Pájina aktualizada iha 10:51h, sesta-feira 19 Jullu

Pelumenus ema na'in 158 kriminalizadu tanba ajuda humanitáriu iha Europa dezde 2015

09 de Julho de 2019, 23:58

Pelumenus halo ona investigasaun ka akuza formalmente ema na'in 158 tanba ajuda humanitáriu iha nasaun europeu sira, entre tinan 2015 no 2018, liuliu iha Itália, Grésia ho Fransa, fó sai hosi estudu ida hosi ReSOMA (Plataforma Sosial hosi Investigasaun kona-ba Migrasaun ho Azilu).


Relatóriu, publika iha final fulan-Juñu, indika katak númeru hosi kazu sira aumenta maka'as iha tinan 2018, ho sidadaun na'in 104 maka kriminalizadu, hanesan dobru hosi tinan 2017.

"Kriminalizasaun hosi solidariedade la afeta de'it defensor sira hosi direitu ema nian, voluntáriu sira no tripulante sira hosi ró humanitáriu sira ne'ebé halo operasaun iha tasi, maibé afeta mós sidadaun normal sira, médiku sira, jornalista sira, autarka sira ho líder relijiozu sira", hatete iha dokumentu ne'ebé iha títulu "Crackdown on NGOs and volunteers helping refugees and other migrants".

Grésia ho prosesu hamutuk 53, Itália ho 38 no Fransa ho prosesu hamutuk 31 hanesan nasaun sira ne'ebé rejista ona kazu barak, maibé ReSOMA identifika mós sidadaun sira ho Organizasaun sira ne'ebé la'ós Governu nian iha Béljika, Kroásia, Dinamarka, Alemaña, Holanda, España, Suésia ho Reinu Unidu.

Nasaun sira ne'e halo parte iha liña oin hosi fluksu migratóriu sira, maski ho dalan oioin, indika hosi ReSOMA.

Króásia, Grésia, Itália ho España, foin lalais, sai hanesan destinu dahuluk sira ba ema sira ne'ebé buka protesaun internasional no reprezenta fronteira externa sira Europa nian. Béljika, Dinamarka, Fransa, Alemaña, Holanda, Suésia ho Reinu Unidu hanesan nasaun sira ho destinu final hosi sira ne'ebé hili, iha kazu balun, polítika restritivu sira iha jestaun fronteira nian. Estudu refere katak falta informasaun kona-ba kazu sira hosi kriminalizasaun solidariedade nian iha nasaun sira Europa Leste nian no hatudu nesesidade hodi reforsa investigasaun iha área ne'e.

Levantamentu ne'ebé halo hosi ReSOMA permiti hatene katak númeru hosi kazu sira aumenta maka'as hafoin tinan 2015, bainhira identifika de'it kazu hamutuk ualu.

Iha tinan 2018 hanesan tinan rekord, ho total ida kazu hamutuk 24, envolve ema na'in 104 iha Estadu-membru hitu, bainhira iha trimestre dahuluk tinan 2019 nian iha prosesu hamutuk 15 ne'ebé akontese iha nasaun neen, envolve sidadaun ho voluntáriu hamutuk na'in 79. Iha tinan 2016 ho 2017, hetan ona kazu hamutuk 39 ne'ebé implika ema na'in 96.

Durasaun médiu hosi kazu sira ne'e maka loron rua.

Entre prosesu hamutuk 158, kazu hamutuk 83 envolve fasilitasaun entrada ka tránzitu hosi migrante sira, kazu hamutuk 18 fasilitasaun hosi estadia ka rezidénsia no ema na'in 57 hetan investigasaun tanba fasilita entrada ho permanénsia hosi migrante sira ka motivu sira seluk, inklui asosiasaun kriminozu, sabotajen, jestaun ilegal hosi foer sira ka lavajen osan nian.

ONG ho asosiasaun sira hamutuk 16 afetadu mós ho kriminalizasaun formak ka investigasaun ba nia voluntáriu sira: Association nationale d'assistance aux frontières pour les étrangers (anafé), Are you Syrious (AYS), Calais Action, Calais Solidarité, Jugend Rettet, Habitat E Citoyenneté, Open Arms, Médicins Sans Frontières (MSF), Mediterranea Saving Humans, Plateforme pour le Service Citoyen, PROEM-AID, Team Humanity, Emergency Response Centre International’s (ERCI), Roya Citoyenne, Sea Watch, Walking and Borders NGO.

ReSOMA identifika ona kazu hamutuk 17 ne'ebé maka iha kondena ona ema na'in 30 ne'ebé halo atuasaun ho objetivu humanitáriu ka reagrupamentu familiar iha estadu-membru neen, ho Fransa lidera iha kondenasaun sira: pelumenus ema na'in 19, inklui defensor sira direitu ema nian, voluntáriu sira ho sidadaun baibain.

Iha Portugal, kriminalizasaun humanitáriu koñesidu maka Miguel Duarte, portugés ida ho tinan 26 ne'ebé hetan hela investigasaun iha Itália tanba ajuda imigrasaun ilegal hamutuk ho tripulante na'in sia seluk hosi ró Iuventa hosi ONG alemaun Jugend Rettet.

Tuir informasaun hosi Ministériu Negósiu Estranjeiru, Governu portugés akompaña mós, iha tinan 2018, liuhosi sesaun konsular hosi Embaixada Portugal iha Atenas, sidadaun portugeza ida ne'ebé hela iha estranjeiru, indisiadu ho julgadu, iha Grésia, tanba akuzasaun ajuda imigrasaun ilegal maibé prosesu hotu ona.

Kazu koñesidu seluk maka joven ativista síria refujiada Sarah Mardini ne'ebé pasa ona loron hamutuk 106 iha kadeia gregu sira no hetan ona liberdade ho kausaun.

ReSOMA nia serbisu sentra iha investigasaun sira ho prosesu formal sira ne'ebé autoridade nasional sira halo ho baze hosi "Diretivu Auxíliu" (fasilitasaun ba entrada, tránzitu ho iregular sira).

ReSOMA hanesan projetu ida ho durasaun tinan rua ne'ebé selu hosi fundu europeu sira.

Lusa

 


Comentários

Critério de publicação de comentários