Pájina aktualizada iha 03:13h, kuarta-feira 21 Novembru

Mari Alkatiri hakarak lidera nafatin autoridade rejiaun Oecusse nian

19 de Junho de 2019, 22:29

Prezidente hosi Rejiaun Administrativu Espesial Oecusse-Ambeno (RAEOA), Mari Alkatiri, ne'ebé nia mandatu hotu iha fulan-Jullu, hatete iha loron-kuarta ne'e katak nia hakarak lidera nafatin autoridade hodi konsolida ajenda dezenvolvimentu ekonómiku rejional nian.


"Importante liu agora maka tinan lima tuirmai: ema hotu hatene defini saida maka hanesan duni ekonomia sosial merkadu nian no kria modelu ida ne'ebé serve ba povu tomak", nia afirma iha deklarasaun sira ba Lusa iha Oecusse.

"Ha'u hakarak kontinua kontribui tanba, iha fundu, filozofia sai ona hosi ha'u nia hanoin no ha'u seidauk halo buat hotu", nia konfesa.

Alkatiri nomeia ona ba mandatu tinan lima ho dekretu prezidensial ida ne'ebé asina iha loron 25 Jullu 2014 hosi xefe Estadu iha momentu ne'ebá (ne'ebé agora nu'udar primeiru-ministru), Taur Matan Ruak, no hetan proposta ida hosi xefe Governu iha momentu ne'ebá, Xanana Gusmão.

Xanana Gusmão ho Taur Matan Ruak ohin loron hanesan líder sira hosi Aliansa Mudansa ba Progresu (AMP), koligasaun ne'ebé to'o ona Governu ho maioria absoluta iha tinan 2018 no ne'ebé partidu sira ne'ebé halo parte iha koligasaun kontra renovasaun hosi mandatu Alkatiri nian.

Iha findesemana liubá, koligasaun aprova ona rezolusaun ida ne'ebé hato'o ba primeiru-ministru hodi la renova mandatu Alkatiri nian.

"AMP repete fali pozisaun hodi kumpri kompromisu eleitoral 2018 nian, hodi la renova mandatu hosi atual prezidente RAEOA nian. Ami apela ba señór primeiru-ministru Taur Matan Ruak hodi informa desizaun ba Prezidente Repúblika", refere hosi rezolusaun ida ne'ebé debate no aprova ona iha enkontru.

Ba Mari Alkatiri rezolusaun ne'e ladún diresiona ba nia rasik no diresiona liu ba debate internu iha koligasaun Governu nia laran.

"Ha'u hanoin katak hanesan presaun internu entre sira. Laiha ligasaun ho ha'u. Sira la entende no buka salvasaun internu hodi justifika kontradisaun sira ne'ebé ezisti iha AMP nia laran", nia refere.

Komentáriu sira hosi Alkatiri mosu iha okazisaun hosi aniversáriu dalima hosi RAEOA no inaugurasaun, ne'ebé halo hosi Prezidente Repúblika, Francisco Guterres Lu-Olo, ba Aeroportu Internasional foun hosi Oecusse, Rota do Sândalo, "projetu símboliku ida hosi rejiaun".

Xanana Gusmão, líder AMP nian, Taur Matan Ruak, primeiru-ministru ne'ebé iha estranjeiru tanba halo tratamentu médiku, no Agio Pereira, xefe Governu interinu, la partisipa.

Bainhira hatán kona-ba projetu, Fidelis Magalhães, ministru Reforma Lejislativu ho Asuntu Parlamentar sira no ne'ebé maka reprezenta primeiru-ministru iha serimónia, hatete de'it katak "Parabéns ba povu Oecusse, autoridade ho prezidente ho rezultadu hosi obra".

Maibé nia lakohi halo komentáriu sira seluk kona-ba renovasaun ka la'e hosi Alkatiri nia mandatu ka kona-ba polítika sira ne'ebé tenki akompaña iha tinan lima oinmai.

"Ne'e la'ós ha'u maka tenki ko'alia. Ha'u husik ba katuas sira hodi iha nia tempu no meiu hodi komunika entre sira", nia afirma.

"Hanesan prosesu ida ne'ebé sei iha diskusaun ida hodi haree rekizitu sira, kualidade, etc.. no tanba ne'e, agora daudaun, ha'u laiha buat barak hodi hatete", nia afirma.

Hatán kona-ba asuntu hanesan, Francisco Guterres Lu-Olo hatete katak, maski iha rezolusaun, desizaun "sei la'ós hosi AMP, maibé hosi primeiru-ministru ho Prezidente Repúblika", sujere katak Alkatiri tenki kontinua hodi lidera projetu.

"Ha'u hanoin katak doutor Mari Alkatiri hanesan operáriu ba buat hotu. Hatudu ona kapasidade tékniku ho profisional, nune'e mós konseitu polítiku ida ZEESM nian. Hanesan obra feitu ida. Ha'u mai iha ne'e hodi inaugura susesu ida, la'ós frakasu ida", afirma.

"Mari Alkatiri hanesan ema ida ne'ebé iha kapasidade hodi jere projetu ne'e", nia hatete.

Eis-Prezidente timoroan, José Ramos-Horta, ne'ebé marka mós prezensa iha Oecusse ba inaugurasaun, defende ona renovasaun Alkatiri nian, hodi afirma ba Lusa katak "tenki renova fali bainhira nia hakarak".

"Obra ne'e hanesan besik hotu ona iha termu infraestrutura sira nian, maibé agora presiza atu kontinua ema ida hanesan nia ba faze tuirmai, ne'ebé atrai investimentu privadu sira", Ramos-Horta hatete.

"Infraestrutura sira iha ne'ebá, no agora presiza investimentu privadu. Labele kontinua hanesan de'it Estadu", nia afirma hodi konsidera katak presiza ema ida hanesan Alkatiri "ho kapasidade ba diálogu, konvense, atrai investimentu estranjeiru".

Krítiku sira Alkatiri nian aponta nafatin aspetu balun hosi nia jestaun inisial hosi RAEOA - bainhira fahe ho Governu sentral - no hanesan ona auditoria polémiku ida.

Membru sira hosi partidu sira Governu nian aponta mós katak Alkatiri bele hanesan influénsia iha atual Prezidente, Francisco Guterres Lu-Olo – ne'ebé hanesan mós prezidente Fretilin nian - ba desizaun ruma ne'ebé polémiku liu, inklui veta orsamentu no la fó pose ba membru oioin ezekutivu nian.

Alkatiri esplika katak iha parte ikus hosi nia atual mandatu iha projetu importante balun maka hala'o daudaun, liuliu hahú estrada ne'ebé liga Noefefa ho Citrana, ba oeste, no estudu ba estrada entre zona hosi irigasaun Tono ho fatin sira hosi Oesilo ho Passabe.

Nia hatete katak agora presiza hanoin ba tinan lima tuirmai no "iha interese loloos ida hosi investidor oioin hodi investe iha Oecusse".

"Maibé ema sira aprende mós serbisu ho ema balun no hafoin ne'e senti frustadu iha sira nia perspetiva, sei hanesan susar liu hodi rekonkista fali", nia konsidera.

Lusa

 


Comentários

Critério de publicação de comentários