Pájina aktualizada iha 03:33h, kuarta-feira 22 Agostu

Portugés António Cabral hanoin hikas defeza ba independénsia Timor-Leste nian iha polítika EUA nian

12 de Agosto de 2019, 19:15

António Cabral, deputadu iha Kámara Reprezentante sira Massachusetts nian, hanoin hikas oinsá maka halo parte iha sentru movimentu polítiku norte-amerikanu nian ba independénsia Timor-Leste nian, iha tinan 20 liubá, ho proposta lei ida ho konviti sira ba Ramos-Horta hodi halo diskursu iha Boston.


Polítiku, moris iha Açores ho imigradu iha EUA ho família iha tinan 50 liubá, hetan distinsaun iha tinan 2017 ho Medalla hosi Orden Timor-Leste nian no revela ona katak foin lalais hetan konviti hosi Xanana Gusmão hodi marka prezensa iha selebrasaun sira tinan 20 nian ba Referendu iha Timor-Leste iha loron 30 Agostu.

Reprezentante hosi sidade New Bedford iha Massachusetts State House iha kuaze tinan 30, António Cabral hatete ba ajénsia Lusa katak hanesan proposta lei ida kontra empreza indonézia sira, ne'ebé nia aprezenta, no hamosu atensaun ba problema timoroan nian iha Estadus Unidus.

"Ami konsege hamosu presaun iha administrasaun Bill Clinton nian hodi envolve ho halo intervensaun ho Indonézia hodi bele iha oportunidade ida ba povu timoroan halo desizaun ida ba sira rasik, ne'ebé ikusmai akontese ho referendu", António Cabral hatete iha entrevista ba Lusa.

Hafoin aprezenta tiha proposta lei ida kontra investimentu amerikanu iha negósiu sira ne'ebé iha ligasaun ho Indonézia, António Cabral konvida ona personalidade oioin Timor-Leste nian hodi halo diskursu iha Asembleia Massachusetts nian.

Portugés hanesan intermediáriu ba José Ramos-Horta nia vizita sira iha asembleia lejislativu Boston nian hafoin nia hetan distinsaun ba Nobel Dame nian no, hafoin independénsia, simu mós embaixador dahuluk Timor-Leste nian ba EUA, Constâncio Pinto.

Proposta lei ne'ebé António Cabral aprezenta iha final tinan 1990 defende kastigu ba entidade sira ne'ebé halo investimentu iha negósiu sira ne'ebé iha relasaun ho Indonézia, iha final hosi períudu ne'ebé koñesidu hanesan Okupasaun Indonézia iha Timor-Leste.

"Ha'u aprezenta ona proposta lei ida iha ne'e, iha Massachusetts, hodi nune'e kompañia sira ho sistema reforma sira hosi Estadu rasik la investe iha kompañia sira ne'ebé maka iha ligasaun ho Indonézia", deputadu rekorda.

"Proposta ne'e hamosu kontrovérsia maka'as iha área ekonómiku balun", António Cabral hatutan hodi hatete katak efeitu sira bele senti iha Indonézia ho iha nasaun sira seluk ho interese ekonómiku iha illa aziátiku, liuhosi kompañia boot amerikanu sira nian.

Polítiku rekorda ona katak medida hahú hamosu presaun iha nível kongresista sira ne'ebé reprezenta Massachusetts iha Senadu norte-amerikanu iha Washington, difundi liuhosi senador sira hosi Estadu oioin no to'o iha White House, iha administrasaun Bill Clinton nian.

"Ami kria ona movimentu ne'e, tanba proposta ne'ebé maka ami aprezenta iha ne'e, iha Massachusetts, maka karik hahú kria movimentu nasional ida iha Estadus Unidus, hosi estadu sira seluk", António Cabral konta ba Lusa.

"Ami nia reprezentante sira iha Kongresu iha Washington no iha White House sente ona presaun hosi opiniaun públika ne'ebé maka ami kria iha ne'e no halo ona intervensaun", nia halo rezumu.

José Ramos-Horta simu ona Prémiu Nobel Dame nian iha fulan-Dezembru 1996, hamutuk ho bispu Carlos Filipe Ximenes Belo no, konvidadu hosi deputadu António Cabral, "mai hato'o sasin iha Asembleia Massachusetts nian kona-ba importánsia hosi proposta-lei ne'e" ba Timor-Leste.

"Dr. Ramos-Horta mai iha ne'e dalabarak iha sentidu ne'e, serbisu hodi nune'e iha apoiu", rekorda António Cabral, hodi hatudu fotografia emolduradu ida ne'ebé maka iha nia meza serbisu nia leten iha ativista ho polítiku timoroan nia sorin.

António Cabral vizita ona "nasaun foun" iha tinan 2004 ho 2017, iha tinan 15 independénsia nian, bainhira simu mós Medalla Orden Timor-Leste nian hosi antigu primeiru-ministru Rui Maria de Araújo nia liman.

"Sei iha buat barak atu halo maibé kompara ho ha'u nia vizita dahuluk, bele haree no senti progresu", Cabral hatete.

Asorianu konsidera katak nasaun aziátiku tenki kontinua iha dalan progresu nian ho aposta hodi kria oportunidade sira ba joven sira ne'ebé konstitui parte boot hosi populasaun.

Deputadu hosi Massachusetts fiar katak "lideransa nasaun nian, autoridade oioin ho individualidade sira serbisu daudaun ho maneira importante ida hodi halo atu iha oportunidade barak ba povu timoroan".

"Ha'u senti konfiante atu sira kontinua iha dalan ne'ebé maka halo daudaun, eventualmente sei hanesan nasaun ida ho oportunidade barak ba nia juventude, tanba hanesan nasaun foun ida iha termu populasaun nian", António Cabral hatete.

Lusa

 


Comentários

Critério de publicação de comentários