Pájina aktualizada iha 21:53h, kuarta-feira 20 Novembru

Krizi polítika sei prejudika Hong Kong nia dezenvolvimentu

03 de Julho de 2019, 19:59

Jornal ofisial hosi Partidu Komunista Xinés (PCC) konsidera, iha loron-kuarta, katak krizi iha Hong Kong sei "prejudika maka'as" dezenvolvimentu ekonómiku ho sosial iha teritóriu, kondena invazaun iha Asembleia ne'ebé akontese iha loron-segunda.


Iha editorial, Diáriu Povu nian adverte ba perigu ne'ebé sei akontese bainhira husik sosiedade Hong Kong monu iha "espiral" ida ne'ebé buat hotu sei hanesan politiza no kria "konfrontu artifisial sira".

Jornal konsidera ona katak proposta lei ne'ebé sei permiti extradita kriminozu sira ba Xina kontinental, no ne'ebé maka hanesan orijen hosi protestu sira, "hanesan politizadu beibeik" no "demonizadu", hodi hamosu "disputa sosial sira" no "atividade ilegal sira".

Protestu sira iha Hong Kong hala'o ona kuaze fulan ida, maibé iha de'it semana ne'e, hafoin okupasaun hosi Asembleia lejislativu, maka imprensa ofisial xineza refere ona insidente sira ne'e, hodi sujere atu Pekin prepara hodi foti postura ida ne'ebé todan liu.

Protestu ida, iha fulan-Juñu nia laran, halibur ona ema millaun rua resin, haktuir hosi organizador sira, asumi ona hanesan ida boot liu dezde tinan 1997, bainhira halo tranzisaun hosi eis-kolónia britániku nian ba administrasaun xineza, maibé imprensa ofisial Pekin nian relata de'it iha loron tuirmai katak aman-inan sira hosi sidade halo marxa hasoru "interferénsia hosi Estadus Unidus" iha teritóriu no kondena ona "entidade estranjeiru sira" ne'ebé bosok joven sira hosi Hong Kong.

Manifestasaun oioin iha semana hirak ikus ne'e no asaltu, iha loron-segunda, ne'ebé halo hosi joven atus resin "prejudika ona reputasaun Hong Kong nian hanesan metrópole ida komersial internasional no interese importante sira no povu Hong Kong nia moris di'ak", defende hosi jornal.

"Sosiedade ida ne'ebé governa hosi lei tenki simu lian oioin, maibé ne'e la signifika atu ema balun bele halo asaun ilegal sira, no liuliu atu tolera krimi violentu sira", hatutan.

Manifestante atus resin halo rahun vidru sira no estrada ona grade sira hodi tama iha edifísiu Asembleia Hong Kong nian. Iha laran, sira pinta ona 'slogan sira' iha parede sira, sobu arkivu sira iha eskritóriu sira no espalla dokumentu sira iha rai.

Okupasaun akontese iha loron selebra tinan 22 regresu hosi Hong Kong ba Xina.

Hanoin hikas ditadu xinés - "harmonia bele lori sorte di'ak maibé laiha harmonia bele lori ba dezastre" -, Diáriu Povu nian destaka "importánsia maka'as" hodi hahú fali "dalan di'ak" iha rejiaun semiautónomu, respeita Konstituisaun xineza no Lei Báziku (konstituisaun ki'ik Hong Kong nian) no garanti Estadu Direitu.

"Kondena maka'as violénsia extrema no persegue asaun ilegal sira to'o rohan hanesan aspirasaun komun sira hosi patriota sira hotu iha Hong Kong", proklama hosi jornal PCC.

Asaltu akontese iha momentu hanesan ho manifestasaun pasífiku ida ne'ebé, tuir organizador sira, halibur ema hamutuk 550.000.

Iha hemisiklu asembleia nian, ne'ebé deputadu sira hasoru malu iha sesaun plenáriu sira, manifestante sira estraga ona eskudu rejiaun nian ho 'grafiti sira' no tara ona bandeira kolonial ida, refere ba períudu ne'ebé Hong Kong halo parte iha soberania Reinu Unidu nian.

Iha loron hanesan, Governu xinés kondena "maka'as ona" asaun "violentu sira" no eziji ona atu autoridade lokal sira "restaura lalais bainhira bele orden sosial".

Protestu violentu sira reprezenta dezafiu ida ba Prezidente xinés, Xi Jinping, ne'ebé to'o agora husik ona xefe Ezekutivu Hong Kong nian, Carrie Lam, hodi hasoru mesak ho krizi polítika.

Lusa

 


Comentários

Critério de publicação de comentários