Pájina aktualizada iha 09:45h, sabado 14 Dezembru

Prezidénsia hatete katak la simu nota tomak hosi aprovasaun ba embaixador foun sira

14 de Agosto de 2019, 19:50

Iha loron-kuarta ne'e Prezidénsia fó sai katak simu de'it hosi Governu nota sira aprovasaun nian ba embaixador foun na'in tolu, hosi lista naruk ida hosi na'in 16, tanba ne'e maka fó de'it pose ba diplomata sira ne'e.


Iha komunikadu, prezidénsia refere katak xefe Estadu, Francisco Guterres Lu-Olo, fó ona pose ba embaixador foun hosi Timor-Leste sira iha Brazil, Estadus Unidus ho Nova Zelándia, falta de'it fó pose ba embaixador na'in sanulu resin ne'ebé maka hato'o hosi Governu.

Tomada pose ne'e akontese lahó prezensa hosi ministru Negósiu Estranjeiru ho Koperasaun, Dionísio Babo iha Palásiu Prezidensial.

Iha komunikadu, Prezidénsia esplika katak atu embaixador sira bele simu pose presiza "simu akordu ida/agréement hosi nasaun ne'ebé maka diplomata sei sai hanesan akreditadu".

Embaixador sira ne'ebé simu ona pose - "diplomata sira kareira nian no funsionáriu importante sira hosi Ministériu Negósiu Estranjeiru ho Koperasaun (MNEC) nian" - simu ona akordu ne'e, iha kazu rua "simu ona iha tinan ida resin nia laran" no ida seluk "simu iha fulan sia liubá".

MNEC, esplika iha komunikadu, haruka ona iha loron 31 Jullu ofísiu ida ne'ebé "aneksa ona kópia sira hosi akordu sira/agréement sira ne'ebé maka fó ona hosi nasaun reseptor sira", nune'e xefe Estadu prepara dekretu sira nomeasaun nian no marka ona pose ba loron 13 Agostu, hodi informa MNEC iha loron 09 Agostu.

"Prosesu sira ne'e akontese ho dalan kordenadu entre MNEC ho Prezidénsia Repúblika", refere iha komunikadu, ne'ebé refere mós katak "prezensa hosi ministru Negósiu Estranjeiru ho Koperasaun nian sai hanesan indispensável no, tuir prátika ne'ebé hala'o, la presiza atu konviti konta ho nia prezensa iha serimónia sira hanesan ne'ebé prezidi hosi Xefe Estadu".

Olímpio Branco simu pose nu'udar embaixador iha Brazil, ne'ebé uluk sai ona nu'udar sekretáriu-jeral hosi Ministériu Negósiu Estranjeiru ho Koperasaun kaer ona knaar sira iha Xina ho Kuba.

Ba Estadus Unidus maka hili ona Isílio Coelho, ne'ebé sai mós nu'udar sekretáriu-jeral hosi Ministériu Negósiu Estranjeiru ho Koperasaun no kaer ona knaar nu'udar embaixador iha Japaun.

Isualdo Gaspar uluk hanesan funsionáriu antigu iha MNEC ne'ebé kaer ona knaar oioin, sei hanesan embaixador foun iha Nova Zelándia.

Diplomata na'in tolu hosi kareira hetan nomeasaun ona hosi Governu anterior, halo parte hosi lista ida ho naran hamutuk 16 ne'ebé maka ezekutivu atual haruka ona ba Lu-Olo iha inísiu tinan ne'e.

Entre diplomata sira ne'ebé maka propostu hosi Governu no ne'ebé maka seidauk simu pose maka iha embaixador foun sira ba Portugal ho ba Austrália.

Lusa

 


Comentários

Critério de publicação de comentários