Pájina aktualizada iha 03:33h, kuarta-feira 22 Agostu

Governu xinés aponta "indísiu terorizmu nian" iha Hong Kong

12 de Agosto de 2019, 19:39

Governu xinés afirma iha loron-segunda ne'e katak iha "sinal sira terorizmu nian" iha protestu antigovernamental sira iha Hong Kong, agrava nune'e tona kona-ba manifestasaun sira ne'ebé akontese durante fulan rua nia laran iha rejiaun semiautónomu ne'e.


"Manifestante radikal sira iha Hong Kong uza beibeik ona sasán sira ne'ebé perigozu tebes hodi ataka polísia, nune'e hanesan ona krimi todan ida no hatudu sinal dahuluk sira terorizmu nian", hatete hosi porta-vós hosi Gabinete ba Asuntu sira Hong Kong ho Makau nian hosi Konsellu Estadu xinés, Yang Guang.

Yang, ne'ebé iha semana liubá aviza ona katak "sira ne'ebé maka halimar ho ahi sei hetan sunu", denunsia ona "minoria ki'ik ida" ne'ebé konstitui "dezafiu sériu ida ba prosperidade ho estabilidade Hong Kong nian".

Porta-vós afirma ona katak lansa ona bomba insendiáriu sira ne'ebé halo rasik hodi ataka polísia.

Yang nia deklarasaun sira mosu bainhira kumpri findesemana dasanuluk konsekutivu hosi manifestasaun sira iha antigu kolónia britániku, ho manifestante rihun resin dezafia polísia, ne'ebé hatán ho gás lakrimojéneu no kaer ona ema atus resin.

Hong Kong hasoru klima ida protestu sosial ne'ebé mosu tanba aprezentasaun hosi proposta ida ba mudansa lei extradisaun nian, ne'ebé sei permiti ba Governu ho tribunal sira hosi rejiaun administrativu espesial ba estradisaun hosi suspeitu krimi sira nian ba jurisdisaun sira lahó akordu antes, hanesan kazu hosi Xina kontinental.

Maibé, ikusmai proposta ne'e hetan suspensaun maibé manifestante sira jeneraliza ona no agora denunsia saida maka sira afirma hanesan "erozaun ida hosi liberdade sira" iha antigu kolónia británika no demisaun hosi Carrie Lam, xefe hosi governu lokal, pró-Pekin, bainhira sira apela ba eleisaun hosi susesor ida liuhosi eleisaun universal diretu, no la'ós nomeia hosi Governu sentral.

Iha semana liubá, reprezentante ida hosi Governu xinés iha Hong Kong alerta ona katak Pekin hanoin foti medida sira iha rejiaun semiautónomu, ne'ebé hasoru "situasaun todan liu dezde transferénsia hosi soberania" ba Xina iha tinan 1997.

To'o agora, Xina la halo intervensaun direta maski liuhosi editorial sira iha imprensa ofisial ho deklarasaun sira hosi autoridade sira, kondena manifestante sira ho organizador sira, hodi bolu sira hanesan kriminozu, pallasu ho radikal violentu sira, bainhira kontrola narativa kona-ba protestu sira.

Pekin responsabiliza mós interferénsia estranjeira, liuliu hosi Estadus Unidus, ba protestu sira, hodi estimula nasionalizmu internu.

Autoridade sira aponta mós artigu ida iha lei Hong Kong nian ne'ebé permiti atu tropa sira ne'ebé estasionadu iha sidade ajuda "mantén orden públika", ho pedidu hosi governu Hong Kong.

Lusa

 


Comentários

Critério de publicação de comentários