Pájina aktualizada iha 01:50h, domingu 23 Setembru

Dionísio Babo sei hasoru malu ho Prezidente hodi analiza lista hosi embaixador foun sira

16 de Agosto de 2019, 22:27

Ministru Negósiu Estranjeiru hatete iha loron-sesta katak sei hasoru malu, iha semana oinmai, ho Prezidente Repúblika hodi analiza lista hosi embaixador foun sira Timor-Leste nian na'in sanulu resin iha nasaun oioin, inklui iha Portugal.


"Señór primeiru-ministru husu ha'u hodi marka audiénsia ida ho Prezidénsia, iha semana oinmai, hodi analiza kestaun ne'e ho Prezidente Repúblika no hodi rona nia opiniaun kona-ba naran sira", nia afirma.

"Ikusmai ha'u sei lori kestaun ne'e ba Governu hodi nune'e bele foti desizaun", nia refere.

Insisti katak "laiha dezakordu" kona-ba naran sira, Babo hatete katak Prezidente Repúblika, Francisco Guterres Lu-Olo, "husu de'it informasaun sira" kona-ba nomeasaun sira.

"Lista depende hosi Governu maibé señór Prezidente iha liafuan ikus", nia hatete hodi esplika katak hafoin lista ne'e aseita hosi xefe Estadu, sei husu 'agrément' sira ba nasaun sira ne'e.

Kestaun hosi nomeasaun ba embaixador timoroan sira hahú fulan barak nia laran, lista dahuluk maka aprezenta ona hosi Governu anterior - ne'ebé la kompleta nia mandatu tanba eleisaun antesipadu sira iha tinan liubá.

Fonte diplomátiku hatete ba Lusa katak iha kazu Portugal nian fó ona 'agrément' ida ba proposta hosi embaixador ba Lisboa, naran ida ne'ebé la hanesan ho proposta hosi Governu atual.

Iha inísiu tinan ne'e, ezekutivu foun haruka ona lista ida ho naran na'in 16 ba embaixada sira iha mundu tomak maibé simu de'it pose na'in tolu.

Prezidénsia esplika ona iha semana ne'e, liuhosi komunikadu, katak Ministériu Negósiu Estranjeiru (MNEC) haruka ona iha loron 31 Jullu ofísiu ida ne'ebé "aneksa ona kópia sira hosi akordu sira/agréement sira ne'ebé maka fó ona hosi nasaun reseptor sira", nune'e xefe Estadu prepara dekretu sira nomeasaun nian no marka ona pose ba loron 13 Agostu, hodi informa MNEC iha loron 09 Agostu.

Babo esplika katak hafoin konsulta naruk prepara ona lista ida ho naran hosi ema na'in 16 ne'ebé submete ona ba Governu no diskuti ona ho aprova ona iha Konsellu Ministru, nune'e haruka ona hosi primeiru-ministru, Taur Matan Ruak, ba xefe Estadu.

Governante esplika katak "to'o agora" simu de'it 'agrément' nesesáriu sira iha kazu hosi embaixador na'in tolu ne'ebé simu ona pose - iha Brazil, Estadus Unidus ho Nova Zelándia -, hodi hatete katak iha kazu hosi embaixador dahaat, Mosambike, haruka ona dokumentu ida hosi embaixada hosi nasaun ne'e iha Jakarta ba embaixada Timor-Leste nian iha kapital indonéziu.

Babo hatete katak lista ne'e mosu hafoin konsulta oioin ho debate sira iha prosesu ida "naruk" no ne'ebé "la'ós hanesan fásil" maibé tenki rezolve lalais.

"Ami iha embaixada sira ho enkaregadu sira negósiu nian no ami presiza desizaun kona-ba asuntu ne'e. Ha'u kestiona nafatin kona-ba kestaun ne'e iha esterior", nia afirma.

Iha ámbitu seluk, Dionísio Babo komenta ona nia auzénsia polémika iha semana hosi serimónia tomada pose ba embaixador foun na'in tolu ne'ebé halo iha Prezidénsia Repúblika.

"Ha'u la ba serimónia tanba laiha konviti. Tanba ha'u la simu, no tanba kestaun respeitu ba instituisaun maka ha'u ba la ba", nia esplika ba Lusa.

"La'ós hanesan kestaun grave ida. Ha'u hanoin katak hanesan de'it sala protokolar ida", nia afirma hodi esplika katak iha pasadu baibain Prezidénsia haruka konviti sira ba asaun sira hanesan ne'e.

Iha komunikadu semana ne'e, Prezidénsia hatete katak "prosesu hala'o ho dalan kordenadu entre MNEC ho Prezidénsia Repúblika".

Refere mós katak "prezensa hosi ministru Negósiu Estranjeiru ho Koperasaun nian sai indispensável no, tuir akordu ho prátika ne'ebé halo, la presiza konviti hodi iha nia prezensa iha serimónia sira hanesan ne'ebé prezidi hosi xefe Estadu".

Lusa

 


Comentários

Critério de publicação de comentários