Pájina aktualizada iha 11:21h, sesta-feira 19 Jullu

Vatikanu: Rate sira ne'ebé loke hodi buka adolesente ne'ebé lakon hanesan rate mamuk

11 de Julho de 2019, 22:49

Rate sira hosi prinseza na'in rua ne'ebé maka hakoi iha sékulu XIX, iha loron-kinta ne'e loke iha esperansa hetan mate-isin hosi adolesente feto ida ne'ebé lakon misteriozamente iha tinan 1983, laiha restu mortal ruma, anunsia hosi Vatikanu iha komunikadu ida.


"Peskiza iha rezultadu negativu ida: la hetan restu humanu ruma no laiha urna funeráriu ruma", anunsia iha komunikadu hosi diretor hosi sala imprensa Vatikanu nian, Alessandro Gisotti.

Rate sira ne'e loke iha loron-kinta dadeer hodi hatán ba pedidu hosi família adolesente nian, Emanuela Orlandi, ne'ebé lakon dezde tinan 1983.

Bainhira loke rate sira, advogada família nian, Laura Sgro, hakfodak ho rezultadu.

"Rate sira hanesan mamuk. Ami senti surprendidu", hatete hosi advogada.

Pedidu hosi família mosu hafoin advogada simu karta anónimu ida ho sujestaun katak Emanuela nia mate-isin bele iha rate sira ne'e ida nia laran, lokaliza iha semitériu ki'ik ida iha Sidade Vatikanu.

Família sira hosi prinseza na'in rua ne'e konkorda ona hodi loke no "informadu ona kona-ba rezultadu", afirma hosi fonte Vatikanu nian.

Rate sira hosi prinseza Sophie von Hohenlohe (mate iha tinan 1836) no prinseza Charlotte-Frédérique de Mecklembourg (mate iha tinan 1840) hanesan mamuk loos.

Hala'o daudaun verifikasaun sira iha arkivu sira hodi hatene natureza hosi obra sira ne'ebé halo iha rate ne'e, balun iha data harii iha final hosi sékulu XIX no sira seluk iha tinan 1960 no 1970.

Emanuela Orlandi lakon iha loron 22 Juñu 1983, bainhira iha tinan 15, hafoin sai hosi uma, iha Vatikanu, hodi ba aula múzika ida iha Roma.

Nia kazu hanesan kazu ida ne'ebé nakonu ho mistériu maka'as iha Itália, iha teoria sira ne'ebé hatete katak iha implikasaun hosi máfia ka Vatikanu.

Lusa

 


Comentários

Critério de publicação de comentários