Pájina aktualizada iha 10:41h, sesta-feira 19 Jullu

Guiné Ekuatorial presiza apoiu hosi FMI hodi kombate krizi

12 de Julho de 2019, 22:08

Prezidente Guiné Ekuatorial, Teodoro Obiang, afirma iha loron-sesta ne'e katak nasaun presiza rekursu finanseiru sira no apoiu sira hosi Fundu Monetáriu Internasional (FMI) hodi hasoru krizi ekonómiku, ne'ebé sai aat liu tanba diminuisaun hosi folin sira petróleu nian.


"Ami iha reprezentante sira hosi Fundu ne'ebé maka asisti ami", maibé "ami seidauk iha akordu ida", afirma hosi Teodoro Obiang, ba ajénsia Lusa, iha Malabo.

Xefe Estadu garanti ona katak "akordu sei to'o iha momentu loloos", maibé garanti katak "ne'e depende hosi Fundu" no la'ós hosi autoridade ekuato-guiniense sira.

"Ami iha nesesidade hodi konsege rekursu [finanseiru sira] tanba krizi, ami husu fundu sira hodi hadi'a jestaun ekonómiku nasaun nian", nia afirma.

Negosiasaun sira reflete iha kestaun sira hosi ‘governance’ ho transparénsia hosi konta públika sira no Teodoro Obiang admiti susar hodi hetan baze entendimentu ida.

"Bainhira FMI la hetan situasaun di'ak ida, karik labele liberta rekursu sira, maibé ha'u senti konfiante katak ami konsege hela nível sira hodi liberta fundu sira", afirma hosi Obiang, hodi salienta katak nia nasaun sofre, hanesan nasaun sira seluk, tanba konjuntura internasional.

"Krizi ekonómiku hanesan jeneralizadu maibé buat di'ak ida maka ami laiha dívida externu", nia afirma.

Dívida públika externa, kalkula hosi FMI, hatudu ba 13% iha tinan 2019.

Kona-ba "dívida interna hanesan bele oituan tebes hodi konsidera hanesan dívida tanba empreza sira ne'ebé hala'o projetu sira iha Guiné Ekuatorial hetan finansiamentu hosi Governu" no "labele kesar buat ida".

Kona-ba futuru, Obiang hein katak nasaun asegura diversifikasaun ekonomia nian, ne'ebé depende kompletamente hosi petróleu no hosi folin sira mina-rai nian iha merkadu internasional sira.

"Ha'u nia hakarak maka atu Guiné Ekuatorial sai hanesan nasaun autosufisiente ida, ho diversifikasaun ekonomia nian no bele kompete ho nasaun sira seluk. Ne'e hanesan ha'u nia hakarak", nia hatete.

Guiné Ekuatorial nia ekonomia hahú rekua dezde tinan 2015, tinan ne'ebé rejista ona aumentu negativu ida hosi 9,1%, rejista mós kontrasaun ekonómiku sira hosi 8,8% no 4,7% iha tinan rua konsekutivu, kalkula ba rekua foun ida ho 3% resin iha tinan ne'e ho tinan liubá.

Agora daudaun, Guiné Ekuatorial anunsia ona adezaun ba programa avansadu hodi divulga informasaun sira (Enhanced General Data Dissemination System) hosi Fundu Monetáriu Internasional (FMI), plataforma ida aprezentasaun nian hosi informasaun ofisial sira hosi nasaun ida-idak, hodi "serve pontu úniku ida publikasaun nian ba informasaun makroekonómiku importante sira kona-ba konta nasional sira, operasaun governamental sira no tusan, área monetáriu ho finanseiru, ho balansu pagamentu sira nian".

Iha fulan-Juñu, Banku Afrikanu Dezenvolvimentu nian, ne'ebé halo ona Enkontru Anual sira iha Malabo, anunsia apoiu ida, to'o tinan 2023, hamutuk dolar millaun 433 (euro millaun 385,7) ba área agríkola, peska ho aeroportuáriu Guiné Ekuatorial nian, aleinde reforsa jestaun hosi finansa públika.

"Apoiu ne'e mosu iha kontestu ida hosi diminuiaun folin sira petróleu nian, ne'ebé hahú iha 2014, no hosi programa ida reforma ekonómiku ho finanseiru nian ne'ebé apoia hosi FMI liuhosi área prioritáriu haat: modernizasaun hosi kuadru regulamentar hosi finansa públika, reforsu hosi mobilizasaun hosi reseita sira ne'ebé la'ós petrolíferu, informatizasaun hosi autoridade finanseiru sira ho fortalesimentu hosi kapasidade sira jestaun nian iha finansa públika", hatutan hosi komunikadu ne'ebé fó sai iha fulan-Juñu.

Teodoro Obiang fó entrevista sira ba Ajénsia Lusa no ba jornal fransés L’Opinion, hafoin serimónia entrada hosi Partidu Demokrátiku hosi Guiné Ekuatorial (PDGE, iha poder), hanesan observador, iha Internasional Demokrátika hosi Sentru Áfrika (IDC, ne'ebé reprezenta partidu sira hosi sentru-direita).

Lusa

 


Comentários

Critério de publicação de comentários