katak mandatu hosi komandante oioin hosi komponente sira hotu ona iha loron 17 Novembru no hanesan importante atu Governu nomeia susesor sira ba kargu sira, asaun ida ne'ebé seidauk akontese.

"Seidauk iha nomeasaun foun sira. Nune'e, pozisaun hosi komandante sira hosi komponente sira paradu hela iha inserteza jurídiku", refere.

Lere Anan Timur simu pose iha komando F-FDTL nian iha loron 06 Outubru 2011 hosi Prezidente Repúblika iha momentu ne'ebá, José Ramos-Horta.

Lusa

 


Comentários

Critério de publicação de comentários