Pájina aktualizada iha 21:53h, kuarta-feira 20 Novembru

Timor-Leste/Tinan 20: Ian Martin 'anunsia' rezultadu sira referendu 1999 nian

04 de Setembro de 2019, 21:39

Liutiha tinan 20, iha fatin hanesan no besik oras hanesan, Ian Martin le fali, iha loron-kuarta ne'e, mensajen ne'ebé maka konfirma ona, iha loron 04 Setembru 1999, vitória maka'as hosi independénsia iha Konsulta Popular ba ema timoroan sira.


"Hodi kumpri knaar ne'ebé maka fiar ona mai ha'u hosi akordu 05 Maiu, iha ne'e ha'u fó sai katak rezultadu votasaun nian maka: 94.388 konkorda ho 344.580 kontra autonomia espesial ne'ebé maka hato'o", xefe misaun ne'ebé superviziona referendu, UNAMET, le fali iha loron-kuarta ne'e, iha Díli, hodi hanoin hikas nia liafuan rasik ne'ebé halo iha tinan 20 liubá.

"Povu Timor-Leste rejeita ona autonomia ne'ebé hato'o no hatudu ona nia dezeju hodi hahú prosesu tranzisaun ida ba independénsia. Hafoin tinan 14 konflitu nian, tuir ita nia hakarak Timor-Leste sei hasoru prosesu pasífiku ida tranzisaun nian ba independénsia", nia hatete.

Ian Martin konklui ona iha loron-kuarta ne'e vizita ida ba Timor-Leste hodi fila hikas ba hotel - iha momentu ne'ebá naran Mahkota, ohin loron naran Timor - fatin ne'ebé maka fó sai rezultadu sira hosi referendu istóriku.

"Iha tuku 09:00 kalan loron 03 Setembru iha Nova Iorke (...) no iha ne'e tuku 09:00 dadeer loron 04 Setembru bainhira maka fó sai rezultadu sira referendu nian", nia hatete.

"Ha'u hatene katak ema hotu senti ansiozu hodi hatene oinsá maka ema timoroan sira vota", nia ironiza hodi hanoin hikas antesipasaun ne'ebé maka hasoru iha tinan 1999.

Iha momentu ne'ebá, Martin halo anúnsiu hamutuk ho xefe eleitoral ONU nian, iha liman-karuk, no hosi responsável komisaun eleitoral independente ne'ebé maka monitoriza ona votu, iha nia liman-loos.

Iha loron-kuarta ne'e, Martin iha líder istóriku na'in rua, ne'ebé iha momentu ne'ebá sira laiha prezensa iha Dili, José Ramos-Horta, eis-Prezidente, ne'ebé iha momentu ne'ebá iha estranjeiru, no Taur Matan Ruak, ne'ebé iha momentu ne'ebá laiha posibilidade hodi vota tanba hela hakmatek iha Uai Morri, iha sentru nasaun nian.

"Ho hatudu korajen no determinasaun ida, povu Timor-Leste komparese maka'as hodi vota iha Konsulta Popular, hodi hatudu nia vontade kona-ba futuru teritóriu nian", Martin hatete bainhira le mensajen ne'ebé halo iha momentu ne'ebá.

"Votu sira ne'ebé hatudu konta tiha ona, komisaun eleitoral rezolve ona kesar sira ne'ebé aprezenta no sertifika ona rezultadu konsulta nian", nia hatete hodi rekorda testu ne'ebé nia le iha sala ne'ebé iha momentu ne'ebá hanesan sala konferénsia nian no ohin loron sai hanesan restaurante.

Leitura simbólika marka ona final hosi festa sira tinan 20 referendu nian, ho Martin aproveita momentu hodi rekorda liuliu eis-funsionáriu nasional sira ho internasional sira UNAMET nian ne'ebé ohin loron marka prezensa no "pasa ona momentu sira ne'ebé susar tebes hosi konsulta" no sira ne'ebé maka marka prezensa iha sala iha tinan 20 liubá.

Iha testu ne'ebé nia le iha momentu ne'ebá, Martin destaka dezeju katak loron sira tuirmai sei hanesan pasífiku ho kalma, asaun ne'ebé, ohin, nia hatete katak la akontese, ho nasaun hahú hetan sunu iha semana rua nia laran ho violénsia ho destruisaun.

"Anúnsiu sai ona hanesan sinal ida ba violénsia ho destruisaun iha mundu tomak. Bainhira taka urna sira iha Atsabe, funsionáriu lokal sira UNAMET nian mate bainhira defende urna sira. Liutiha loron rua, iha Maliana ami nia funsionáriu lokal sira mate tan", nia hatete.

"No iha ne'e, iha Díli, hafoin kedas rezultadu ami haree milísia sira haleu hotel ne'e", nia rekorda.

Serimónia iha loron-kuarta ne'e marka ho divulgasaun hosi vídeo ida ne'ebé prepara hosi misaun ONU nian iha Timor-Leste hodi halo homenajen ba povu Timor-Leste ne'ebé rekorda momentu balun hosi votasaun no selebrasaun sira independénsia nian.

Vídeo ida hodi hanoin hikas knananuk "Oras to'o Ona", hosi Grupu Lahane, tema ne'ebé kria hodi inspira partisipasaun iha Konsulta Popular no ikusmai sai hanesan hinu referendu nian.

Imajen sira hatudu selebrasaun sira hosi ema timoroan sira, rekorda solidariedade internasional no hatudu ezemplu sira ne'ebé maka konsege ona dezde referendu, husik mensajen sira hosi líder prinsipal sira nasaun nian.

Lusa

 


Comentários

Critério de publicação de comentários