Pájina aktualizada iha 01:50h, domingu 23 Setembru

Illa Pasífiku sira laiha konsensu iha medida sira kontra mudansa klimátika tanba Austrália

16 de Agosto de 2019, 22:53

Fórum hosi Illa sira Pasífiku nian hotu ona iha loron-kinta kalan iha Funafuti, kapital Tuvalu nian, lahó konsensu ida hodi aumenta luta hasoru mudansa klimátika tanba pozisaun hosi Austrália kona-ba uzu anar nian.


Líder sira hosi nasaun hamutuk 18 hosi Pasífiku la hetan akordu ida kona-ba Deklarasaun Tuvalu, ne'ebé tuir loloos produzidu hosi nasaun sira ho dimensaun ki'ik sira iha rejiaun, no emiti ona Deklarasaun Kaikani II, testu ida ne'ebé hamenus lian ho kompromisu sira kona-ba fenómenu global hosi mudansa klimátiku sira.

Anfitriaun hosi Fórum, primeiru-ministru Tuvalu nian, Enele Sopoaga, akuza ona diretamente nia homólogu australianu, Scott Morrison, hanesan responsável prinsipal hosi mudansa sira hosi deklarasaun.

"Ita preokupadu liu hodi salva ita nia ekonomia iha Austrália (…) Ha'u preokupadu hodi salva povu Tuvalu" hosi efeitu sira hosi mudansa klimátika, hatete hosi Enele Sopoaga ne'ebé maka haktuir hosi emisora públika australianu ABC.

Deklarasaun orijinal husu medida forte sira hodi limita akesimentu global ba 1,5 grau Celsius, konstribuisaun sira ba Fundu Verde ba Klima ho bandu lalais harii fábrika foun sira anar nian no mina sira hosi mineral ne'e, nune'e mós ba nia eliminasaun gradual.

Maibé, deklarasaun Kaikaki II eziji medida urjente sira hodi mantén emisaun sira ki'ik hosi 1,5 grau no kontribuisaun ba Fundu Verde, maibé "konvida" de'it nasaun sira hodi "reflete" kona-ba subsídiu sira ne'ebé fó ba kombustível fosil sira no nia tranzisaun ba enerjia verde.

"Ha'u entende sensibilidade sira hosi problema sira ne'e no ha'u hatudu nafatin respeitu. La'ós de'it kona-ba ekonomia australianu maibé oinsá Austrália bele kontinua nia apoiu iha rejiaun Pasífiku nian", Morrison hatete ba media australianu sira iha Tuvalu.

Primeiru-ministru Fiji nian, Frank Bainimarama, hakerek ona iha nia konta rede sosial Twitter, katak "halo liafuan sira sai fraku kona-ba mudansa klimátika sira iha konsekuénsia real sira hanesan halo mout uma sira, eskola sira, komunidade sira ho rate bei'ala sira nian".

Ba organizasaun ambientalista australianu Edmund Rice Center, "rekuza hosi Austrália hodi konsidera nia pozisaun iha minerasaun anar nian no nia rezisténsia hasoru aumentu hosi objetivu atual, iguala Akordu Paris nian hanesan insustentável bainhira hakarak mantén perfil ida respeitadu iha Pasífiku".

Fórum hosi Illa sira Pasífiku nian hanesan organizasaun rejional ida ho membru hamutuk 18, maioria hosi nasaun insular sira ne'ebé hasoru dezastre natural sira ho iha perigu bele lakon tanba aumentu hosi nível bee sira nian.

Lusa

 


Comentários

Critério de publicação de comentários