Pájina aktualizada iha 11:01h, sesta-feira 19 Jullu

Apple inaugura sentru dahuluk ba dezenvolvimentu hosi 'app sira' iha Xina

10 de Julho de 2019, 21:15

Empreza teknolojia boot norte-amerikanu Apple inaugura iha loron-kuarta ne'e sentru dahuluk ba dezenvolvimentu hosi aplikasaun sira iha Xina, reforsa kompromisu ho merkadu boot ida, iha momentu ne'ebé iha konflitu komersial sira entre Pekin ho Washington.


Tuir jornal Shanghai Daily, sentru hosi design ho dezenvolvimentu inaugura ona iha Xangai, 'kapital' finanseiru Xina nian, no sei ajuda atende kriador hosi aplikasaun sira ba dispozitivu Apple hamutuk millaun 2,5.

Sentru sei fornese asisténsia tékniku liuhosi konferénsia sira, semináriu sira ho treinu, hatán nune'e ba pedidu hosi programador xinés sira ne'ebé reklama ona susar hodi komunika ho empreza.

Xina iha kriador aplikasaun sira Apple nian hamutuk millan 2,5 resin no, hahú hosi tinan 2010, bainhira App Store estreia iha nasaun, kriador xinés sira hetan osan liu yuan millaun 200.000 (euro millaun 26.200 resin) liuhosi fa'an 'app sira' iha mundu tomak.

Apple iha sentru haat seluk ba Peskiza ho Dezenvolvimentu iha nasaun - Pekin, Shenzhen, Xangai ho Suzhou - iha investimentu total ida yuan biliaun 3,5 (euro millaun 454), ne'ebé só serbisu ba ema rihun ida resin iha área sira hanesan hardware, software ho serbisu sira.

Iha tinan 2018 nia rohan, empreza iha loja ho total 51 iha Xina.

Abertura hosi sentru ne'e akontese iha períudu ida tensaun nian entre Estadus Unidus ho Xina tanba polítika industrial sira ho teknolójiku sira Pekin nian.

Donald Trump nia administrasaun bandu ona empreza sira hosi nasaun hodi fornese teknolojia importante ba empreza xineza boot hosi telekomunikasaun Huawei, medida ne'ebé ikusmai suspende tiha.

Apple hanesan empreza ida ne'ebé kondena publikamente konflitu komersial sira, liuhosi karta ida ne'ebé haruka ba autoridade norte-amerikanu sira, ne'ebé apela hodi la aumenta taxa alfandegáriu sira kona-ba sasán sira ne'ebé halo iha Xina, tanba sei afeta produsaun hosi iPhone, "hamenus" kontribuisaun hosi empreza ba ekonomia norte-amerikanu nian.

CEO empreza nian, Tim Cook, alerta ona iha inísiu Janeiru ba impaktu hosi konflitu iha karta ida ne'ebé haruka ba asionista sira.

Tim Cook haree diminuisaun ba espetativu sira hosi reseita sira no alerta ona ba diminuisaun hosi fa'an iPhone tanba diminuisaun hosi ekonomia xineza ho ba impaktu hosi funu komersial.

Lusa

 


Comentários

Critério de publicação de comentários