Pájina aktualizada iha 21:55h, kuarta-feira 20 Novembru

Ema venezuelanu hamutuk millaun 13 asina ona manifestu hodi lori ba Guterres kontra blokeiu EUA nian

11 de Agosto de 2019, 07:01

Ema venezuelanu millaun 13 resin asina ona, iha loron-sábadu ne'e, manifestu ida ne'ebé sei lori ba sekretáriu-jeral ONU nian, António Guterres, kontra kastigu sira ho blokeiu hosi Estadus Unidus hasoru nasaun ne'e.


"Ami iha asinatura hamutuk millaun 13 resin, iha de'it pátria venezuelanu", hatete hosi ministru venezuelanu hosi Komunikasaun ho Informasaun nian.

Jorge Rodríguez ko'alia ba jornalista sira, iha Caracas, iha ámbitu hosi jornada mundial dahuluk hosi protestu kontra Prezidente EUA nian, Donald Trump, ne'ebé halibur venezuelanu hamutuk millaun resin iha rejiaun oioin iha nasaun, liuliu iha Caracas, Miranda, Lara, Portuguesa, Sucre ho Mérida.

Hatais mean (kór hosi revolusaun), ema venezuelanu sira halo marxa hodi hakilar fraze sira hanesan "Trump hasai liman hosi Venezuela" ho hatudu kartáz ho mensajen sira hanesan "Laiha tan Trump" no "Trump, desblokeia Venezuela".

Manifestu nia objetivu maka eziji hapara blokeiu hosi Estadus Unidus ho "respeita ba soberania" Venezuela nian no sei lori iha loron hirak tuirmai ne'e ba ONU, tanba, haktuir ministru, Venezuela iha direitu ba futuru ida, ba respeitu ba nia autodeterminasaun ho harii nia modelu ekonómiku rasik, polítika, sosial ho kultural.

"Ami sei hatete ba sistema (ONU nian) katak Venezuela hamriik nafatin, hanesan independente ho hanesan soberanu", nia hatete.

Iha loron 05 Agostu, Estadus Unidus fó sai konjelamentu hosi ativu tomak hosi Governu venezuelanu, desizaun ida ne'ebé fó sai hosi White House no ne'ebé hamosu tensaun oioin ho Prezidente venezuelanu Nicolás Maduro.

Bandu ba ema norte-amerikanu sira hodi halo negósiu ruma ho Governu Venezuela nian hahú hala'o lalais ona.

Tuir ministru venezuelanu hosi Relasaun Exterior, Jorge Arreaza, desizaun hosi Washington "hamosu risku ba prosesu petrolíferu sira Venezuela nian", bainhira hamosu susar ba "importasaun hosi parte sira ho sasán sira" no obtensaun hosi diluente sira ho transporte internasional.

Maibé, Jorge Arreaza garanti ona katak Venezuela sei firmi nafatin hodi harii dalan alternativu foun sira.

"Hasoru atake sira ne'e ami preparadu ona. Ami harii ona dalan alternativu sira tanba ami la monu hasoru situasaun ruma", nia asegura.

Iha parte seluk, Prezidente Venezuela nian, Nicolás Maduro, konvoka ona ba loron-sábadu ne'e jornada mundial ida protestu nian hasoru desizaun hosi Estadus Unidus hodi konjela ativu sira hotu hosi Governu venezuelanu nian iha teritóriu norte-amerikanu nian.

Iha tinan 2017, Venezuela iha populasaun hamutuk millaun 31,98.

Pelumenus ema venezuelanu hamutuk millaun haat husik ona nasaun dezde tinan 2005, halai hosi krizi polítika, ekonómika ho sosial.

Lusa

 


Comentários

Critério de publicação de comentários