Pájina aktualizada iha 11:21h, sesta-feira 19 Jullu

Eis-sekretáriu-jeral ONU preokupadu ho situasaun rohingya nian iha Bangladexe

11 de Julho de 2019, 22:00

Antigu sekretáriu-jeral hosi ONU, Ban Ki-moon, hatudu preokupasaun ho udan-boot ne'ebé maka hamosu hela risku iha refujiadu sira rohingya, hosi Myanmar, sira nia moris ne'ebé maka hela iha kampu sira iha Bangladexe.


Iha kualidade nu'udar xefe hosi Komisaun Global kona-ba Adaptasaun hosi Mudansa Klimátiku (CGA), Ban Ki-moon vizita ona iha loron-kuarta kampu Kutupalong, situa iha distritu Cox’s Bazar, ne'ebé maka agora daudaun rezidi musulmanu sira rohingya hamutuk rihun ida resin, sira ne'ebé maka halai hosi Myanmar tanba represaun sira ne'ebé maka sira hetan iha nasaun orijen.

Ban Ki-moon hatete katak "senti triste ho dezanimadu" ho situasaun ne'ebé maka nia haree ona durante pasajen hosi kampu refujiadu sira nian.

Bangladexe iha istorial ida hosi siklone violentu sira, maibé konsege ona hamenus númeru hosi estraga sira bainhira investe iha infraestrutura públiku sira, hanesan estrada sira ho fatin sira ne'ebé destinadu rasik ba siklone sira no aposta mós iha formasaun ba voluntáriu sira iha zona tasi-ibun sira iha rejiaun, ne'ebé iha tasi-ibun sira ne'ebé naruk iha mundu.

Iha loron-kuarta, Unicef alerta ona katak labarik millaun resin iha kampu refujiadu sira Rohingya nian no iha komunidade sira akollimentu iha Cox’s Bazar, iha Bangladexe, iha risku tanba inundasaun sira ho rai-monu ne'ebé maka kauza hosi udan-boot iha loron hirak ikus ne'e.

Ajénsia ONU alerta ona, liuhosi komunikadu imprensa ida, ba situasaun "importante tebes", hodi adianta katak família hamutuk rihun haat resin afetadu, barak maka transfere ba "área sira ne'ebé seguru liu".

Tuir komunikadu, labarik na'in ida ho tinan hitu mout no labarik na'in rua seluk kanek.

Unicef hatutan ona katak konsekuénsia sira inklui estraga iha "sentru sira aprendizajen infantil" hamutuk atus resin, halo labarik hamutuk 60.000 resin laiha aula, no pelumenus Sentru Protesaun Infantil hamutuk 12 hetan estraga no parke infantil ida nakonu ho bee tanba udan maka'as.

"Hanesan laiha posibilidade hanoin oinsá maka joven sira ne'e hela iha kondisaun ida hanesan ne'e… Ha'u hatene katak haensan joven hamutuk meiu millaun", deklara hosi Ban ba ajénsia notísia Associated Press bainhira vizita kampu ne'e.

Eis-sekretáriu-jeral hala'o vizita hamutuk ho diretora ezekutivu hosi Banku Mundial, Kristalina Georgieva, ho komisáriu sira seluk hosi Komisaun Global.

Ban ho líder sira seluk hosi Komisaun iha mós oportunidade hodi semo iha área ne'ebé afetadu ho helikópteru ida hosi Forsa Aéreu, hosi kapital to'o Cox’s Bazar.

"Bangladexe, klaru, hanesan nasaun ida ne'ebé fraku tebes no mudansa klimátiku akontese beibeik", hatutan hosi Ban ne'ebé hasoru malu ho primeira-ministra, Sheikh Hasina, hodi ko'alia kona-ba esforsu sira nasaun nian hodi kombate inundasaun sira, aumentu hosi nível tasi nian ho klima extremu.

"Nasaun investe hela iha eskala boot, ho vizaun hosi primeira-ministra Hasina. No tanba ne'e maka ami mai iha ne'e, hodi aprende lisaun sira hosi Bangladexe no hodi fahe mensajen ne'e ba mundu tomak", hatete hosi Ban.

Kristalina Georgieva valoriza ona progresu hosi nasaun bainhira hamenus estraga sira ne'ebé halo hosi udan-boot ne'e.

Komisaun Global ba Adaptasaun lansa ona ho ajuda hosi nasaun hamutuk 17 inklui Xina, Kanadá ho Reinu Unidu no hosi nasaun sira ne'ebé fraku hasoru mudansa klimátiku sira, hanesan Bangladexe ho Illa Marshall sira.

Lusa

 


Comentários

Critério de publicação de comentários