Pájina aktualizada iha 10:41h, sesta-feira 19 Jullu

Guiné Ekuatorial organiza hela Obiang nia vizita ba Portugal

12 de Julho de 2019, 20:53

Prezidente Guiné Ekuatorial nian, Teodoro Obiang, afirma iha loron-sesta ne'e katak nia serbisu diplomátiku organiza hela nia deslokasaun ba Portugal ne'ebé sei inklui vizita ida ba Santuáriu de Fátima.


"Ha'u organiza hela vizita ida ba Portugal. No, karik bele, bainhira vizita Portugal, ha'u sei halo vizita ida ba Fátima. Ne'e trata hela liuhosi dalan diplomátiku", Obiang afirma iha entrevista ba ajénsia Lusa iha Malabo.

Guiné Ekuatorial hanesan nasaun ida ho maioria katólika iha sub-rejiaun ida ho prezensa musulmanu forte no adere ona ba Komunidade hosi Nasaun sira ho Lian Portugeza (CPLP) iha tinan 2014. Iha Portugal, forsa polítika sira ho organizasaun sira hosi sosiedade sivil kritika nafatin adezaun Guiné Ekuatorial nian, hodi akuza Governu Malabo ba violasaun oioin ba direitu ema nian no blokeia asaun hosi opozitor polítiku sira.

Obiang justifika adezaun ba CPLP ho ligasaun ne'ebé Guiné Ekuatorial iha ho nasaun afrikanu sira ho espresaun portugeza nian.

Hanesan kolónia portugeza to'o tinan 1777, loron ne'ebé maka entrega ba koroa española tanba troka iha normalizasaun hosi fronteira sira Brazil nian, Guiné Ekuatorial hanesan nasaun afrikanu úniku ne'ebé maka lian españól hanesan lian prinsipal no hanesan evidente ligasaun istóriku sira ho jeográfiku sira ho São Tomé & Prínsipe.

Obiang nia primeira-dama daruak hanesan ema saun-tomense no illa rua ne'ebé maka forma São Tomé & Prínsipe hanesan limitadu ba norte ho súl hosi illa ekuato-guiniense sira Bioko ho Ano Bom.

"CPLP hanesan movimentu kultural ida no ha'u iha viziñu sira ne'ebé hanesan hosi espresaun portugeza: ha'u iha São Tomé ne'ebé besik tebes, ha'u iha afinidade ho Guiné Bissau ho Cabo Verde. Iha ne'e iha ema barak ne'ebé mai hosi Cabo Verde. Ha'u iha relasaun sira ho Angola ho Mosambike. Hanesan relasaun kultural sira ne'ebé ami iha ho nasaun sira ne'e maka halo ami tama iha dinámika CPLP nian", Teodoro Obiang rezumi.

Kona-ba Portugal, Prezidente ekuato-guiniense rekorda ona katak heransa portugeza afetadu hosi kolonizasaun española.

"Portugal uluk iha rekursu ekonómiku importante sira iha Guiné Ekuatorial. Iha rosa boot sira, kinta boot sira maibé kolonizasaun española la fasilita ba sé maka bele kontinua investe iha Guiné Ekuatorial", nia hatutan.

Tanba ne'e, ohin loron, presiza "rekupera heransa portugeza", nia hatete hodi rekorda katak "Portugal maka deskobre ona illa Fernão Pó no fó ona naran ba fatin ne'e".

"Ami iha orijen sira iha sivilizasaun portugeza no ami nia hakarak maka fila ba kultura antigu ne'ebé ami iha antigamente", hodi buka "adere no tama iha dinámika ho kultura portugeza", nia hatete hodi justifika mós nune'e entrada iha CPLP.

Entre reforsu sira hosi Governu ekuato-guiniense, Obiang salienta ona katak "aprende daudaun lian portugés" iha nasaun, la esklarese númeru hosi alunu sira.

Iha parte seluk, "rádiu ho televizaun agora hahú divulga notísia sira iha lian portugés".

"Neineik ami tama iha kultura portugeza", nia rezumi.

Teodoro Obiang fó entrevista sira ba Ajénsia Lusa no ba jornal fransés L’Opinion, hafoin serimónia entrada hosi Partidu Demokrátiku hosi Guiné Ekuatorial (PDGE, iha poder), hanesan observador, iha Internasional Demokrátika hosi Sentru Áfrika (IDC, ne'ebé reprezenta partidu sira hosi sentru-direita).

Lusa

 


Comentários

Critério de publicação de comentários