Pájina aktualizada iha 11:42h, domingu 21 Jullu

CNRT lamenta "falta sentidu Estadu nian" hosi Prezidente Repúblika

18 de Junho de 2019, 20:40

Congresso Nacional da Reconstrução Timorense (CNRT), partidu boot hosi koligasaun Governu nian, lamenta ona, iha loron-tersa ne'e, kona-ba saida maka konsidera hanesan falta sentidu Estadu nian hosi Prezidente nasaun nian, Francisco Guterres Lu-Olo.


"Partidu CNRT lamenta falta hosi sentidu Estadu hosi prezidente Fretilin nian, ne'ebé, tuir direitu, kaer mós knaar nu'udar prezidente Timor-Leste nian", refere hosi komunikadu ida CNRT nian ne'ebé haruka ba Lusa.

Komunikadu mosu iha sekuénsia hosi reuniaun ida ne'ebé halo iha loron-segunda hosi Komisaun Polítika Nasional ho Komisaun Diretivu Nasional CNRT nian iha Díli hodi "analiza situasaun" polítika ne'ebé maka nasaun hasoru.

Iha testu, partidu rejeita mós saida maka sira konsidera hanesan kontradisaun hosi Prezidente Timor-Leste nian kona-ba inkluzaun polítika no esplika katak la autoriza dirijente ruma hosi CNRT hodi foti "inisiativa ruma ba diálogu ho ema ruma".

Nota, ne'ebé haruka ba Lusa, hakarak "klarifika dúvida ruma ne'ebé maka bele mosu iha sosiedade timoroan" hafoin reuniaun ne'ebé halo iha findesemana hosi lideransa koligasaun Governu nian, Aliansa Mudansa ba Progresu (AMP).

Iha nota hanesan, partidu boot Governu nian, lidera hosi Xanana Gusmão, kritika mós saida maka klarifika hanesan "falta atividade" hosi justisa no hosi ator judisial sira tanba la halo asaun ruma hasoru "gastu maka'as hosi dolar millaun resin hosi fundu soberanu ho prátika kontráriu sira ba nasaun nia moris di'ak" ne'ebé deskonfia halo iha Rejiaun Administrativu Espesial Oecusse-Ambeno (RAEOA), haktuir hosi auditoria ida hosi Kámara Konta nian.

RAEOA prezidi hela hosi Mari Alkatiri, sekretáriu-jeral hosi Frente Revolucionária do Timor-Leste Independente (Fretilin), ne'ebé agora daudaun iha opozisaun.

CNRT hatete katak postura justisa ne'e la hanesan ho pozisaun ne'ebé adopta hasoru membru sira hosi Governu anterior sira ne'ebé lidera hosi CNRT ne'ebé maka hetan kondenasaun tanba "prejuízu hosi dolar rihun 10", hamosu "sentimentu angústia" no hanoin katak justisa "la atua hodi defende nasaun ho povu nia moris di'ak maibé defende interese sira hosi partidu sira".

Iha komunikadu, CNRT rejeita mós krítika sira hosi ema sira ne'ebé eziji debate sira kona-ba investimentu iha kosta-súl maibé hafoin ne'e la partisipa iha debate sira ne'e, hanesan akontese iha fulan-Dezembru iha tinan liubá iha Díli bainhira Prezidente Repúblika ho lideransa máximu hosi Fretilin la marka prezensa.

Aliansa Mudansa ba Progresu (AMP), ne'ebé manán eleisaun sira tinan 2018 nian ho maioria absoluta hanesan harii hosi CNRT, Xanana Gusmão nian, hosi Partidu Libertasaun Nasional (PLP) hosi primeiru-ministru Taur Matan Ruak nian no hosi Kmanek Haburas Unidade Nacional Timor Oan (KHUNTO).

Lusa

 


Comentários

Critério de publicação de comentários