Pájina aktualizada iha 11:11h, sesta-feira 19 Jullu

Ramos-Horta: Empreza sira hosi nasaun oioin, inklui europeia sira, iha interese iha Greater Sunrise

08 de Julho de 2019, 19:11

Eis-prezidente Repúblika José Ramos-Horta hatete ba Lusa katak investidor ho empreza oioin, inklui europeiu sira, hatudu ona interese hodi partisipa iha projetu dezenvolvimentu hosi kampu sira Greater Sunrise nian iha tasi Timor.


"Iha empreza europeia oioin, hanesan Total, ne'ebé maka iha interese maka'as hodi simu parte importante ida hosi partisipasaun iha downstream. Sira seluk iha interese iha upstream. Timor-Leste sei kontrola iha donwstream. Ne'e hanesan kestaun importante ida hosi polítika Governu nian", afirma hosi José Ramos-Horta iha deklarasaun sira ba Lusa.

"Laiha falta interesadu sira. No iha empreza xineza sira ne'ebé hakarak atu sira sai hanesan investidor úniku tanba sira konsidera katak ne'e sei sai fásil liu hodi foti desizaun sira, maibé ne'e la'ós hanesan preferénsia timoroan nian", nia hatutan mós.

Ramos-Horta hatete katak nia ko'alia kleur ho Xanana Gusmão kona-ba asuntu ne'e no líder istóriku timoroan "la konkorda ho investidor sira hosi nasaun ida de'it ka hosi empreza ida de'it" maibé hili "mistura ida, australianu sira, xinés sira, amerikanu sira ka europeiu sira, no ho modelu sira finansiamentu nian ne'ebé la hanesan".

"Xanana iha duni preferénsia ne'e hodi iha parseiru oioin. Ne'e iha vantajen sira. Timor sei iha nafatin pozisaun desizivu, liuliu iha downstream no nune'e sei fó benefísiu ba reseita hamutuk dolar biliaun resin", nia refere.

"Planu negósiu sira ne'ebé Timor prepara ona inklui empreza ho investidor oioin", nia subliña.

José Ramos-Horta kritika ona notísia oioin ne'ebé ikus ne'e mosu iha imprensa australianu, hodi haktuir akadémiku sira hosi nasaun, ne'ebé tenta "fa'an" ideia katak Xina sei kontrola projetu tomak.

"Akadémiku balun nia aat maka, hodi halo kareira, sei hakerek ensaiu sira no Timor-Leste hanesan vítima ida hosi ensaiu sira ne'ebé maka halo riku kareira hosi akadémiku sira balun iha Austrália. No hafoin ne'e jornal sira haktuir ema sira ne'e no la ko'alia ho ema timoroan sira", nia hatete.

"Hafoin mosu notísia sira katak Timor-Leste sei husu empréstimu hamutuk millaun 15 ba Xina. Nunka ko'alia kona-ba asuntu ne'e, polítika Governu nian no liuliu determinasaun hosi responsável ba projetu Tasi Mane, Xanana Gusmão, maka diversifika, iha kualidade ida relasionadu ho investidor alargadu", nia konsidera.

Ramos-Horta, admiti interese boot hosi Xina iha projetu ne'e, hatete katak ikusmai sei benefisia Timor-Leste tanba bele lori parseiru sira seluk, hanesan Austrália, Koreia ka Japaun.

"Ami lakohi tama iha jogu estratéjiku hosi rivalidade sira ne'e. Ami husik ba boot sira hodi joga. Maibé konsekuénsia hosi ne'e maka Timor hetan benefísiu no iha relasaun di'ak sira ho sira hotu", nia refere.

Projetu Greater Sunrise konstitui investimentu boot hosi Governu timoroan, tanba uza ona dolar millaun 650 hosi fundu petrolíferu hodi sosa partisipasaun maioria ida iha konsórsiu ne'ebé sei hala'o komponente ‘upstream’ hosi projetu.

Francisco Monteiro, prezidente hosi petrolíferu Timor Gap - ne'ebé sosa ona partisipasaun hodi Estadu timoroan nia naran - hatete katak Timor-Leste hakarak evita uza Fundu Petrolíferu hodi selu kustu sira hosi kapital to'o dolar norte-amerikanu biliaun 12 ba dezenvolvimentu hosi projetu gazodutu ba Timor-Leste no prosesamentu iha kosta-súl.

Hafoin hahú produsaun, hein retornu finanseiru ida ne'ebé bele hetan to'o dolar biliaun 28, nia esplika.

Iha nível global, inklui Greater Sunrise, Timor Gap hatete katak nasaun iha potensial hanesan ho biliaun 6,3 hosi baril petroléu hodi esplora iha tinan 50 oinmai, ho folin ida dolar biliaun 378.

Potensial hosi esplorasaun ne'e bele reprezenta injesaun ida hamutuk dolar biliaun 223 iha ekonomia, iha serbisu sira hanesan enjeñaria, dezenvolvimentu, manutensaun ho operasaun sira, no benefísiu fiskal sira no rendimentu públiku sira liu biliaun 47.

Lusa

 


Comentários

Critério de publicação de comentários